Jesus—Say Atagey a Saserdote ya Makapilikna ed Sikatayo

1-2. (a) Akin ya imbaki nen Jehova diad dalin so Anak to? (b) Antoy pantongtongan tayo diad sayan artikulo? (Hebreo 5:7-9)

MANGA 2,000 taon lay apalabas, imbaki nen Jehova diad dalin so inar-aro ton anak. Antoy rason? Say sakey et pian dondonen iray totoo manlapud kasalanan tan ipapatey, diad ontan et naekal so amin ya aliwliwan epekto na impanrebelde nen Satanas. (Juan 3:16; 1 Juan 3:8) Amta met nen Jehova ya no nasali nen Jesus so manbilay bilang too, magmaliw ya mas makasi, mas natalosan toy kipapasen na saray totoo, tan mas makapilikna ed sikara. Kaukolan to iratan ya kualidad diad panlingkor to bilang Atagey a Saserdote. Ginmapon nanlingkor si Jesus bilang Atagey a Saserdote kayari na impanpabautismo to nen 29 C.E.a

² Pantongtongan tayod sayan artikulo no panon ya akatulong so impanbilay nen Jesus diad dalin pian magmaliw ya mas kualipikado ed betang to bilang Atagey a Saserdote. No natatalosan tayo no panon ya imparaan nen Jehova si Jesus parad satan ya betang, mas napakiwas tayon onasingger tan manpikasi ed si Jehova anggano nadidismaya tayo lapud saray lingo o kakapuyan tayo.—Basaen so Hebreo 5:​7-9.

LINMAD DALIN SO INAD-ARON ANAK NA DIOS

3-4. Anton klase na bilay so tinaynan nen Jesus diad tawen, tan antoy kipapasen na bilay to diad dalin?

³ Seguradon wala la ray asalim ya pananguman ed bilay mo. Singa bilang, ompan apasal ka ya lanang mon kaiba iray kapamilyam tan kakaarom, pero sinmabi panaon ya kaukolan mo lay onarawi ed sikara. Ompan nan-adjust kan maong. Pero no pananguman so pantongtongan, anggapoy makapipara ed pananguman ya asali nen Jesus. Diad tawen, sikato so pinagka-lider na amin ya anghel. Sankalikna toy panangaro nen Jehova, tan malikeliket ya mankikimey kaibay Ama to. (Sal. 16:11; Pro. 8:30) Pero ibabaga na Filipos 2:7 ya mabulos ton ‘tinaynan iratan ya amin,’ tan linma diad dalin pian manbilay kaiba iray makasalanan ya totoo.

⁴ Isipen pa met iray unonan taon na impanbilay nen Jesus diad dalin—manlapud inkiyanak to ya anggad impanugaw to. Mairap so bilay na pamilyan binalegan to. Nen inyanak si Jesus, duaran melag ya siwit labat so inyapay nen Jose tan Maria diad templo. Atan so kaslakan ya iyaapay na saray mairap-bilay. (Lev. 12:8; Luc. 2:24) Nen naamtaan nen Arin Herodes ya inyanak la so magmaliw ya Mesias, labay ton ipapatey! Lapud satan, apilitan ya ontakas so pamilya nen Jesus tan nagmaliw iran refugee ed Ehipto. (Mat. 2:13, 15) Talagan anguma-uman so bilay nen Jesus!

5. Antoy anengneng tan asalin mismo nen Jesus nen wadiad dalin, tan panon itan ya akatulong pian niparaan toy sarili to diad panlingkor to bilang Atagey a Saserdote? (Nengnengen met so litrato.)

⁵ Legan ya ombabaleg si Jesus, anengneng toy pakaskasin situasyon na saray totoo. Asali to met so naandian na inad-arod bilay, kanian amta toy liknaan na inateyan. Seguradon ansakisakit ed sikato nen inatey so pinagka-ama ton si Jose. Legan na ministeryo nen Jesus, dakdakel so akabat ton akating, bulag, paralisado, tan atateng ya inateyan na anak. Kaskasian to ra! (Mat. 9:2, 6; 15:30; 20:34; Mar. 1:40, 41; Luc. 7:13) Nen wala nid tawen si Jesus, diad tua et sankanengneng to la iray totoon maniirap. Pero nen nagmaliw ya too tan wadia lan mismo ed dalin, diman to mas atalosan so irap ya dadalanen na totoo. (Isa. 53:4) Singa met ed arum ya too, asali nen Jesus so abanalan, naermenan, tan agonigon. On, amta toy liknaan na sakey ya toon naiirapan tan nasasakitan.

AKASIAN NEN JESUS IRAY TOTOO

6. Base ed propesiya ya walad Isaias 42:3, panoy pantrato nen Jesus ed saray ordinaryon totoo?

⁶ Legan na ministeryo nen Jesus, graben malasakit so impanengneng to ed saray pakaskasi tan mairap-bilay. Abaybayag la itan ya nipropesiya ed Biblia. Diad Hebreon Kasulatan, saray totoon mainaway bilay da tan mabiskeg so laman da et inkompara ed mabunan hardin tan ed angkakabaleg ya kiew. (Sal. 92:12; Isa. 61:3; Jer. 31:12) Balet saray mairap-bilay tan pakaskasi et inkompara ed “abalbal a tanubong” tan “makuykuyep a pabilo.” (Basaen so Isaias 42:3; Mat. 12:20) Anggano melmelag so pakanengneng na arum ed sarayan ordinaryon totoo, ipapaseguro na propesiyan impaisulat nen Jehova ed si Isaias ya ipanengneng na Mesias so panangaro tan panangasi ed sikara.

7-8. Panon ya asumpal ed si Jesus imay propesiya nen Isaias?

⁷ Base ed Ebanghelyo nen Mateo, si Jesus so tutukoyen na sayan propesiya nen Isaias: “Agto puteren so abalbal a tanubong tan agto erepen so makuykuyep a pabilo.” Dakdakel ya milagro so ginawa nen Jesus parad saray totoo ya lapud irap na bilay da et singa ra abalbal a tanubong. Tinulongan to met iray totoo ya lapud nanaekalan la ray ilalo et singa ra makuykuyep a pabilo ya ngalngali la naerep. Singa bilang, isip yo pa may lakin napnoy kating so laman to. Akin a, iilaloan to ni sirin ya onabig tan nakaiba to ni ray kapamilya tan kakaaro to? (Luc. 5:12, 13) Amay lakin telek ey, tan walay deperensya tod panagsalita? Imadyin yo pay nalilikna to no nanenengneng ton maniistoryaan so arum pero agto natatalosan so ibabaga ra. (Mar. 7:32, 33) On, pakaskasi ira! Pero aliwan satan labat so mamapairap na liknaan da.

⁸ Diad panaon nen Jesus, panisiaan na dakel ya Judio ya no walay sakit o kapansanan mo, dudusaen ka na Dios lapud walay kasalanan ya agawaan mo o agawaan na saray atateng mo. (Juan 9:2) Atan so sakey ya rason no akin ya aliwliway panagtrato na arum ed ontan iran totoo. Tan lapud satan, amay mismon walay sakit o kapansanan to et andi-kakanaan met lay pakanengneng tod sarili to. Pero dumay panagtrato nen Jesus ed ontan iran totoo. Pinaabig to ra tan impalikna tod sikara ya imamalasakit ira na Dios. Antoy naaralan tayod satan ey?

9. Panon tayon amta ya talagan makapilikna so Atagey a Saserdote tayo ed sikatayo ran totoo? (Hebreo 4:15, 16)

⁹ Basaen so Hebreo 4:​15, 16. Abitlad sayan teksto ya si Jesus et makapilikna ed sikatayo ran totoo. Natatalosan toy amin ya irap tan emosyon ya nalilikna tayo. No nanenengneng ton nasasakitan tan naiirapan tayo, nasasakitan tan naiirapan met. No basaen tayo iray salaysay ed Biblia nipaakar ed saray milagro nen Jesus, nanengneng tayo ya agaylay malasakit tan konsiderasyon to ed saray totoo. Pinaabig to ra aliwan lapud obligasyon to itan ya gawaen. Pinaabig to ra ta alikna toy paniirap da tan labay to ran nainawaan. Singa bilang, nen pinaabig to may lakin akating, sarag to pan paabigen anggano agto la asinggeran. Pero antoy ginawa nen Jesus? Diniwit to! Imadyin mo pay alikna to may laki. Diad dakel ya taon, anggapon balot so aniwit ed sikato! Amay lakin telek ey? Inyarawi nen Jesus ed totoo tan inyakar to ed mareen ya pasen insan to pinaabig. Tan nanonotan yo may magbabawin bii ya manakis tan binasa to na lua to iray sali nen Jesus, tan pinunasan to iratan na buek to? Minelmelag na sakey ya Fariseo iyan bii, pero inyagel nen Jesus. (Mat. 8:3; Mar. 7:33; Luc. 7:44) On, ag-iniwasan nen Jesus iramay walay sakit o kapansanan da, tan anggan saramay akagawa na seryoson kasalanan. Labalabay to ingen ya onasingger irad sikato, tan impalikna toy panangaro ed sikara. No ontan ya klase na pililikna so impanengneng nen Jesus nensaman, makapantiwala tayo sirin ya ontan to met ed sikatayo natan.

AALIGEN TAYOY ATAGEY A SASERDOTE TAYO

10. Anto ray uusaren tayo natan pian natulongan tayo ray telek tan bulag? (Nengnengen met so litrato.)

¹⁰ Lapud papatumbok itayo nen Jesus, aaligen tayoy alimbawa to tan pansasagpotan tayo met ya ipanengneng ed arum so panangaro, pililikna, tan panangasi. (1 Ped. 2:21; 3:8) Tua, anggapoy pakayari tayon manpaabig na saray telek o bulag, pero sarag tayo ran tulongan pian nakabat day Jehova tan onapit irad sikato. Mangipa-publish so organisasyon tayo na saray publikasyon ya base ed Biblia diad masulok ya 100 ya sign language. Pian minabang met iray bulag tan saramay makapuy so pakanengneng da, mamapawala tayo met na saray publikasyon ed braille diad masulok ya 60 ya lenguahe. Tan wala ray audio description na saray video tayo diad masulok ya 100 ya lenguahe. Balbaleg so nitutulong na sarayan publikasyon pian anggan saray telek tan bulag et onapit irad si Jehova tan ed si Jesus.

11. Panon ya aaligen na organisasyon tayo natan so malasakit nen Jesus ed amin ya klase na totoo? (Gawa 2:5-7, 33) (Nengnengen met so litrato.)

¹¹ Pansasagpotan met na organisasyon tayo ya tulongan so amin ya klase na totoo. Seguro nanonotan yo may agawa kayari na inkioli nen Jesus. Diad samay piesta na Pentecostes, inkalbo nen Jesus so masanton espiritu diad saray disipulo to pian napulongan da so amin ya totoo ya wadman diad mismon “lenguahe ra.” (Basaen so Gawa 2:​5-7, 33.) Diad panangidaulo nen Jesus, mamapawala met so organisasyon tayo natan na saray publikasyon ya base ed Biblia diad masulok ya 1,000 ya lenguahe. Wala ingen iray publikasyon tayo diad saray lenguahe ya datdaiset labat so manguusar. Singa bilang, imanoen pa iray lenguahe ya kabkabat ed tawag ya Amerindian. Ontutukoy itan ed saray lenguahe na saray katutubo ya manaayam ed North tan South America. Melag labat so populasyon na sarayan katutubo. Pero available iray publikasyon tayo diad masulok ya 160 ya lenguahen Amerindian pian nipasabid sikara so maong a balita. Available met iray publikasyon tayo ed saray lenguahe ya kabkabat ed tawag ya Romany. Maslak ya manguusar ed sarayan lenguahe et manaayam diad Eastern tan Southeastern Europe. Abaybayag la ya biktima irayan totoo na diskriminasyon tan panagbusol. Pero amawala so organisasyon tayo na saray publikasyon diad masulok ya 20 ya lenguahen Romany. Makapaliket ta libo-libon totoo so nagmaliw ya interesado ed katuaan nen naamtaan da itan diad mismon lenguahe ra.

12. Anto ni ran praktikal ya tulong so iiter na organisasyon nen Jehova?

¹² Aliwan panagpulong labat so gagawaen tayo. Mangiiter met so organisasyon tayo na praktikal ya tulong parad saray biktima na kalamidad. Libo-libon agagi tayo so manboboluntaryo pian natulongan iray apektado tan mankakkaukolan ya agagi tayo. Seseguroen met na organisasyon tayo ya walay simplin pasen ya pantitiponan na saray totoo pian makapandayew irad Dios tan mas naaralan da ni so nipaakar ed panangaro to ed sikara.

TULONGAN KA NA ATAGEY A SASERDOTE TAYO

13. Panon to tayon tutulongan nen Jesus?

¹³ Si Jesus so maong a managpastol tayo, kanian makaseguro tayo ya iimanoen toy kada sakey ed sikatayo tan iter to iray espiritual ya pankaukolan tayo. (Juan 10:14; Efe. 4:7) Nasasalim may lapud dadalanen mon problema et makakkapuy so liknaan mo kanian singa ka makuykuyep ya pabilo odino abalbal ya tanubong? Ompan walay graben sakit mo, walay agawaan mon lingo, odino ompan walay agin akabarongan mo. Diad ontan iran situasyon, ompan akapokus tayo labat ed irap tan sakit na linawa ya nalilikna tayo tan nalingwanan tayo la so ilalo tayo ed arapen. Pero tandaan mo ya amta nen Jesus so dadalanen mo tan natatalosan toy naliliknam. Imamalasakit to ka kanian seguradon tulongan to ka. Singa bilang, usaren toy masanton espiritu pian pabiskegen so liknaan mo. (Juan 16:7; Tito 3:6) Usaren met nen Jesus iray “regalo a lalaki” tan arum nin agagi ya manpaseseg, onsuporta, tan manligliwa ed sika.—Efe. 4:8.

14. Antoy gawaen tayo no onkakapuy so liknaan tayo?

¹⁴ No onkakapuy so liknaan mo tan ngalngali ka la onsuko, dalepdep moy betang nen Jesus bilang Atagey a Saserdote tayo. Tandaan mo ya imbaki nen Jehova si Jesus diad dalin aliwa labat ya pian dondonen to tayo, noagta pian mas natalosan to met iray problema ya dadalanen tayo. No nadidismaya kad sarilim lapud walay agawaan mon lingo o walay lalabanan mon kakapuyan, agmo lilingwanan ya wadtan si Jesus ya akaparaan ya ontulong ed sika “diad dugan panaon.”—Heb. 4:15, 16.

15. Antoy akatulong ed sakey ya brother pian makapawil ed kongregasyon?

¹⁵ Igigiya to tayo met nen Jesus diad panaanap tan itutulong tayo ed saramay akaarawi ed pulok nen Jehova. (Mat. 18:12, 13) Imanoen so eksperiensya nen Stefano.b Nakal ed kongregasyon si Stefano, pero kayari 12 ya taon, sinali toy inmatendi ed aral. Oniay imbaga to: “Nababaingan ak. Pero pinakpelan koy liknaan ko ta labay ko lamet so magmaliw ya parte na pamilya nen Jehova. Nen anengneng ak na saray elder, impalikna dad siak ya welcome ak. No maminsan, onsesebang nin siansia ed isip ko ya agak la makanepegan ya aroen nen Jehova, tan ibabagak ed sarilik: ‘Agak la amo ompawil.’ Pero lanang ya ipapanonot ed siak na saray elder ya agko dapat sukoan so sarilik ta labay nen Jehova tan Jesus ya makapawil ak. Nen akapawil ak, ampetapetang so impan-welcome na kongregasyon ed siak tan ed pamilyak. Ag-abayag, nampaiyaral met la na Biblia si asawak. Tan natan et manlilingkor lay interon pamilya mi ed si Jehova.” Seguradon malikeliket so Atagey a Saserdote tayo kada no walay magbabawin nankasalanan ya ompawil ed kongregasyon.

16. Akin et misatsalamat ka ya si Jesus so Atagey a Saserdote tayo?

¹⁶ Legan ya wadiad dalin si Jesus, agnabilang ya totoo so tinulongan to. Diad panaon tayo, nailaloan tayo met so tulong to. Tan diad balon mundo ya asingsingger lan onsabi, tulongan to ray maunor ya totoo pian magmaliw iran perpekto, tan talagan nibulos la ra ed amin ya epekto na kasalanan. Misatsalamat tayod si Jehova, say maar-aron Ama tayo, ta say pinili ton magmaliw ya Atagey a Saserdote tayo et amay makapilikna ed sikatayo—say mismon Anak to!