Panon Mon Nipanengneng ya Misatsalamat Ka ed Dondon?

1-2. Base ed 2 Corinto 5:14, 15, antoy epektod sikatayo no dalepdepen tayoy dondon bagat nen Jesus? (Nengnengen met so litrato.)

NO ATAPILAN kay geray na ageban bilding tan walay nan-rescue ed sika, antoy naliknam? Seguradon misatsalamat ka ed samay angisalba ed sika tan balbaleg so utang na loob mod sikato. No walay arum ya inligtas to, kasin isipen mo ya sikara lay akauley ya misalamat ed sikato? Andi! Manggawan-manggawa kay paraan pian personal mon napisalamatan imay nanligtas ed sika tan pian nipaliknam ed sikato ya agmon balot nalingwanan imay ginawa to.

² Singa apantongtongan ed imbeneg ya artikulo, agtayo nailigtas so sarili tayo ed epekto na atawir tayon kasalanan. Maong labat ta inter nen Jehova so Anak to bilang dondon! Lapud satan, (1) naperdona iray kasalanan tayo, (2) walay ilalo tayon onabig ed makasalanan ya kipapasen tayo, tan (3) makapikareenan tayod si Jehova. Tan lapud dondon, walay ilalo tayon manbilay na andi-anggaan diad balon mundo. Talagan inar-aro nen Jesus iray totoo, kanian mabulbulos ton inter so bilay to parad sikatayo. Diad tua, antis nin linma diad dalin, inar-aro to tayo la! (Pro. 8:30, 31) Antoy epekto to ’tan ed sikatayo? Oniay insulat nen apostol Pablo: “Say panangaro na Kristo so mamapakiwas ed sikami.” (Basaen so 2 Corinto 5:14, 15.) On, no dalepdepen tayoy kabaleg na panangaro nen Jesus ed sikatayo, napakiwas tayon balesen met itan pian nipanengneng tayon misatsalamat tayo ed ginawa to.

3. Akin et aliwan pareparehoy pangipanengneng tayoy pisasalamat ed dondon? Mangiter na ilustrasyon.

³ Antoy gawaen mo pian nipanengneng mon misatsalamat ka ed dondon? Say ebat mod satan ya tepet et nayarin duma ed iyebat na arum. Akin ey? Singa onia ’tan ay: Imadyin mo pay taloran too ya manbiahe paonlad sakey ya lugar, pero nandurumay panlapuan da. Anggano saksakey ya lugar so labay dan laen, nanduruman rota so dalanen da. Mipadpara, amin tayo et labay tayon ipanengneng so apresasyon tayod dondon. Pero nandurumay “dalanen” o paraan ya gawaen tayo depende ed “panlapuan” o kipapasen tayod espiritual. Diad sayan artikulo, amtaen tayo no antoy gawaen mo pian nipanengneng mon misatsalamat ka ed dondon no (1) sakey kan iyaaralan na Biblia, (2) bautismado ka la, tan (3) akaarawi ka ed kongregasyon.

NO SAKEY KAN IYAARALAN NA BIBLIA

4. Antoy nalilikna nen Jehova ed saray iyaaralan na Biblia?

⁴ No sakey kan Bible study, seguradon say rason no akin ya manpapaiyaral kay Biblia et lapud labay mon nakabat si Jehova tan labay mon naamtaan so katuaan. Paneknek itan ya sakey kad saray labay ya nakaaro nen Jehova. (Juan 6:44; Gawa 13:48) Ibabaga na Biblia ya “si Jehova so manguusisa ed kapusoan.” (Pro. 17:3) Naiimano toy pansasagpot mon onapit ed sikato, tan naliliketan ed saray gagawaen mon pananguman pian nagawaan moy panlabayan to. (Pro. 27:11) Legan mon nakakabat si Jehova, lalon onasingger so liknaan mod sikato. On, akaarom si Jehova lapud dondon. (Roma 5:10, 11) Agmo komon itan lilingwanan!

5. Panon ya niyaplika na saray iyaaralan na Biblia imay bilin ya walad Filipos 3:16?

⁵ Bilang sakey ya iyaaralan, panon mon ipanengneng ya misatsalamat kad dondon? Imanoen iyan bilin nen apostol Pablo ed saray Kristiano ed Filipos: “Antokaman so inaligwasan tayo la, mantultuloy tayo komon ya onabante diad saya lanlamang a dalan.” (Fil. 3:16) Oniay patalos na sakey ya bersion na Biblia ed sayan teksto: “Itultuloy tayo labat so manakar anggad makasabi tayo ed destinasyon tayo.” Panon mon niyaplika iyan bilin? Itultuloy mo labat so onaligwas ed espiritual, tan agka ompapayag ya walay mamatunda ed sika diad panaakar mo ed dalan na bilay.—Mat. 7:14; Luc. 9:62.

6. Antoy gawaen na saray iyaaralan na Biblia no walay bangat ya irap dan panisiaan o walay bisyo ya irap dan itunda? (Deuteronomio 30:11-14) (Nengnengen met so litrato.)

⁶ Panon to no walay bangat na Biblia ya irap mon panisiaan? Marakep no i-research mo itan ya topic, tan ipikasim ed si Jehova ya tulongan to kan natalosan mo itan. (Sal. 86:11) No agmo nin siansia natatalosan, sarag mon pawilen diad arum ya panaon. Pero ituloy mo labat so panaaral moy Biblia, ta diad ilabas na panaon, natalosan mo lanlamang. Panon to balet no nanairapan kan itunda so sakey ya bisyo o kagagawa ya aglabay nen Jehova? Tandaan mo ya agbalot ipagawa nen Jehova so agmo sarag ya gawaen. Labay ton ibaga sirin, no walay ingganggan to, sarag mo itan ya unoren. (Basaen so Deuteronomio 30:11-14.) Tan insipan to ya tulongan to ka. (Isa. 41:10, 13; 1 Cor. 10:13) Kanian agka komon onsusuko. Imbes ya isipen mon agmo sarag so ipapagawa nen Jehova, mas maabig no dalepdepen moy amin ya kamaongan tod sika, kaiba lay impangiter to na dondon. No atan so sankanonot mo, mas onaralem so panangarom ed si Jehova. Tan no naar-arom lay Jehova, diman mo nanengneng ya ‘aliwan makapabelat iray ganggan to.’—1 Juan 5:3.a

7. Antoy balibalin isipen na saray kabataan ya binmaleg ed pamilyan Tasi?

⁷ Sikayo ran kabataan ya iyaaralan na atateng yo, kasin nibagan inyasingger kayo met nen Jehova ed katuaan? On, ta diad tua, Bible study kayo met. Sikayo ingen so sankaimportantian ya Bible study na atateng yo! Say kuan na Biblia: “Onapit kayo ed Dios, tan sikatoy onapit ed sikayo.” (Sant. 4:8; 1 Awa. 28:9) No nanenengneng nen Jehova ya mansasagpot ka ya onapit ed sikato, iyapit to met so liknaan tod sika. Kanian agmo komon iisipen ya adamay ka labat ed pananisia na atateng mo. Sansakey itayon iyaasingger nen Jehova ed katuaan. Inyasingger to ka, aliwan lapud binmaleg ka ed pamilyan Tasi, noagta lapud labay to kan nakaaro. Tan antoy rason akin et akaarom si Jehova? Lapud dondon. Agmo komon itan lilingwanan. (Roma 5:1, 2) Kanian diad sarayay nakekeran agew antis na Memoryal, isip moy amin ya ginawa nen Jehova tan Jesus parad sika. Komon ta atan so mamakiwas ed sika ya pankimeyan iray goal mo ed espiritual. No ontay gawaen mo, ipapanengneng mon misatsalamat kad si Jehova ta inter toy dondon.b

NO BAUTISMADO KA LA

8. No say sakey et bautismado la, anto la ray ginawa to ya pakanengnengan ya talagan walay pananisia to ed dondon?

⁸ No bautismado ka la, seguradon dakel lay ginawam ya pakanengnengan ya talagan walay pananisiam ed dondon. Singa bilang, inuman moy kabibilay mo pian nakaarom tan napaliket moy Jehova. Uunoren mo met la imay ganggan nen Jesus ya manpulong tan manggaway disipulo. Indedikam lay sarilim ed si Jehova tan nampabautismo ka. Seguro wala ray kinmontra ed sika lapud pandadayew mod si Jehova. (2 Tim. 3:12) Pero pinilim nin siansia so manlingkor ed sikato lapud inar-arom tan misatsalamat ka ed dondon ya inter to.—Heb. 12:2, 3.

9. Antoy panalwaran na saray bautismadon Kristiano?

⁹ Anggano bautismado tayo la, kaukolan tayoy manalwar ta diad ilalabas na panaon, ompan kalkalnan nababawasan so panamabli tayod dondon. Ontan so agawa ed saray Kristiano ed Efeso nen inmunan siglo. Kinomendaan ira nen Jesus ta maanos ira tan ag-ira tinmundan nanlingkor anggano dakel so subok. Pero oniay imbaga tod kongregasyon diman: “Say nanenengneng kon kakulangan mo et pinaulyan mon naandi so panangaron walad sika diad gapo.” (Apo. 2:3, 4) On, ag-aliklikas na saray agagi ed Efeso ya binmetel la manayay panangaro dad si Jehova tan aliwa lan impapuso so panlilingkor da. No agtayo manalwar, ompan nagawa met itan ed sikatayo natan. Singa bilang, ompan manpipikasi, mimiaral, tan manpupulong tayo met. Pero ompan gagawaen tayo labat itan lapud atan lay apasalan tayo, aliwan lapud inaro tayoy Jehova. Antoy gawaen mo no nalikas mon aliwa lan singa dati so panangarom ed sikato?

10. Panon mon niyaplika imay bilin nen apostol Pablo ya nabasad 1 Timoteo 4:13, 15?

¹⁰ Binilin nen apostol Pablo si Timoteo ya kaukolan ton ‘nodnonoten’ tan ‘iyulo’ so panagdayew tod si Jehova. (Basaen so 1 Timoteo 4:13, 15.) Panon mo met ya niyaplika itan ya bilin? Manisip kay paraan no panon mo nin napaaligwas so panagdayew mod si Jehova tan no anto ray gawaen mo pian mansiansia kan maseseg o “marlang ed espiritu.” (Roma 12:11) Singa bilang, pian mas minabang kad aral, marakep no iparaan mon maong so aralen. Tan no manpe-personal study ka, segurom ya anggapoy makaisturbo pian talagan makapandalepdep ka. No gawaen mo iratan, lalom ya napabli so amin ya kamaongan nen Jehova ed sika, kaiba lay dondon. Say panamabli tayo ed dondon et singa apoy. No agtayo sungloran, kalkalnan onkuyep. Kanian manggawa tayoy paraan pian nasungloran itan. Diad sarayay nakekeran agew antis na Memoryal, anto kasi no dalepdep moy amin ya naawat mon bendisyon manlapu la nen nagmaliw kan Tasi? No dalepdepen mo iratan, seguradon lalom ya napabli so dondon—say rason no akin ya akaarom si Jehova.

11-12. No onkakapuy so seseg mod panaglingkor, labay to kasin ibaga et anggapo lad sika so pabor na Dios? Ipaliwawa. (Nengnengen met so litrato.)

¹¹ Kasin no maminsan et onkakapuy so seseg mod panaglingkor? Labay to kasin ibaga, anggapo lad sika so pabor nen Jehova? Andi met. Diad tua, alikna met itan nen Pablo. Inamin to ya no maminsan et natatabangan met ed ministeryo. Pero oniay insulat tod saray agagi ed Corinto: “Anggano napipilitan ak a gawaen iya, wala nin siansiay inmatalek ed siak a responsabilidad.” (1 Cor. 9:17) Antoy naaralan tayod sayan imbaga to?

¹² Wala ray panaon ya singa aglabay nen Pablo so manpulong. Pero say marakep ed sikato, anggano ontay nalilikna to, desidido nin siansia ya sumpalen so responsabilidad ya inter ed sikato nen Jehova. Aligen tayoy Pablo. Komon ta desidido tayo met ya gawaen no antoy duga, anggano singa natatabangan tayo. No bilang ta ontan so naliliknam, ipikasim ed si Jehova ya ikdan to kay “panlabay tan pakayarin onkiwas.” (Fil. 2:13) Ituloy mo labat so espiritual ya rotinam. No mansiansia kan aktibo ed espiritual, seguradon naliknam lamet imay inmunan panangarom ed si Jehova.

13. Panon tayon nausisa so sarili tayo no kasin ‘wala tayo ed pananisia’?

¹³ Maabig no itultuloy tayon usisaen so sarili tayo, ya singa nabasad 2 Corinto 13:5: “Itultuloy yon suboken no kasin wala kayo ed pananisia; itultuloy yon paneknekan no anto kayo.” Panon mon gawaen itan? Tepetan moy sarilim: ‘Talaga kasin iyuunak ed bilay ko so Panarian?’ (Mat. 6:33) ‘Kasin nanengneng ed saray pipilien kon libangan ya kabusol koy kaugsan?’ (Sal. 97:10) ‘Kasin napatnagan ed saray ibabagak tan gagawaen ko ya labay kon mansiansia so deen tan pankakasakey ed kongregasyon?’ (Efe. 4:2, 3) Diad sarayay nakekeran agew antis na Memoryal, samboten tayon usisaen so sarili tayo. No dalepdepen tayoy dondon, napakiwas tayon manbilay parad si Kristo, aliwan parad sarili tayo.c

NO AKAARAWI KA ED KONGREGASYON

14. Anto ray rason akin et wala ray agagin akaarawi ed kongregasyon?

¹⁴ Wala ray agagi ya abaybayag iran aktibo ed panaglingkor. Pero sinmabi panaon, akatunda ra tan agla ra makakapiaral. Say arum et akatunda lapud “saray kapagaan ed bilay.” (Luc. 21:34) Wala met iray agapol ed imbaga o ginawa na sakey ya agi. (Sant. 3:2) Say arum et akagaway seryoson lingo tan nababaingan iran manpatulong ed saray elder. Kasin sakey ka ed saray akaarawi ed kongregasyon? Anto sirin so gawaen mo? Tan panon mon nipanengneng ya misatsalamat ka ed dondon?

15. Panon tayon amta ya imamalasakit nin siansia nen Jehova iray akaarawin lingkor to? (Ezequiel 34:11, 12, 16)

¹⁵ Maabig no dalepdep mo no antoy nalilikna nen Jehova ed saray lingkor ton akaarawi. Kasin anggapo lay pibabali tod sikara tan nilingwanan to la ra? Andi. Diad kabaliktaran ingen, aanapen to ra ta singa ra abalang ya karnero. Papakanen to ni ran siansia, tan tutulongan to ra pian makapawil irad sikato. (Basaen so Ezequiel 34:11, 12, 16.) On, tandaan mo ya anggano akaarawi ka, imamalasakit ka nin siansia nen Jehova. Tan diad tua, amay pambabasam ed sayan artikulo et paneknek ya sankanonot mo nin siansiay Jehova. Di ba, inyasingger ka nen Jehova ed katuaan ta anengneng toy kamaongan ya walad pusom? Nanenengneng nin siansia itan nen Jehova anggad natan, kanian seguradon iyasingger to ka lamet.

16. Antoy makatulong pian makapawil ed si Jehova iramay akaarawi ed kongregasyon? (Nengnengen met so litrato.)

¹⁶ No akaarawi ka ed kongregasyon, isip mo iyan makapaseseg ya mensahe ya walad brosyur ya Pawil Ka Lad si Jehova: “Tandaan mo ya agka paulyanan nen Jehova diad ipawil mo ed sikato. Tulongan to kan nasarag so kapagaan mo, naekal so sakit na liknaan mo, tan nawalaan kay mareen ya nonot tan puso lapud malinis lay konsiensiam. Maliket ka lamet ya makapanlingkor ed si Jehova kaiba iray agagi ed kongregasyon.” Tandaan mo met ya wadtan iray elder ya akaparaan ya ontulong ed sika. Ibabaga na Biblia ya “singa [ra] amotan ed dagem, sakey a pansaniban no bagyo.” (Isa. 32:2) Amta mi ya ag-abalang so panamablim ed dondon tan labalabay mon ipanengneng so pisasalamat mod si Jehova. Kanian tepetan moy sarilim, ‘Anto kasi gawaen ko pian nipetek ko ray bengatla diad baetan mi nen Jehova?’ (Isa. 1:18; 1 Ped. 2:25) Singa bilang, anto kasi no salien moy miaral lamet ed Kingdom Hall, tan mitongtong kad sakey ya elder? Ibagam ya labay moy manpatulong pian makapawil ka lad si Jehova. No naamtaan itan na saray elder, nayarin say sakey ed saray unonan gawaen da et mangiyasain iray man-Bible study ed sika. Seguradon bendisyonan nen Jehova so sagpot mo pian nipanengneng moy pisasalamat ed dondon.

IPANENGNENG MON MISATSALAMAT KA

17-18. Antoy samboten tayon gawaen diad sarayay nakekeran agew antis na Memoryal?

¹⁷ Imbaga nen Jesus ya intarya nen Ama to so dondon “pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) On, say dondon so alenleneg ya rason no akin ya nisalba tayo ed kasalanan tan patey. Agtayo komon itan lilingwanan! (Roma 3:23, 24; 2 Cor. 6:1) Diad sarayay nakekeran agew antis na Memoryal, samboten tayon dalepdepen so balbaleg ya panangaro nen Jehova tan Jesus ed sikatayo. Tan atan komon ya panangaro so mamakiwas ed sika ya ipanengneng so pisasalamat mod sikara.

¹⁸ Kayari na sayan impanaral tayo, antoy naisip mon paraan pian nipanengneng mon misatsalamat ka ed dondon? Say ebat mod satan ya tepet et nayarin duma ed iyebat na arum. Pero antokaman so paraan ya naisip mo, makaseguro ka ya bendisyonan nen Jehova so sagpot mo tan say sagpot na amin ya lingkor to. Seguradon makakaliket ta nanenengneng ton ‘agtayo manbibilay parad sarili tayo, noagta parad samay sakey ya inatey lapud sikatayo.’—2 Cor. 5:15.