ISTORYAY BILAY

Nalmo Mi so “Mabmablin Perlas”

Unong ed salaysay nen Winston tan Pamela Payne

SI Winston tan Pamela (Pam) Payne et manlilingkor ed Australasia branch. Maliket so bilay da, balet wala ray naeksperiensya ran subok, singa say inyadapta dad nanduruman kultura tan say ermen ya alikna ra nen nakalan si Pam. Balet diad sarayan amin, apansiansia ray panangaro da ed si Jehova tan ed saray totoo to, pati say liket da ed ministeryo. Diad sayan interbyu, impaisalaysay mi ed sikara so pigara ed saray eksperiensya ra.

Winston, ibagam pad sikami no panon mon inanap so Dios.

Binmaleg ak ed nisulinek ya daralusan diad Queensland, Australia. Aliwan relihyoso so pamilya mi. Lapud arawrawi kawalaan mi, ngalngali anggapo lay arum ya nakatongtong ko likud ed pamilyak. Manlapu la nen manga 12 so taon ko, ginapoan ko lan anapen so Dios. Nampikasi ak ed sikato, ya kinerew kon naamtaan ko komon so katuaan nipaakar ed sikato. Asabi panaon, tinaynan ko so lugar mi tan akalmo ak na trabaho ed Adelaide, South Australia. Nen 21 so taon ko, akabat koy Pam nen manbabakasyon ak diad Sydney, tan imbaga tod siak so nipaakar ed relihyoson grupo ya British-Israel. Ibabaga na sayan grupo ya saray British et nanlapu ed saray abalang kuno ya tribu na Israel. Ibabaga da met ya saratan ya tribu et ontutukoy ed samploran tribu na amianen ya panarian ya nibantak nen komawalon siglo B.C.E. Kanian kapawil kod Adelaide, imbagak itan ed katrabahok ya iyaaralan na Biblia na saray Tasi nen Jehova. Anggano pigaran oras kami labat ya nantongtong, ya maslak et nipaakar ed saray papanisiaan na saray Tasi so nantongtongan mi, amoriak la ya naebatan imay pikakasik nen ugaw ak ni. Naaralan koy katuaan nipaakar ed Amalsa tan say Panarian to! Nalmok la so “mabmablin perlas.”—Mat. 13:45, 46.

Pam, ginapoan mo met ya inanap itan ya perlas nen ugaw ka ni. Panon mon nalmo itan?

Binmaleg ak ed relihyoson pamilya diad baley na Coffs Harbour, New South Wales. Inawat na saray atateng ko tan say baik tan lakik iray bangat na grupon British-Israel. Say agik ya laki, atsik, tan siak, pati saray dakel ya kapinsan ko, et pinabaleg kamin manisia ya papaboran na Dios iray nanlapud poli na saray British. Balet, agak kombinsido, tan ag-apenek so espiritual ya pankaukolan ko. Nen 14 so taon ko, linma ak ed nanduruman simbaan diad lugar mi, singa diad Anglican, Baptist, tan Seventh-day Adventist. Balet siansia nin naerasan ak ed espiritual.

Asabi panaon, inmalis so pamilya mi ed Sydney, tan akabat ko si Winston ta manbabakasyon ditan. Singa imbaga to la, lapud impantongtong mi nipaakar ed relihyon, sikatoy impaiyaralan na Biblia ed saray Tasi. Manlapu lad saman, napno na teksto iray sulat tod siak! Aminen ko, nen unaan et aburido ak—mansyodot ak ni ingen. Balet kalkalnan amoriak ya nayarin saman so katuaan.

Nen 1962, inmalis ak ed Adelaide pian mas asingger ak ed si Winston. Kinerew tod sakey a sanasawan Tasi—si Thomas tan Janice Sloman—ya diman ak miayam ed sikara. Nanlingkor ira bilang misionaryo ed Papua New Guinea. Maomaong irad siak; 18 so taon ko ni labat ed saman, tan baleg so nitulong dad siak ed espiritual. Kanian impaiyaralan ak met na Biblia, tan ag-abayag et akombinse ak ya nalmok lay katuaan. Kayari na kasal mi nen Winston, tampol min inggapo so makapaliket a bilay ed panaglingkor ed si Jehova, ya satan so tinmulong ed sikamin mas pablien so marakep ya perlas ya nalmo mi, anggano wala ray subok.

Winston, istoryam pad sikami iray unonan taon na impanlingkor yod si Jehova.

Mapa na saray lugar ya binisita na sanasawan Payne nen wala rad kimey ed sirkito; saray selyo na sulat ya nanlapud pigaran isla; say isla ya Funafuti diad Tuvalu — A. Mapa na saray lugar ya binisita mi nen wala kamid kimey ed sirkito

B. Saray selyo na sulat ya nanlapud pigaran isla. Say Kiribati tan Tuvalu et datin tatawagen ya Gilbert tan Ellice Island

C. Say balibalin isla ya Funafuti diad bansan Tuvalu. Sakey ed saray binisita min isla antis ya wala ray niyasain ditan ya misionaryo

Ag-abayag kayari min nankasal nen Pam, inlukas nen Jehova ed sikami so unona ed amayamay a “baleg a puerta” ya mangitonton ed dakel a kimey. (1 Cor. 16:9) Say unonan puerta et impaimano ed sikami nen Brother Jack Porter, ya diad saman et binmisita ed melag a kongregasyon mi bilang manangasikaso na sirkito. (Natan et sikatoy kaibak a manlilingkor bilang membro na Branch Committee na Australasia.) Si Jack tan si Roslyn ya asawa to so amaseseg ed sikamin manregular payunir—say pribilehyon nanliketan mi ed loob na limay taon. Nen 29 so taon ko, niyasain kami nen Pam ya manlingkor ed sirkito diad saray isla ed South Pacific, ya diad saman et walad panangasikaso na sangan opisina na Fiji. Kaiba ed saratan ya isla so American Samoa, Samoa, Kiribati, Nauru, Niue, Tokelau, Tonga, Tuvalu, tan Vanuatu.

Diad saraman a panaon, saray totoo ya manaayam ed pigaran mas nisulinek ya isla et mainap ed saray Tasi nen Jehova, kanian kaukolan mi magmaliw ya malikas tan maalwar. (Mat. 10:16) Melag iray kongregasyon diman, tan say arum et anggapoy pakasarag dan mangitarya na pampundoan mi. Kanian manaanap kami natuloyan mi ed saray totoo diad baryo, tan maomaong ira ed sikami.

Winston, interesado kan maong ed panagpatalos a kimey. Panon ya ginmapo itan ya interes mo?

Si Winston ya manbabangat ed impanaral na saray elder diad Samoa — Diad Samoa, manbabangat ed impanaral na saray elder

Diad saman, saray agagi ed bansa ya Tonga et walaan labat na pigaran tract tan bokleta ed Tongan—sakey ya lenguahe ed Polynesia. No wala rad ministeryo, say iyaaral da ed saray totoo et say English ya edisyon na libron Say Katuaan a Mangitonton ed Bilay ya Andi-Anggaan. Kanian nen walay agawan impanaral na saray elder ed loob na apatiran simba, taloran lokal ya elder ya daiset labat so amta ra ed English so inmabobon ya mangipatalos ed libron Katuaan diad lenguahen Tongan. Si Pam so angi-type ed patalos, insan mi itan impawit ed sangan opisina ed United States pian niyimprinta. Asumpal so impangipatalos ed loob na manga waloran simba. Anggano aliwan masyadon marakep so patalos, akatulong itan a publikasyon ed dakel ya mansasalitay Tongan pian naaralan day katuaan. Aliwa kamin managpatalos nen Pam, balet ditan ginmapo so interes mi ed satan ya kimey.

Pam, kumustay bilay ed isla no ikompara ed bilay diad Australia?

Si Winston tan Pam Payne ya akaalagey ed abay na bus, sakey ed saray nampundoan da nen wala rad kimey ed sirkito — Sakey ed saray nampundoan mi nen wala kamid kimey ed sirkito

Talagan duma! Wala ray lugar ya kaukolan min anosay dakdakel ya ageyet, sobran petang, saray otot, no maminsan et mansakit kami, tan wala ray panaon ya ngalngali anggapoy naakan mi. Balet, kayari na sanagew, makaparelaks so onnengneng ed dayat manlapud panaayaman min abung ya tatawagen ed Samoa ya fale—atan so kaslakan ya abung ed Polynesia ya say atep to et pinaor tan anggapoy dingding. Diad saray labi ya maliwliwaway bulan, nanengneng mi anino na saray kaniyogan, pati say liwawa na bulan diad dayat. Diad ontan iran pankanawnawa, napapakiwas kamin mandalepdep tan manpikasi, kanian akapokus so nonot mi ed positibo imbes ya diad negatibo.

Labalabay mi ray ugugaw diman. Makapaliket ira tan eksayted ira nen akanengneng iray amputin dayo. Nen ombibisita kamid Niue, walay melag ya ugaw a laki ya pinuyok toy mabagon taklay nen Winston insan to imbaga, “Balibali ra yay bago yo, singa bagoy manok.” Mapatnag ya agnin balot akanengneng na onman ya mabagon taklay tan agto amta no panon ton ideskribe!

Naeermenan kami no nanenengneng mi so irap na bilay na totoo diman tan say pakaskasin kipapasen da. Balibali so kaliberliber da balet kulang so probisyon parad pangasikaso ed bunigas tan ngalngali anggapoy nainum a danum. Balet, singa anggapo labat itan ed saray agagi. Normal itan ed sikara. Maliket ira ya kaiba day pamilya ra, walay pasen ya pandayewan da, tan walay pribilehyo dan irayew si Jehova. Say alimbawa ra so akatulong ed sikami pian makapampokus kami ed no antoy sankaimportantian tan pian napansiansia min simpli so bilay mi.

Pam, wala ray panaon ya kaukolan moy onasol tan itarya so naakan yo diad paraan ya balo ed sika. Panon mon asarag itan?

Diad Tonga, si Pam ya manpepesak na kawes diad batya tan walad abay to so timba — Diad Tonga, si Pam ya manpepesak na kawes mi

Misalsalamat ak ed si tatay ko. Dakel so imbangat to ya akatulong ed siak, singa say manparlang na apoy ya panlutoan tan no panon ya pasaragen no antoy wala. Nen aminsan ya binmisita kamid Kiribati, nampundo kami ed melag ya abung ya say atep to et pinaor, say datal et gawad korales, tan say dingding et kawayan. Pian makapanluto ak na simplin naakan, nankotkot ak na abot diad datal pian walay pamparlangan ko tan bunot na niyog so intungok. Pian walay danum mi, ompipila ak ed kawalaay bobon ya panaasolan na saray bibii ya taga diman. Pian makala iray danum, manguusar iray bislak ya manga anemiran piye so karukey to a walay maimpis ya lubir ya akasinger ed nguro to, ya singa banwit. Balet imbes ya taga so walad sampot na lubir, lata so uusaren da. Ipelag na saray bibii so lata insan da tampol ya ipeyes so lima ra pian omparukol tan onlereg imay lata insan napano na danum. Say amtak mainomay—ya anggad nen siak lay onsublay. Aminpigak ya sinali balet onletaw labat may lata kadapo tod danum! Kayari da ak ya inelekan, walay biin tinmulong ed siak. Lanang da ak ya tutulongan tan maomaong ira.

Pareho yon naar-aro so asainmin yo ed saray isla. Mangibaga kayo pa na saray agyo nalinglingwanan ya eksperiensya yo.

Winston: Medyo abayag ni antis min naaralan so arum ya kaugalian da. Singa bilang, no mangiparaan iray agagi na naakan, kaslakan et iparungo dan amin. Nen unaan, agmi amta ya kaukolan mi mangikera na parad sikara. Kanian inupot min amin so imparungo da! Siempre, nen naamtaan mi no anton talagay situasyon, mangikekera kami la. Anggano wala iratan a lingo mi, tatalosan kami na saray agagi. Tan eksayted iran nanengneng kami no ombibisita kamid sikara maminsan ed manga kada anem bulan. Likud ed saray lokal ya agagi, sikami labat so napipiulopan dan Tasi ya nanlapud arum a lugar.

Si Winston ya kaiba to ray agagi ya onlan manpulong, ya amin da et akamotor, diad Niue Island — Diad Niue Island, kaiba iray agagi ya onlan manpulong

Say ibibisita mi et maong met ya pantasi ed lugar da. Iisipen na dakel ya taga diman ya inimbento labat na saray lokal ya agagi so relihyon da. Kanian nen binisita ira na sakey a ministro tan say asawa to ya nanlapud arum a bansa, apaneknekan na saray taga diman ya saray agagi et kabiangan na internasyonal ya relihyon kanian mandinayew ira.

Pam: Say talagan agko nalingwanan et nen wala kamid Kiribati, ya diman et walay sakey a kongregasyon a pigpigara labat so agagi. Say saksakey ya elder da ya si Itinikai Matera et ginawa toy anggaay nayarian to ya asikasoen kami. Sakey ya agew et nila to kami ya walay awit ton baskit a nankargay saksakey ya iknol. “Parad sikayo,” so kuan to. Diad saman, say iknol na manok et mataltalag min natawayan. Anggano simpli labat may ginawa to, talagan naapresya min maong so inkamabunlok to.

Pam, kalabas na pigaran taon et nakalan ka. Panon mon asarag so ermen?

Nanlukon ak nen 1973 sanen wala kamid South Pacific nen Winston. Nandesisyon kami ya ompawil ed Australia, tan kayari apat bulan et nakalan ak. Maer-ermen kamin dua nen Winston. Kalkalnan abawasan so sakit ya naliliknak diad inlabas na panaon, balet naandi labat so sakit ya naliliknak nen abasa mi so Abril 15, 2009, ya isyu na Say Panag-bantayan. Say topic ed “Tepetepet na Saray Manbabasa” et: “No say lukon et inatey, nailaloan kasin paolien ni ed bilay?” Impaseguro na sayan artikulo ya say akauley ed satan et si Jehova tan makapanmatalek tayo ya lanang ton gagawaen so duga. Paabigen toy amin ya sakit ya nalilikna tayod sayan mauges a mundo legan ya maaro ton igigiya so Anak to pian “deralen to iray kimey na Diablo.” (1 Juan 3:8) Atulongan kami met na sayan artikulo ya mas apresyaen so mabmablin “perlas” ya walad sikatayo ran totoo nen Jehova! Anto la kasi pansumpalan tayo no anggapoy ilalon iiter na Panarian?

Kayarik ya nakalan, nandesisyon kamin ompawil ed sigpot-panaon a panaglingkor. Pigaran bulan kamin nanlingkor ed Bethel diad Australia insan niyasain kami lamet ed kimey ed sirkito. Nen 1981, kayari na apat taon ya impanlingkor mi ed New South Wales tan Sydney, naimbitaan kamin manlingkor diad Australia branch, say tawag ed satan ya branch nensaman, tan wadtan kami ni anggad natan.

Winston, kasin akatulong so eksperiensyam diad saray isla ed South Pacific ed kimey mo natan bilang membro na Branch Committee na Australasia?

On, dakel so nitulong na satan. Unona, niyasain ed Australia branch so pangasikaso ed American Samoa tan Samoa. Insan, pinan-iba so New Zealand tan Australia branch tan nagmaliw ya Australasia branch. Natan, saray teritoryan sakop na Australasia branch et say Australia, American Samoa tan Samoa, Cook Islands, New Zealand, Niue, Timor-Leste, Tokelau, tan Tonga. Apribilehyoan ak ya bisitaen so dakel ed saratan a lugar bilang representanti na sangan opisina. Lapud impikimey kod saray matoor ya agagi ed saray isla, akatulong itan na baleg ed siak diad panlilingkor kod sikara natan manlapud sangan opisina.

Si Winston tan Pam Payne diad Australasia branch — Si Winston tan Pam diad Australasia branch

Base ed personal ya eksperiensya mi, nibagak ya abayag mi lan apaneknekan nen Pam ya aliwan saray adulto labat so manaanap ed Dios. Labay met na saray ugugaw ya naalmo so “mabmablin perlas”—anggano ag-interesado iray kapamilya da. (2 Ara. 5:2, 3; 2 Awa. 34:1-3) Balet segurado ya labay na maaron Dios tayo a si Jehova ya amin et makaawat na bilay, balanglan ugaw o matatken.

Nen inggapo mi nen Pam so impananap mi ed Dios masulok ya 50 taon lay apalabas, agmi ilaloan no antoy pansumpalan na satan. Say katuaan nipaakar ed Panarian et talagan mabmablin perlas! Determinado kamin bembenan itan ya mabmablin perlas diad amin ya biskeg mi!