Sarag Mon Labanan so Negatibon Liknaan Mo

1-2. Antoy nalilikna nen apostol Pablo no maminsan, tan akin et natatalosan tayoy situasyon to? (Roma 7:21-24)

NO NAPANTONGTONGAY apostol Pablo, anton tampol so naisip mo? Seguro say naisip mo, amay makpel ya impanpulong to bilang misionero, amay marundunong ya panagbangat to, tan amay impangisulat to na dakel ya libro ed Biblia. Duga met iratan ya amin. Pero diad tua, too met labat si Pablo ya singa sikatayo. Anggano dakel so agawaan to parad si Jehova, wala met iray negatibon liknaan to ya nilabanan to.

² Basaen so Roma 7:21-24. Nen sinulatan nen Pablo iray Kristiano ed Roma, asalita tod sikara ya naeermenan tan nadidismaya ed sarili to. Anggano matoor ya Kristiano si Pablo tan labalabay ton gawaen so panlabayan nen Jehova, inamin to ya no maminsan et wala ray mauges ya pilalek to. Pero aliwan satan labat. Pawilpawil met so pakakakonsiensia to lapud saray agawaan to antis ya nagmaliw ya Kristiano. Tan nanairapan met lapud walay problema to ya agnaeka-ekal. Seguradon natatalosan tayoy situasyon nen Pablo, ta aratan ya alikna to et nalilikna ti met natan.

3. Antoy pantongtongan tayo ed sayan artikulo? (Nengnengen met so “Kabaliksan na Salita.”)

³ Anggano walay negatibon liknaana nen Pablo, aga pinmayag ya atan so mankontrol ed bilay to. Tuloytuloy ton nilabanan itan! Pantongtongan tayod sayan artikulo irayan tepet: Anto ray rason akin et “pakaskasi” so pakanengneng nen Pablo ed sarili to? Anto ray ginawa to pian nalabanan toy negatibon liknaan to? Tan anto met so gawaen tayo pian nalabanan tayoy negatibon liknaan tayo?

ANTO RAY RASON AKIN ET WALA RAY NEGATIBON ALIKNA NEN PABLO?

4. Antoy sakey ya rason akin et wala ray negatibon liknaan nen Pablo?

⁴ Saray agawaan to diad apalabas. Antis ya nagmaliw ya Kristiano si Pablo, dakel so ginawa to ya nagbabawian to lanlamang. Singa bilang, sinuportaan toy impamatey ed si Esteban tan wadman labat ya mamatbantay nen tinuttupak na saray kalaban. (Gawa 7:58; 8:1) Tan sinmabi panaon, sikato lan mismo so angidaulo ed graben impamairap ed saray Kristiano.—Gawa 8:3; 26:9-11.

5. Antoy nalilikna nen Pablo kada no nanonotan to iray ginawgawa to diad apalabas?

⁵ Nen nagmaliw lan Kristiano si Pablo, sankanonot to nin siansia iray ginawgawa tod apalabas. Tan diad tua, no diman mas ombabayag ya Kristiano, nayarin diman met mas lalon nakokonsiensia. Panon tayon amta? Diad samay unonan sulat to ed saray agagid Corinto nen manga 55 C.E., oniay kuan to: “Agak manepeg a tawagen ya apostol, lapud pinasegsegang koy kongregasyon na Dios.” (1 Cor. 15:9) Insan kayari na limaran taon, diad sulat tod saray taga Efeso, imbaga to ya sikato so “sankaabebaan ed amin a masanto.” (Efe. 3:8) Tan nen sinulatan toy Timoteo, mapatnag ya sankanonot to ni apalabas ta oniay imbaga to: “Nensaman et sakey ak a managmudmora ed Dios tan managpairap tan agmangikabkabilangan.” (1 Tim. 1:13) Imadyin mo pay nalilikna nen Pablo kada no ombisita ed saray kongregasyon tan nanengneng to iray agagin pinairap to tan saray kapamilya da.

6. Anto ni sakey ya amairap ed si Pablo? (Nengnengen met so paimanod leksab.)

⁶ Sakey a sabit ed laman. Wala ni sakey ya panlalapuan na negatibon liknaan nen Pablo. Inkompara to itan ed “sakey a sabit ed laman.” (2 Cor. 12:7) Agto met la binitla no anto itan, pero nayarin ontutukoy itan ed sakit o arum nin problema ya mamapairap ed sikato.b

7. Antoy epektod si Pablo na saray kakapuyan to? (Roma 7:18, 19)

⁷ Saray kakapuyan to. Inamin nen Pablo ya anggano labalabay ton gawaen so duga, makmaksil kunoy guyor na makalaman ya pilalek to. (Basaen so Roma 7:18, 19.) Amay labay to kunon gawaen, agto nagagawaan. Amay agto balet nepeg ya gawaen, aman laingen so gagawaen to. Pansasagpotan met nen Pablo ya labanan iray kakapuyan to, pero wala ray panaon ya pawilpawil nin siansia iratan. (1 Cor. 9:27) Seguradon makapadismaya itan ed si Pablo!

ANTO RAY GINAWA NEN PABLO PIAN NALABANAN TOY NEGATIBON LIKNAAN TO?

8. Anto ray ginawa nen Pablo pian nalabanan to ray kakapuyan to, tan panon tayon amta ya ontay ginawa to?

⁸ Pian nalabanan nen Pablo iray kakapuyan to, inaral toy sarili to tan inamta to no anto ray kakapuyan to. Nananap met na saray prinsipyo ed Kasulatan ya onaplikad situasyon to, tan nanggawa na pananguman pian niyaplika to iratan. Panon tayon amta ya ontay ginawa to? No imanoen tayo iray sulat nen Pablo, lanang ton bibitlaen ya balbaleg so nitulong na masanton espiritu na Dios pian nalabanan na sakey ya Kristiano iray mauges ya pilalek to. (Roma 8:13; Gal. 5:16, 17) Diad arum ya sulat to ingen, inlista to iray mauges ya pilalek tan kagagawa, tan binilin to iray Kristiano ya nepeg dan labanan iratan. (Gal. 5:19-21, 26) Agto itan naibaga no aliwan ontan ya mismoy ginawa to! Kanian no wala ray nabasa tayon bilin ed saray sulat nen Pablo, makaseguro tayon inyaplika ton mismo iratan.

9-10. Anto ray akatulong ed si Pablo pian nalabanan to ray negatibon liknaan to? (Efeso 1:7) (Nengnengen met so litrato.)

⁹ Anggano wala ray pakakadismayaan nen Pablo, nampokus la ed saray positibo. Singa bilang, malikeliket no makakaawat na makapaseseg iran balita ed nanduruman kongregasyon. (2 Cor. 7:6, 7) Malikeliket met ta wala ray matoor ya kakaaro to. (2 Tim. 1:4) Say sakey met ya mamapaliket ed sikato et amay amta ton napapaliket toy Jehova. Balibali liknaan to ta makakapanlingkor ed Dios “a walaay malinis a konsiensia.” (2 Tim. 1:3) Diad tua, anggano akapriso lad Roma, pinaseseg to nin siansia iray agagi ya ‘manliket iran naynay ed Katawan.’ (Fil. 4:4) No nampadaeg si Pablo ed saray negatibon liknaan to, agto itan naibaga. On, kada no nalikas nen Pablo ya man-nenegatibo la, maniisip na positibo pian nasalatan imay negatibon nalilikna to.

¹⁰ Say sakey met ya akatulong ed si Pablo pian nalabanan toy negatibon liknaan to et say impandalepdep to ed dondon. Sankanonot ton lanang ya say dondon et personal ya regalo nen Jehova ed sikato. (Gal. 2:20; basaen so Efeso 1:7.) On, matalek si Pablo ya sikatoy perdonaen nen Jehova lapud dondon bagat nen Jesu-Kristo. (Roma 7:24, 25) Kanian anggano wala ray agawaan ton lingo tan wala ray lalabanan ton kakapuyan, nansiansian maliket ed panaglingkor tod Dios.—Heb. 9:12-14.

11. Akin et napapaseseg tayod alimbawa nen Pablo?

¹¹ Singa si Pablo, kasin wala met iray lalabanan mon negatibon liknaan tan kakapuyan? Singa bilang, anggan anto lay pansasagpot mo ya gawaen so duga, ompan wala ni ran siansiay iisipen, gagawaen, o ibabagam ya agmakapaliket ed si Jehova. No ontay nagawa, ompan nadismaya kan maong tan nibagam met may imbaga nen Pablo ya, “Pakaskasi ak lan too!” Oniay imbaga nen Sister Elizac ya 26 so taon to tan walay lalabanan ton negatibon liknaan: “No iisipen koy alimbawa nen Pablo, napapaseseg ak. Maong labat ta impaisulat nen Jehova ed Biblia so alimbawa to. Agko manaya bukbukor so makakaliknay onia. Talagan amta nen Jehova so dadalanen na saray lingkor to.” Panon tayon naalig si Pablo? Antoy gawaen tayo pian nawalaan tayoy malinis ya konsiensia tan maliket tayo anggano wala ray negatibon liknaan tayo?

ANTO RAY GAWAEN MO PIAN NALABANAN MO RAY NEGATIBON LIKNAAN MO?

12. Pian nalabanan tayoy negatibon liknaan tayo, anto dapat so agtayo papaulyanan? Mangiter na ilustrasyon.

¹² Agmo papaulyanan so espiritual ya rotinam. Baleg so nitulong to itan pian makapanpokus ka ed positibo. Say espiritual ya rotina tayo et sarag tayon ikompara ed saray gagawaen tayo pian mansiansian maksil so laman tayo. Singa bilang, no mangan tayoy masustansia, regular tayon man-exercise, tan sustoy ugip tayo, balibali liknaan tayo. Mipadpara, no regular tayo met ya manbasa na Biblia, manparaan parad saray aral, mankomento, tan manpulong, balibali epekto to ’tan ed sikatayo lapud mas onapit tayod si Jehova. On, aratan so panlaban ed negatibon liknaan!—Roma 12:11, 12.

13-14. Antoy epektod saray agagi tayo nen agda pinaulyanan so espiritual ya rotina da?

¹³ Imanoen tayo so alimbawa nen John. Nen 39 so taon to, a-diagnose ya walay cancer to. Nen naamtaan to kuno ’tan, abupburido tan natatakot ya maong. Agmakapanisia ya mansakit na grabe ta ugaw ni. Tan diad saman, taloy taon ni labat na anak to. Antoy akatulong ed si John pian nalabanan to ray negatibon liknaan to? Kuan to: “Anggano makapkapuy so laman ko tan lanang ak ya naksawan, sinegurok ya agnapaulyanan na pamilya mi so espiritual ya rotina mi. Lanang kamin mimiaral, sinimba kamin manpupulong, tan regular so family worship mi, anggan no maminsan et mairap itan ya iyeskedyul.” No pawilen kuno nen John iman ya panaon, oniay nibaga to: “No walay subok ya biglan onsabi, natural labat so ontakot tan manaburido. Pero, apaneknekan kon mismo ya no ontan lay nagawa, si Jehova so mamabiskeg na liknaan tayo tan ipalikna ton inar-aro to tayo. Pinabiskeg to ak, kanian seguradon pabiskegen to ka met.”

¹⁴ Onia met so imbaga nen Eliza ya abitla nen niman: “Kada no mimiaral tan manpe-personal study ak, napapanonotan ak ya talagan dedengelen tan inar-aro ak nen Jehova. Atan so mamapaliket ed siak.” Imanoen met so alimbawa nen Nolan, sakey ya manangasikaso na sirkito ed Africa. Wala ra kunoy panaon ya nadidismaya met ira na asawa ton si Diane. Pero oniay imbaga nen Nolan: “Anggano ontay nalilikna mi, agmin balot papaulyanan so espiritual ya rotina mi. Kada kayari min manpikasi, man-personal study, miaral, tan manpulong, nasasalatan la na liket so pakakadismaya mi. Sankanonot mi met ya wadtan ya lanang si Jehova ya ontulong tan mamendisyon ed sikami. Agmi amta no antoy eksakton tulong tan bendisyon ya iter to. Pero segurado kami ya iter ton iter itan!”

15. Anto ni gawaen tayo pian nalabanan tayo ray negatibon liknaan tayo? Mangiter na ilustrasyon.

¹⁵ No pawilpawil iray negatibon liknaan tayo, ompan wala ni ray kaukolan tayon gawaen pian nalabanan tayo iratan. Singa onia ’tan ay: No pawilpawil so sakit na beneg mo, ompan aliwan masahe labat so kaukolan mo pian naekal itan. Dapat mon amtaen no akin ya onsasakit so beneg mo. Man-research ka, tan ompan kaukolan mo ni ingey manpa-check up ed doktor. Mipadpara, no pawilpawil so negatibon liknaan mo, nepeg mon amtaen no akin ya ontay naliliknam. Man-research ka ed Biblia tan ed saray publikasyon tayo. Makatulong met no ibagam itan ya naliliknam ed maespiritual ya agi ya makapangiter ed sika na simbawa. Anto ni arum ya makatulong?

16. Antoy gawaen mo pian natalosan mo no antoy panlalapuan na negatibon liknaan mo? (Salmo 139:1-4, 23, 24)

¹⁶ Ipikasim ed si Jehova ya tulongan to kan natalosan moy sarilim. Ontay ginawa nen Arin David. Amta to ya diad interon uniberso, si Jehova so talagan makapikabat ed sikato. Kanian impikasi to ya tulongan komon nen Jehova pian naamtaan to no antoy panlalapuan na panaaburido to. (Basaen so Salmo 139:1-4, 23, 24.) Ontan met sirin so gawaen mo. Patulongan kad si Jehova pian naamtaan mo no antoy panlalapuan na negatibon liknaan mo tan no antoy gawaen mo pian nalabanan mo itan. Tepetan mo met so sarilim, ‘Anton talagay rason akin et abupburido ak? Anto ray situasyon ya bigla ak labat ya man-negatibo? No walay negatibo ya onsebang ed isip ko, kasin lalabanan ko itan, o atan lay kapanonot ko?’

17. Anto ran topic so i-personal study’m pian nasalatan na positibo iray negatibon liknaan mo? (Nengnengen met so litrato.)

¹⁷ I-personal study’m iray topic ya dugarugad situasyon mo. Singa bilang, aral mo iray espisipikon kualidad o ugali nen Jehova. Ontay ginawa nen Pablo. Dinalepdep toy panamerdona tan kabaleg na panangaro nen Jehova diad impangiter Toy dondon. Marakep no ontan met so gawaen mo. Usar moy Giya ed Pan-research na Saray Tasi nen Jehova, Manpaigiya ed Saray Prinsipyo na Biblia, o man-research kad jw.org pian naromog mo iray artikulo ed publikasyon tayo nipaakar ed panangasi, panamerdona, tan matoor ya panangaro nen Jehova. No wala ray nalmom ya artikulo ya dugarugad situasyon mo, basam tan ilistam. Iyan mo itan ya listaan ed pasen ya lanang mon nanengneng. No nalikas mon man-nenegatibo ka la, basam tan aral mo lamet iratan ya artikulo. Legan kan manbabasa, isip mo no panon iratan ya onaplika ed situasyon mo.—Fil. 4:8.

18. Antoy im-personal study na arum ya agagi?

¹⁸ Si Eliza ya abitla nen niman et im-personal study to kuno so istoryay bilay nen Job. Kuan to: “Parehon-pareho so situasyon ko ed si Job. Nantutumbokan so subok ya dinalan to. Pero say makapabilib ed si Job, anggano pakaskasi situasyon to tan agto amtay rason no akin ya maniirap, aga nakal so tiwala tod si Jehova.” (Job 42:1-6) Onia met so imbaga nen Diane, ya abitla nen niman: “Aaralen mi nen asawak so libron Onapit ed si Jehova. Alabayan mi may punto ya singa tayo pitek ya momoldien nen Jehova. Labalabay to tayon moldien pian magmaliw tayon mas maong ya too. Kanian kada no nadidismaya kamid sarili mi, say iisipen mi la et, ‘Wala amoy ibabangat nen Jehova ed sikata.’ Lapud satan, lalo kamin onaapit ed sikato.”—Isa. 64:8.

TALARANAN MOY PANAON YA AGKA LAN BALOT MAN-NEGATIBO

19. Anto nin siansiay nalikna tayo no maminsan, pero antoy naseguro tayo?

¹⁹ Anggano walay espiritual ya rotinam tan lanang ka met ya manpe-personal study, agto labay ya ibagan aglan balot ompawil iray negatibon liknaan mo. Ompan wala ni ran siansiay agew ya pakaskasi so pakanengneng mod sarilim. Pero makaseguro ka ya tulongan ka nen Jehova pian nalabanan mo iray negatibon liknaan mo. Kanian mas dakel so agew ya maliket ka ta antam ya malinis so konsiensiam tan naliliketan si Jehova ed panlilingkor mo.

20. Antoy desididom ya gawaen?

²⁰ On, amin tayo et nayarin makaliknay negatibo lapud saray agawaan tayod apalabas, saray dadalanen tayon problema, tan saray kakapuyan tayo. Pero komon ta desidido kan labanan iratan ya negatibon liknaan. Tandaan mo ya diad tulong nen Jehova, sarag mon kontrolen so liknaan mo. (Sal. 143:10) Imadyin moy bilay diad balon mundo, ya ditan et anggapo lan balot so negatibon liknaan. Kada kabangon moy kabuasan, maliwliwaway nonot mo tan malikeliket kan manlingkor ed maar-aron Dios tayo, si Jehova!