Saray Sankapetangan Lan Temperatura ed Interon Mundo—Antoy Ibabaga na Biblia?

Legan na Hulyo 2022, wala ray inreport ya sankapetangan lan temperatura ed interon mundo:

• “Impasakbay na China ya nalikna so graben petang ed ngalngali 70 ya syudad diad komaduan heatwave ed sayan bulan.”—Hulyo 25, 2022, CNN Wire Service.

• “Lapud graben petang diad interon Europe natan, wala ray napopoolan ya katakelan ed dakel ya bansa diman.”—Hulyo 17, 2022, The Guardian.

• “Naeksperiensya na dakel ya syudad ed United States so sankapetangan ya temperatura nen Simba, legan ya onkakayat so heatwave na summer diad East Coast tan arum ya parte na South tan Midwest.”—Hulyo 24, 2022, The New York Times.

Antoy labay ya ibaga na sarayan nagagawa? Onsabi kasi panaon ya agla napanayaman so dalin? Antoy ibabaga na Biblia?

Kasin saray heat wave et kasumpalan na propesiya na Biblia?

On. Saray heat wave ya nagagawad interon mundo et mipara ed saray impasakbay na Biblia ya nagawad panaon tayo. Singa bilang, impropesiya nen Jesus ya wala ray “makapataktakot a nanengneng” tayo. (Lucas 21:11) Ompepetang lan ompepetang so temperatura kanian natatakot laingen so arum ta ompan lapud saray gagawaen tayo ran totoo et naderal lay dalin.

Onsabi kasi panaon ya agla napanayaman so dalin?

Andi. Ginawa na Dios so dalin pian permanentin panayaman na totoo. (Salmo 115:16; Eclesiastes 1:4) Imbes ya paulyanan to ray totoo ya deralen da itan, impromisa to ya “deralen [to] iramay manederal ed dalin.”—Apocalipsis 11:18.

Imanoen irayan duaran propesiya ya mangipapanengneng no anto ni ray impromisa na Dios:

• “Manliket so kalawakan tan say amagaan a dalin, tan manggayaga so patar a desierto tan manrosas a singa safron.” (Isaias 35:1) Agpaulyanan na Dios ya magmaliw ya singa desierton agnapanayaman so dalin, imbes, apigeren to iray aderal ya parte na satan.

• “Aasikasoen mo so dalin, pambubungaen mo itan na dakdakel tan payayamanen mon maong.” (Salmo 65:9) Diad tulong na Dios, magmaliw ya paraiso so dalin.

Pian naaruman ni antam no panon ya nasusumpal so propesiya na Biblia lapud nagagawan climate change, basaen so artikulon “Say Climate Change tan Say Bilay Tayod Arapen—No Antoy Ibabaga na Biblia.”

Pian naaruman ni antam ed promisa na Biblia ya naayos so kaliberliber, nengnengen so artikulon “Sino ang Magliligtas sa Lupa?”