Akin et Kakkaukolan Tayo so Dondon?

1-2. Akin et kakkaukolan tayoy mangisalba ed sikatayo? Mangiter na ilustrasyon. (Roma 7:22-24) (Nengnengen met so litrato.)

IMADYIN mo pa so sakey ya too ya walad dalem na ageban bilding. Pinmata ed sikato iray geray kanian agmakagalaw. Tua mabilay ni, pero anggapoy nagawaan to. Oneeyag kalamor pian walay makarengel tan mangisalba ed sikato. No anggapoy man-rescue, diman la ompatey!

² Amin tayo et singa satan ya too. Akin ey? Nen nanrebelde ed si Jehova si Adan, nagmaliw ya makasalanan. Impatawir tod sikatayo ran ananak to so kasalanan. Singa samay too ya atapilan na geray, agtayo naisalbay sarili tayo ed epekto na kasalanan. Talagan pakaskasi so situasyon tayo, ya singa indanet nen apostol Pablo nen sinulatan to ray Kristiano ed Roma. (Basaen so Roma 7:22-24.) Amta nen Pablo ya no anggapoy mangisalba ed sikato ed epekto na atawir ton kasalanan, patey so pansumpalan to. (Roma 6:23) Anggapoy pidumaan tayo ed kipapasen to. Kakkaukolan tayoy mangisalba ed sikatayo!

3. Diad anto ran paraan ya nisalba itayo na dondon?

³ Anggano imbaga nen Pablo ya pakaskasi so situasyon tayo, walay binitla ton mangiter ed sikatayo na ilalo. Kayari ton intepet ya, “Siopa so mangisalba ed siak?” inebatan to lanlamang so tepet to. Kuan to: “Salamat ed Dios diad panamegley nen Jesu-Kristo a Katawan tayo!” (Roma 7:25) Say tutukoyen dia nen Pablo et say dondon bagat nen Jesus.a Atan so mangisalba ed sikatayo, ta lapud satan et (1) naperdona iray kasalanan tayo, (2) onabig tayo ed makasalanan a kipapasen tayo, tan (3) makapikareenan tayo ed si Jehova. Legan tayon aaralen iratan ed sayan artikulo, lalo tayon naar-aro si Jehova, “say Dios a mangiiter na ilalo.” (Roma 15:13) Lalo tayo met ya naapresya si Jesus—“a diad panamegley to et nibulos itayo lapud dondon.”—Col. 1:14.

KAKKAUKOLAN TAYOY DONDON PIAN NAPERDONA IRAY KASALANAN TAYO

4-5. Akin et kaukolan tayon amin so dondon? (Eclesiastes 7:20)

⁴ Kakkaukolan so dondon pian naperdona nen Jehova iray kasalanan tayo. Amin tayo et aliwan perpekto, kanian mankakasalanan tayon amin, balanglan diad ibabaga o gagawaen tayo. (Basaen so Eclesiastes 7:20.) Wala ray kasalanan ya talagan ambelat. Singa bilang, diad Mosaikon Ganggan, no say sakey et akikalugoran o akapatey, ambelat itan ya krimen kanian say dusa et patey. (Lev. 20:10; Num. 35:30, 31) Wala met iray kasalanan ya aliwan onman kaseryoso, pero kasalanan nin siansia. Singa bilang, oniay imbaga nen David: “Alwaran koy kagagawak pian napaliisan koy mankasalanan ed panamegley na dilak.” (Sal. 39:1) On, no maminsan, anggan diad saray ibabaga tayo labat et mankakasalanan tayo la.—Sant. 3:2.

⁵ Isip mo pa ray imbagam tan ginawam diad imbebeneg ya agew. Kasin wala ray imbagam ya no nayari et babawien mo? Kasin wala ray ginawam ya pagbabawian mo lanlamang? Seguradon say ebat tayon amin ed satan ya duaran tepet et on. Duga sirin iyan ibabaga na Biblia: “No ibaga tayon, ‘Anggapoy kasalanan tayo,’ papalikdoen tayoy sarili tayo tan anggapod sikatayo so katuaan.”—1 Juan 1:8.

6-7. Antoy basiyan nen Jehova akin et sarag to lan perdonaen iray kasalanan tayo? (Nengnengen met so litrato.)

⁶ Nen inter nen Jesus so bilay to bilang dondon, wala lay basiyan nen Jehova pian perdonaen iray kasalanan tayo. (Efe. 1:7) Pero labay to kasin ibaga, baliwala lad si Jehova iray kasalanan tayo lapud wala lay dondon? Andi. Diad tua, kabusol toy kasalanan. (Isa. 59:2) Lapud perpekto so hustisya to, ag-ompayag ya basta to labat perdonaen iray kasalanan tayo ya anggapoy rason. Sinegurado to ni ya talagan walay basiyan to pian naperdona to ray kasalanan tayo.

⁷ Diad Mosaikon Ganggan, kaukolan nin mangibagat iray Israelita na ayayep pian nasakbongan iray kasalanan da. (Lev. 4:27-31; 17:11) Isisimbolo na sarayan bagat so dondon bagat nen Jesus. Mas baleg so nagawaan to itan no ikomparad saray bagat ya ayayep. Say dondon bagat nen Jesus so mangiter na agnasabaan ya bendisyon ed totoo. Tan lapud satan, wala lay legal ya basiyan nen Jehova pian perdonaen iray kasalanan tayo. Indanet nen Pablo so kablian na dondon bagat nen Jesus nen sinulatan to iray Kristiano ed Corinto. Kayarin binitla nen Pablo iray datin mauges ya kagagawa ra, oniay imbaga tod sikara: “Naurasan tan alinisan kayo la; apasanto kayo la; niyabawag kayo lan matunong diad ngaran na Katawan tayon Jesu-Kristo tan diad panamegley na espiritu na Dios tayo.”—1 Cor. 6:9-11.

8. Antoy marakep ya dalepdepen mo diad saray nakekeran agew antis na Memoryal?

⁸ Diad saray nakekeran agew antis na Memoryal, marakep no dalepdepen moy panamerdona nen Jehova tan no antoy epekto to itan ed mismon bilay mo. Singa bilang, lapud dondon, agka la natan nakokonsiensia ed saray kasalanan ya agawaan mo nensaman ya nagbabawian mo la. Panon to balet no irap mon panisiaan ya aperdona ka la nen Jehova? Ompan irason mo, ‘Amtak pa ya mabulos ya mamerdona si Jehova, pero agko naperdonay sarilik.’ No ontay naliliknam, nia so tandaan mo: Si Jehova so walaan na autoridad ya mamerdona, tan si Jesus so inikdan toy responsabilidad ya mangukom. Agto inter ed sika o ed anggan siopan too so autoridad ya mandesisyon no siopay perdonaen to tan no kasin kanepegan mon awaten so panangasi to o andi. Insipan nen Jehova ya no manaakar ka ed liwawa, ‘nalinisan ka na dala nen Jesus ya Anak to ed amin a kasalanan.’ (1 Juan 1:6, 7) Atan so malinlinew ya ibabangat na Biblia. Kanian panisian mo itan, no panon ya papanisiaan mo iray arum nin katuaan ed Biblia. On, lapud dondon, wala lay legal ya basiyan nen Jehova pian perdonaen to ka. Diad tua, ibabaga na Biblia ya sikatoy ‘akaparaan ya mamerdona.’—Sal. 86:5.

KAKKAUKOLAN TAYOY DONDON PIAN ONABIG TAYOD MAKASALANAN YA KIPAPASEN TAYO

9. Diad Biblia, antoy tutukoyen na salitan “kasalanan”? (Salmo 51:5 tan paimanod leksab)

⁹ Diad Biblia, no nabitla so salitan “kasalanan,” aglabat itan ontutukoy ed saray aliwan gagawaen tayo, ontutukoy met itan ed makasalanan ya kipapasen tayo ya atawir tayo ed si Adan. Labay ton ibaga sirin, makasalanan tayo la manlapu la nen innginew itayo. (Basaen so Salmo 51:5 tan paimanod leksab.) Lapud makasalanan ya kipapasen tayo, makakapan-isip tan makakapanggawa tayoy aliwa. Tan lapud satan et mansasakit, ontatatken, tan ompapatey tayo. Atan so rason no akin ya wala ray kapangiyanak ya ugugaw ya mansasakit tan ompapatey ni ingen, anggano anggapo nin balot so agawaan dan kasalanan. Tan atan met so rason no akin ya anggan saray maong ya totoo et maniirap tan ompapatey met. On, basta anak ka nen Adan, makasalanan ka.

10. Antoy alikna nen Adan tan Eva nen nagmaliw la ran makasalanan?

¹⁰ Imadyin mo pay alikna nen Adan tan Eva nen nagmaliw iran makasalanan. Alikas dan tampol ya walay anguman ed sikara. Diad tua, inyamotan day Jehova ta pakalikna ra et singa ra kriminal, tan nanggawa ran tampol na isakbong dad laman da. (Gen. 3:7, 8) On, nen ag-inunor nen Adan tan Eva so ganggan na Dios—say ganggan ya “nisulat ed kapusoan da,” amta dad sarili da ya walay ginawa ran aliwa kanian akonsiensia ran maong. (Roma 2:15) Diman da alikna iray emosyon ya dati et agda met nalilikna—nakokonsiensia, natatakot, aburido ran maong, tan nababaingan ira. Agda la natakasan iratan ya emosyon anggad ipatey da.—Gen. 3:16-19.

11. Antoy epekto na kasalanan ed sikatayo ran totoo?

¹¹ Nalilikna tayon amin imay alikna nen Adan tan Eva. Lapud makasalanan tayo, agtayo naiwasan so nakonsiensia, ontakot, naaburido, tan ombaing. Ibabaga na Biblia ya manlapu nen nankasalanan si Adan tan Eva, sikatayo ran totoo et “nipasakop ed kaapaan.” Labay ton ibaga, anggan panon lay pansasagpot na too pian ondakep so bilay to, “kaapaan” o andi-kakanaan labat iratan. (Roma 8:20) On, limitado labat so nagawaan na kada too o saray organisasyon na totoo. Atan so rason no akin ya aga nasosolusyonan na totoo iray problemad mundo. Singa bilang, anggano mansasagpot met so totoo pian naasikasoy kalikasan, nabawasay krimen, naekal so kairapan, tan napatunday gulo ed mundo, agda naeka-ekal iratan ya problema. Maong labat ta walay dondon, kanian naikdan na ilalo iray totoo. Anto ’tan ya ilalo?

12. Antoy balibalin ilalo tayo lapud dondon?

¹² Lapud dondon, walay balibalin ilalo tayo. Ibabaga na Biblia ya diad arapen, “saray pinalsa et nibulos . . . manlapud impakaaripen ed kabubulok.” (Roma 8:21) No magmaliw tayo lan perpekto diad balon mundo, agti lan balot mansakit tan makaliknay ermen. Agtayo met lan balot nakonsiensia, ombaing, tan naaburido. Aliwan satan labat. Nasolusyonan met lay amin ya problema ed mundo tan manbilay tayo lan mareen, ta diad satan ya panaon et uleyan tan tulongan itayo na samay mismon nambayar na dondon, say “Prinsipe na Kareenan,” si Jesu-Kristo.—Isa. 9:6, 7.

13. Anto ni marakep ya dalepdepen mo diad saray nakekeran agew antis na Memoryal?

¹³ No inmabig tayo la ed makasalanan ya kipapasen tayo, imadyin mo pay epekto to ed mismon bilay mo. Kada kabangon moy kabuasan, malikeliket ka tan balibali liknaan mo! Agmo la panaburidoan no antoy pambilay yo, tan agmo la pampagaan ya ompan walay mansakit o ompatey ed pamilya yo. Anggano agni itan agawa, natan ni labat et onligen lay liknaan mo no dalepdepen mo itan ya ilalo. Atan so “angkla na kamarerwa tayo, a segurado tan malet.” (Heb. 6:18, 19) No akapelag so angkla na barko, aga niyanor-anor anggano maksil so daluyon. Ontan met ed sikatayo ran Kristiano. Say ilalo tayo so pinagka-angkla tayo. No sankanonot moy ilalo tayo, ombiskeg so pananisiam tan nasarag moy anggan anton problema ya dadalanen mo. On, makaseguro ka ya bendisyonan ka nen Jehova diad arapen. (Heb. 11:6) Maong labat ta walay dondon! Lapud satan, natan ni labat et maligen lay liknaan tayo, tan diad arapen et walay balibalin bilay ya manatalaran ed sikatayo.

KAKKAUKOLAN TAYOY DONDON PIAN MAKAPIKAREENAN TAYO ED SI JEHOVA

14. Antoy epekto na kasalanan ed relasyon tayo ed si Jehova, tan akin?

¹⁴ Manlapu la nen nankasalanan si Adan tan Eva, apultot so maong ya relasyon na too ed Dios. Ibabaga ingen na Biblia ya “nisian” o niyarawi tayon maong ed Dios. (Col. 1:21; Roma 8:7, 8) Akin ey? Oniay ibabaga na Biblia nipaakar ed si Jehova: “Malinlinis iray matam pian onnengneng ed mauges, tan agmo abuloyan so kaugsan.” (Hab. 1:13) Lapud perpekto si Jehova, kabusol toy kasalanan tan agton balot konsintien itan. Asakisakitan so liknaan to nen nankasalanan so too. Kanian manlapu lad saman, aderal so relasyon na totoo ed Dios. Anggad ag-itan naapiger, agtayo makaasingger ed si Jehova tan agtayo makapikaaro ed sikato. Say dondon so angapiger ed satan ya deral, kanian sarag tayo lamet so nawalaan na maapit ya relasyon ed sikato.

15. Panon ya nagmaliw ya “paraan na pikakareenan” so dondon, tan antoy nagmaliw ya posible lapud satan?

¹⁵ Ibabaga na Biblia ya si Jesus so “bagat a pipupulangan parad saray kasalanan tayo.” (1 Juan 2:2) Amay Griegon salita parad “bagat a pipupulangan” et nayari met ya ipatalos ya “paraan na pikakareenan.” Akin et natawag met ya “paraan na pikakareenan” so dondon bagat nen Jesus? On ta nen imbagat nen Jesus so bilay to, wala lay ambelat ya basiyan nen Jehova ya mikareenan ed totoo. (Roma 3:23-26) Diad tua, antis nin inatey si Jesus, wala la ray matoor ya totoo ya impasen nen Jehova ya kaaro to tan matunong ira diad pakanengneng to. (Gen. 15:1, 6) Akin et akaaro la nen Jehova irayan totoo anta agni abayaran so dondon? On ta segurado si Jehova ya talagan bayaran nen Jesus so dondon. (Isa. 46:10) Say dondon so rason no akin ya sarag la na too so makapikareenan tan mikaaro ed si Jehova.

16. Anto ni balibalin dalepdepen mo ed saray nakekeran agew antis na Memoryal? (Nengnengen met so litrato.)

¹⁶ Natan ta wala lay basiyan nen Jehova ya makapikareenan ed saray totoo, isip mo pa no antoy epekto to itan ed mismon bilay mo. Singa bilang, sarag mo lan tawagen si Jehova ya “Ama,” ya singa imbangat nen Jesus. (Mat. 6:9) Ompan no maminsan ingen, tatawagen mo met ya “Kaaro” si Jehova. Kada no tatawagen tayo si Jehova ya “Ama” o “Kaaro,” sankalikna tayo ya maap-apit tayo ed sikato. Tandaan tayo balet ya no usaren tayo iratan ya salita, komon ta ipatnag tayo nin siansia so kapaabebaan tan aralem ya respeto. Akin ey? On ta no diad sarili tayo labat, agtayo makaasingger ed si Jehova tan agtayo nakaaro. Bidbiren tayo ya si Jehova so nanggaway paraan pian niiter so dondon, tan say dondon so alenleneg ya rason no akin ya walaan itayo na maapit ya relasyon ed sikato. “Nagmaliw a posible iyan pikakareenan diad panamegley na dala [nen Jesus] a nipaagus diad panamairapan a poste.” (Col. 1:19, 20) Kanian anggano aliwa tayo nin perpekto, sarag tayo lan nakaaro si Jehova.

PAPANEKNEKAN NA DONDON YA MAKASIN DIOS SI JEHOVA

17. Panon ya papaneknekan na dondon ya talagan makasin Dios si Jehova? (Efeso 2:4, 5)

¹⁷ Papaneknekan na dondon ya “daakan so panangasi” nen Jehova. “Binilay to itayo . . . sanen inatey itayo lapud saray impakasumlang tayo.” (Basaen so Efeso 2:4, 5.) Singa samay ilustrasyon ed gapo, singa oneeyag iray “walaan na dugan kipapasen na puso parad bilay ya andi-anggaan” ta labay day patulongan. Amta ran ag-ira makablos ed kasalanan no anggapoy mangisalba ed sikara. (Gawa 13:48) Panon ya onreresponde si Jehova ed ikekerew day tulong? Seseguroen to ya makasabid sikara so maong a balita pian sikato tan say Anak to et nakabat da. (Juan 17:3) Nen akombinse nen Satanas si Adan tan Eva ya manrebelde ed Dios, seguro naisip to ya naamper to lay gagala na Dios. Pero alingo-lingo!

18. Legan tayon dadalepdepen so dondon, antoy agtayo lilingwanan?

¹⁸ Talagan balbaleg so agawaan na dondon parad sikatayo! Pero agtayo komon lilingwanan so manunan rason no akin ya intarya nen Jehova so dondon—pian naebatan may akusasyon nen Satanas diad hardin na Eden. (Gen. 3:1-5, 15) Lapud dondon, apasanto so ngaran nen Jehova tan alinisay reputasyon to. Say dondon met so inusar to pian nibulos to tayo manlapud kasalanan tan patey. Paneknek itan ya inar-aro to tayo. Tan lapud agnaparaan ya kaabigan nen Jehova, anggano makasalanan tayo ni, inikdan to tayo la na pribilehyon paneknekan ya matila si Satanas. (Pro. 27:11) Panon tayo sirin ya ipanengneng ya misatsalamat tayo ed dondon? Pantongtongan tayo itan diad ontumbok ya artikulo.