Tepetepet na Saray Manbabasa

No say aliwan sanasawa et sanlabin nan-iba ya anggapoy makatunongan iran rason, kasin nibagan kasalanan itan ya mankaukolan na hudisyal ya aksion?

On, no anggapoy makatunongan iran rason, sakey ya hudisyal a komite so pormaen base ed mabiskeg iran ebidensya ya walay agawan seksual ya imoralidad.​—1 Cor. 6:18.

Aralen a maong na saray elder so amin ya situasyon no kasin kaukolan ya pormaen so hudisyal a komite. Singa bilang: Kasin walay romantikon relasyon da? Kasin dati la ran asimbawa lapud kondukta rad sakey tan sakey? Anto ray nayarin rason no akin ya sanlabin nan-iba ira? Kasin implano da itan? Kasin wala ni arum ya nagawaan da komon pian napaliisan itan, odino lapud talagan agnapaliisan iray sirkumstansya, a nayarin walay agawan ag-iilaloan odino emergency kanian anggapo lay nagawaan da noag say sanlabi ran man-iba? (Ecl. 9:11) Iner so naugipan dan dua? Lapud nanduruma so situasyon, nayarin wala ni ray arum ya importantin ikonsidera na saray elder.

No naamtaan la no antoy tuan agawa, mandesisyon iray elder no kasin say kondukta dan dua et mankaukolan na hudisyal ya aksion.