Agmo Papaulyanan so “Espiritual a Pankaukolan” Mo

1. Anto ran pankaukolan so peneken tayo pian tuloytuloy tayon manbilay tan nalikna tayoy tuan liket? (Mateo 5:3)

PINALSA to tayo nen Jehova ya kaukolan tayon peneken iray materyal ya pankaukolan tayo pian tuloytuloy tayon manbilay. Singa bilang, kaukolan tayoy naakan, kawes, tan ayaman. No walay kulang ed saraya anggan sakey labat, nairapan tayo tan ompan ompatey tayo ni ingen. Pero aliwan materyal labat so kaukolan tayo. Pinalsa to tayo met nen Jehova ya walay espiritual a pankaukolan tayo. (Basaen so Mateo 5:3.) No labay tayon nalikna so tuan liket, agtayo lilingwanan ya walay ontan ya pankaukolan tayo tan agtayo itan papaulyanan.

2. Panon tayon nibaga ya say sakey et “manonot” ed “espiritual a pankaukolan” to? Mangiter na ilustrasyon.

² Panon tayon nibaga ya say sakey ya too et “manonot” ed “espiritual a pankaukolan” to? Diad Griegon lenguahe, amay nabasad Mateo 5:3 ya “manonot ed espiritual a pankaukolan da” et nayari met ya ipatalos ya “[saray] mipapayabol na espiritu.” Imadyin mo pay sakey ya toon mipapayabol. Apilatpilat so kawes to, akalespak labat ed gilig na karsada, makapkapuy la lapud eras to, tan iiwasan na arum lapud marindingot. Anggapoy nasiroman to kanian kaskasian ed petang na agew tan nakeketel kalamor no labi. Aga ambaing ya mikasi tan onkerew na tulong so sakey ya mipapayabol ta amta ton ditan akadepende so bilay to. Ontan met so toon manonot ed espiritual a pankaukolan to, singa mipapayabol na espiritu—bibidbiren to ya aga nabilay no anggapoy tulong na Dios. Lapud singa mipapayabol ed espiritual so pakanengneng tod sarili to, agton balot palampasen so antokaman ya itatarya nen Jehova parad saray mangaarod Sikato.

3. Antoy pantongtongan tayo ed sayan artikulo?

³ Diad sayan artikulo, pantongtongan tayo nin unona no antoy naaralan tayo ed sakey ya biin taga Fenicia ya akikasi tan kinmerew na tulong ed si Jesus. Impanengneng na sayan bii so taloran kualidad ya nepeg tayon aligen pian agtayo napaulyanan so espiritual a pankaukolan tayo. Insan tayo pantongtongan so alimbawa na maespiritual iran lalaki—si apostol Pedro, si apostol Pablo, tan si Arin David.

MAPAABEBA, AGSINMUKO, TAN MABISKEG SO PANANISIA TO

4. Akin et akikasi ed si Jesus imay biin taga Fenicia?

⁴ Aminsan, walay biin taga Fenicia ya inmasingger ed si Jesus. Say anak to et “maniirap a maong lapud demonyon sinmelep ed sikato.” (Mat. 15:21-28) Tinmalimukor iyan bii, tan mikakasi kalamor ya paabigen komon nen Jesus so anak to. Makaaral tayod ginawa to. Pantongtongan tayoy taloran kualidad ya impanengneng to nen akikasi ed si Jesus.

5. Anto ran kualidad so impanengneng na samay biin taga Fenicia, tan antoy reaksion nen Jesus? (Nengnengen met so litrato.)

⁵ Mapaabeba imay biin taga Fenicia. Panon tayon nibaga? On ta aga nainsulto anggano sikatoy inkompara nen Jesus ed oken, ya kaslakan ya alaga ed abung na saray Gentil nensaman. No sika may biin taga Fenicia, anto kasi reaksion mo no onman so ibaga nen Jesus ed sika? Kasin nasakitan so liknaan mo tan nadismaya ka la? Aliwan ontan so alikna na samay biin taga Fenicia. Nampaabeba tan agsinmuko. Aga tinmundan akikasi ed si Jesus ta mabiskeg so pananisia to. Kanian anggano imbaga nen Jesus ya saray taga Israel so prayuridad ton tulongan, pinapaway to lanlamang imay demonyo ya sinmelep ed anak to may bii. On, apakiwas si Jesus ya gawaen so agto komon planon gawaen ta pandinayewan to so pananisia na samay bii.

6. Panon tayon naalig imay biin taga Fenicia?

⁶ Pian agtayo napaulyanan so espiritual a pankaukolan tayo, nepeg tayon aligen imay biin taga Fenicia. Importante ya mapaabeba tayo, agtayo onsusuko, tan mabiskeg so pananisia tayo. No say sakey et mapaabeba, bibidbiren to ya kaukolan toy Dios ed bilay to kanian aga ontundan onkerew na tulong ed sikato. Tan no say sakey et mabiskeg so pananisia tod si Kristo Jesus, pantiwalaan to so matoor ya aripen ya tinuro ton mangidaulo ed saray disipulo to. (Mat. 24:45-47) No walad sikatayo irayan kualidad, seguradon tulongan itayo nen Jehova tan Jesus pian agtayo napaulyanan so espiritual a pankaukolan tayo. (Ikompara so Santiago 1:5-7.) Pantongtongan tayo natan no panon ya itatarya nen Jehova so espiritual a naakan, kawes, tan ayaman tayo. Aralen tayoy alimbawa nen apostol Pedro, apostol Pablo, tan Arin David pian naamtaan tayo no antoy nepeg tayon gawaen pian tuloytuloy tayon minabang ed saray itatarya nen Jehova.

SINGA SI PEDRO, ITULTULOY MOY MANGAN NA ESPIRITUAL A NAAKAN

7. Anton asainmin so inter nen Jesus ed si Pedro, pero anto met so kaukolan ton gawaen? Ipaliwawa. (Hebreo 5:14–6:1)

⁷ Isipen pay apostol Pedro. Sakey si Pedro ed saray Judio ya inmuna-unan anisia ya si Jesus so Mesias. Talagan kombinsido ya si Jesus so uusaren nen Jehova pian pakanen ed espiritual iray totoo, diad ontan et nawalaan iray bilay ya andi-anggaan. (Juan 6:66-68) Nen apaoli lay Jesus tan magano lan ompawil ed tawen, oniay bilin tod si Pedro: “Pakan mo iray angkekelag a karnerok.” (Juan 21:17) Nansagpot ya maong si Pedro pian nagawaan to itan ya asainmin to. Impaisulat ingen ed sikato nen Jehova so duaran sulat ya nagmaliw ya parte na Biblia. Pero kaukolan met nen Pedro ya pakanen so sarili to na espiritual a naakan. Singa bilang, inaral ton maong iramay impaisulat nen Jehova ed si apostol Pablo. Inamin nen Pedro ya wala ray insulat nen Pablo ya “mairap a talosan.” (2 Ped. 3:15, 16) Pero inaral to nin siansia iratan, ta mabiskeg so pananisia to ya tulongan nen Jehova pian natalosan to so “anawet a naakan” tan naiyaplika to iratan.—Basaen so Hebreo 5:14–6:1.

8. Antoy reaksion nen Pedro nen walay balon liwawa ya impaamta nen Jehova ed sikato?

⁸ Say sakey nin pakapatnagan ya mabiskeg so pananisia nen Pedro et amay lanang ton uunoren so instruksion nen Jehova. Singa bilang, nen walad syudad na Joppe si Pedro, akanengneng na pasingawey. Insan walay nadngel ton boses na anghel ya mangigaganggan ed sikaton mangan na karne na ayayep ya marutak unong ed Mosaikon Ganggan. Judio si Pedro, kanian seguradon abigbigla. Diad interon bilay to, agnin balot angan na ontan iran ayayep! Katon oniay imbaga tod samay anghel: “Andi, Katawan, ta agak nin balot angan na antokaman a marutak.” Pero oniay imbaga to may anghel: “Agmo la tatawagen a marutak iray nilinisan la na Dios.” (Gawa 10:9-15) Atebek nen Pedro so panlabayan nen Jehova. Panon tayon amta? Kayari to man ya pasingawey, walay sinmabin taloran lalaki ya imbaki nen Cornelio, sakey ya Gentil. Intagar day Pedro ya milad sikara diad abung na amo ra. Anto kasi gawaen nen Pedro? Ag-onloloob iray Judio ed abung na saray Gentil ta ipapasen dan marutak iray Gentil. (Gawa 10:28, 29) Pero lapud atalosan tan inawat ya tampol nen Pedro so balon liwawa ya impaamtad sikato nen Jehova, akilan tampol ed sikara. (Pro. 4:18) Pinulongan toy Cornelio tan say interon sankaabungan to. Seguradon malikeliket si Pedro nen anengneng to ya inawat day katuaan, nikalbod sikara so masanton espiritu, tan nampabautismo ira.—Gawa 10:44-48.

9. Antoy duara ya balibalin epektod sikatayo no panliketan tayon aralen iray anawet ya espiritual a naakan?

⁹ Singa si Pedro, kaukolan ya tuloytuloy tayon mangan na espiritual a naakan. Nagawaan tayo itan no lanang tayon aralen so Biblia. Saray manunan bangat ya wadtan et singa gatas, ta mainomay labat ya talosan. Say arum balet ya katuaan ya wadtan et singa anawet ya naakan, ta mas mairap ya talosan. Pero panliketan tayo met komon ya aralen iratan! Tua, kaukolay panaon tan sagpot pian natalosan tayo iray aralem ya katuaan ed Biblia. Pero sulit itan ta balibali epekto to ’tan ed sikatayo. Unona, lalo tayon nakabkabat si Jehova, kanian lalo tayon naar-aro tan narespeto. Tan komadua, mas ganado tayon istoryaen ed arum iray makapadinayew ya nanaaralan tayo nipaakar ed si Aman Jehova. (Roma 11:33; Apo. 4:11) Nia ni sakey ya naaralan tayod si Pedro: No makaawat tayoy balon liwawa o walay pananguman ed pakatalos tayo, komon ta awaten tan iyaplika tayon tampol. Atan so sekreto pian agtayo naerasan ed espiritual tan mansiansia tayon mausar ed si Jehova.

SINGA SI PABLO, SEGURADOM YA AKASULONG ED SIKA SO ESPIRITUAL YA KAWES

10. Panon tayon naisulong so espiritual ya kawes? (Colosas 3:8-10)

¹⁰ Wala ni sakey ya itatarya nen Jehova: say espiritual ya kawes. No akasulong itan ed sikatayo, napaliket tayo so Dios. Panon tayon naisulong so espiritual ya kawes? Insulat nen apostol Pablo ya kaukolan tayon ‘lakseben so daan a personalidad’ tan ‘isulong so balon personalidad.’ (Basaen so Colosas 3:8-10.) Diad tua, aliwan mainomay itan ya gawaen. Isipen pay mismon alimbawa nen Pablo. Manlapu lad inkaugaw to, labalabay to lan paliketen so Dios. (Gal. 1:14; Fil. 3:4, 5) Pero say problema, ag-akabase ed suston kakabatan so panagdayew tod Dios. Lapud agto amta iray bangat nen Kristo tan atagtagey so pakanengneng tod sarili to, nagmaliw ya “agmangikabkabilangan” tan aliwliway ugali to.—1 Tim. 1:13.

11. Antoy kakapuyan nen Pablo? Ipaliwawa.

¹¹ Antis ya nagmaliw ya Kristiano si Pablo, mipepetang so ulo to. Nabasa tayod libron Gawa ya agaylay petang na ulo to ed saray disipulo nen Jesus kanian ‘papagyawen’ to ra tan “labalabay to ran pateyen.” (Gawa 9:1) Kanian nen nagmaliw lan Kristiano si Pablo, seguradon nansagpot ya maong pian nalakseb to so daan ya personalidad to. (Efe. 4:22, 31) Pero wala ni ran siansiay pankanawnawa ya pawilpawil so aliwliwan ugali nen Pablo. Singa bilang, nen ag-ira akapampaknaan nen Bernabe, ag-akontrol nen Pablo so sanok to, kanian “walay agawan ampetang a sangsangan.” (Gawa 15:37-39) Pero agsinukoan nen Pablo so sarili to. Lanang to kunon ‘pepekpeken so laman to’—tuloytuloy ton nilabanan so kakapuyan to—pian napaliket toy Aman Jehova.—1 Cor. 9:27.

12. Antoy akatulong ed si Pablo pian nalakseb toy aliwliwan ugali to?

¹² Antoy akatulong ed si Pablo pian nalakseb toy aliwliwan ugali to tan naisulong toy balon personalidad? Aga nantiwala ed sarili ton biskeg. Nantiwala ed si Jehova! (Fil. 4:13) Tan singa ginawa nen Pedro, nandepende si Pablo ed “biskeg ya iiter na Dios.” (1 Ped. 4:11) Pero wala ni ran siansiay panaon ya nadidismayay Pablo ed sarili to lapud saray nagagawaan ton lingo. No ontan lay nalilikna to, iisipen to lay amin ya kamaongan nen Jehova ed sikato. Atan so amakiwas ed sikaton agsukoan so sarili to.—Roma 7:21-25.

13. Panon tayon naalig si Pablo?

¹³ Panon tayon naalig si Pablo? Anggano abaybayag tayo lan manlilingkor ed si Jehova, kaukolan ya tuloytuloy tayon mansagpot pian naseguro tayo ya akasulong ya lanang ed sikatayo so espiritual ya kawes. Panon to no alikas mon walay pinmawil ya aliwliwan ugalim? Singa bilang, agmo akontrol so pasnok mo tan akapansalita kay ansakit. Singa si Pablo, agmo komon susukoan so sarilim. Itultuloy mo labat so mansagpot pian nauman moy panagnonot mo tan say ugalim. (Roma 12:1, 2; Efe. 4:24) Nia so tandaan tayo: Say espiritual ya kawes ya nanlapud si Jehova et aliwan singa literal ya kawes ya sarag tayon ipauman so sukat to pian ondugad sikatayo. Pian naisulong tayo so espiritual ya kawes, sikatayo dapat so manguman.

SINGA SI DAVID, MANSIANSIA KAD ESPIRITUAL YA AYAMAN TAYO

14-15. Panon ya mangitatarya si Jehova na espiritual ya ayaman parad saray lingkor to? (Salmo 27:5) (Nengnengen met so litrato.)

¹⁴ Pian nalikna tayoy tuan liket, aliwan espiritual ya naakan tan espiritual ya kawes labat so kaukolan tayo. Kaukolan tayo met so espiritual ya ayaman. Anto itan? Tan antoy gawaen tayo pian mansiansia tayo ed satan ya espiritual ya ayaman?

¹⁵ Kombinsido si Arin David ya mangitarya si Jehova na espiritual ya ayaman ya manprotekta ed saray lingkor To. (Basaen so Salmo 27:5.) Panon ya proprotektaan nen Jehova iray lingkor to? Insipan to ya anggan anto ni tay armas ya gawaen na saray kalaban, agda tayo napatunda ya mandayew ed sikato. (Sal. 34:7; Isa. 54:17) Tua, makapanyari si Satanas tan saray demonyo to, pati saray alipores da. Pero agda nataloy Aman Jehova, ta sikato so Makapanyarin-amin! Anggano pateyen da tayo ni ingen, sarasarag to tayon paolien nen Jehova! (1 Cor. 15:55-57; Apo. 21:3, 4) No maminsan balet, no agtayo manalwar, say manderal na relasyon tayod si Jehova et saray kapagaan tayod bilay. Pero insipan met nen Jehova ya tulongan to tayon nasarag iratan. (Pro. 12:25; Mat. 6:27-29) Uusaren to ray agagi ya ontulong ed sikatayo. Wadtan met iray elder ya akaparaan ya mamaseseg ed sikatayo no mapagpaga tayo. (Isa. 32:1, 2) Diad saray pantitipon tayo, napapanonotan tayo met no anto ray nepeg tayon gawaen pian agtayo makapaway ed espiritual ya ayaman ya intarya nen Aman Jehova.—Heb. 10:24, 25.

16. Panon ya prinotektaan nen Jehova si David?

¹⁶ Panon ya prinotektaan nen Jehova si David? Kada no uunoren nen David si Jehova, igigiya To, kanian duga iray desisyon to. (Ikompara so Proverbio 5:1, 2.) Diad kabaliktaran balet, nen agto inunor so Dios, inani to iray aliwliwan resulta na makapuy ya desisyon to. Ag-impaliis nen Jehova ed saratan. (2 Sam. 12:9, 10) Pero wala met iramay panaon ya nanirap si David anggano anggapoy ginawa ton kasalanan. Diad saratan ya panaon, panon ya prinotektaan nen Jehova si David? Kada no ibaga nen David ed si Jehova so amin ya nalilikna to, liligliwaen toy David, tan papaseguroan to ya inar-aro ton maong tan agton balot paulyanan.—Sal. 23:1-6.

17. Panon tayon naalig si David?

¹⁷ Naalig tayoy David no manpaigiya tayo met ed si Jehova no mandedesisyon tayo. Tandaan tayo met ya no agtayo unoren si Jehova tan lapud satan et aliway nansumpalan na desisyon tayo, agto tayo ipaliis ed saray makapuy ya resulta to ’tan. (Gal. 6:7, 8) Panon to balet no maniirap tayo anggano anggapoy ginawa tayon kasalanan? Ibaga tayo labat ed si Jehova so amin ya nalilikna tayo. No onasingger tayod sikato, ipapaseguro to ya bantayan toy nonot tan puso tayo.—Fil. 4:6, 7.

AGMON BALOT PAPAULYANAN SO ESPIRITUAL YA PANKAUKOLAN MO

18. Akin et dugaruga ed panaon tayo so teksto ed taon 2026, tan antoy gawaen tayo pian agtayo napaulyanan so espiritual ya pankaukolan tayo? (Nengnengen met so litrato.)

¹⁸ Oniay nabasa ed teksto ed taon 2026: “Maliket iray manonot ed espiritual a pankaukolan da.” Dugaruga itan ya teksto diad panaon tayo. Akin ey? On ta apaliberan tayo na saray totoon agda bibidbiren ya walay espiritual ya pankaukolan da. Say arum, manisia iran walay espiritual ya pankaukolan da pero ipilit day paraan ya labay da ed pandayew dad Dios. Wala met iray arum ya unor-unor labat ed ibabaga na kapara dan too. Aliwan maliket iray ontan ya totoo. Agtayo ra aaligen! Itultuloy tayo sirin so mangan na espiritual ya naakan ya itatarya nen Jehova, seguroen tayo ya akasulong ed sikatayo so balon personalidad, tan mansiansia tayo ed espiritual ya ayaman ya manproprotekta ed sikatayo.