Say Climate Change tan Say Bilay Tayod Arapen—No Antoy Ibabaga na Biblia
“Sakey ya trahedya iyay climate change. Onsabi panaon et agla napanayaman so dalin.”—The Guardian.
Aanien na totoo so probleman sikara lanlamang so nanggawa. Dakel ya scientist so mangibabaga ya saray totoo so natetel ed sayay nagagawan global warming. Lapud sobran petang, nauman lay klima tan dakdakel so makaderal ya epekto na satan. Nia ray alimbawa:
Mas ombebetbet tan onggragrabe iray kalamidad singa saray heat wave, kelang, tan bagyo, ya panlalapuan na saray delap tan wildfire.
Natutunaw iray glacier tan saray yelo ed Arctic.
Mas ontatagey so danum na saray dayat.
Anggan iner ya pasen na mundo et apektado la na climate change. Oniay inreport na New York Times kayari ran inobserbaan so 193 ya bansa: “Onkekerew lay tulong so planeta tayo.” Dakdakel lay inatey tan maniirap lapud climate change kanian imbaga na World Health Organization ya saya so “sankabalegan ya mamepeligro ed bunigas na laman na totoo.”
Anggaman ontan, walay aalagaren tayon ilalo ed arapen. Impasakbay na Biblia irayan nagawa natan, imbaga to met no akin ya makapantiwala tayon onkiwas so Dios tan no antoy gawaen to pian protektaan so bilay tayod arapen.
Kasin say climate change et kasumpalan na propesiya na Biblia?
On. Say climate change, ya epekto na global warming, et mipara ed saray impasakbay na Biblia ya nagawad panaon tayo.
Propesiya: “Deralen [na Dios] iramay manederal ed dalin.”—Apocalipsis 11:18.
Impasakbay na Biblia so panaon ya saray gagawaen na totoo et ngalngali la maneral ed planetan dalin. Lapud global warming, dederalen na totoo so planeta diad paraan ya agnin balot agawa nensaman.
Ipapanengneng na sayan propesiya so sakey a rason no akin ya agtayon talaga nailaloan ya isalba na totoo so dalin. Tandaan tayo ya onkiwas so Dios legan ya ‘dederalen na totoo so dalin.’ Wala ra met so totoon maong so intension da tan sasalien dan amperen so iloor na climate change. Balet anggan antoy gawaen da, agda napigilan iray totoo ya manederal ed dalin.
Propesiya: “Wala ray makapataktakot a nanengneng.”—Lucas 21:11.
Impasakbay na Biblia ya wala ray “makapataktakot a nanengneng” odino makapasinagem iran nagawad panaon tayo. Wala ray makapataktakot ya kalamidad ed nanduruman pasen na mundo lapud climate change. Kanian wala ray totoon makakaeksperiensya na eco-anxiety—sarayan totoo et natatakot ya maong ta ompan onloor ni iray problema ed kaliberliber tan agla nabilay iray totoo ed dalin.
Propesiya: “Diad kaunoran iran agew et onsabi iray mapeligro tan mair-irap a panaon. Ta saray totoo et magmaliw a maaro ed sarili ra, maaro ed kuarta, . . . aliwa ran matoor, . . . agda labay so mipaknaan, . . . traidor ira, anawet so ulo ra.”—2 Timoteo 3:1-4.
Impasakbay na Biblia iray ugali tan kagagawa na totoo ya pansengegay climate change. Mas interesado iray gobierno tan saray negosyante ed kuarta nen say pankaabigan na ontumbok iran henerasyon. Anggano sasalien day mantulongan, ag-ira makapanpaknaan ed kaukolan dan gawaen pian napatunday global warming.
Ipapanengneng na sayan propesiya ya agtayo nailaloan ya manguman so amin ya totoo tan protektaan day dalin. Imbes, ibabaga na Biblia ya “magmaliw a lalon mauges” iray totoon makasarili so ugali ra.—2 Timoteo 3:13.
No akin ya makaseguro tayo ya onkiwas so Dios
Ipapaamta na Biblia ya si Jehovaa a Dios, say amalsa ed sikatayo, et interesadon maong ed planeta tayo tan saray manaayam dia. Imanoen so taloran bersikulo na Biblia ya mangipapanengneng ya talagan onkiwas so Dios.
1. Say Dios et “agto pinalsa [so dalin] ya andiay gagala, noagta ginawa ton panayaman.”—Isaias 45:18.
Sumpalen na Dios so gagala to parad dalin. (Isaias 55:11) Agto iya paulyanan ya naderal odino agla napanayaman.
2. “Saray mauyamo et tawiren day dalin, tan manliket iran maong ed agnaparaan a kareenan. Saray matunong et tawiren day dalin, tan manbilay ira ditan diad andi-anggaan.”—Salmo 37:11, 29.
Impromisa na Dios ya manayam na andi-anggaan iray totoo diad dalin tan magmaliw ya mareen so kipapasen da.
3. “Saray mauges et naandi diad dalin.”—Proverbio 2:22.
Impromisa na Dios ya ekalen to iramay tuloytuloy ya manggagaway mauges, kaiba la iray manederal ed dalin.
No antoy gawaen na Dios parad arapen tayo
Panon ya sumpalen na Dios iray promisa to parad dalin? Usaren toy sakey ya gobiernon sakopen toy interon dalin, tatawagen itan ya Panarian na Dios. (Mateo 6:10) Satan ya panarian et manuley manlapud tawen. Agto la kaukolay mipaknaan ed saray gobierno na too ed saray isyu nipaakar ed dalin tan na kaliberliber. Imbes, salatan na Panarian na Dios iray gobierno na too.—Daniel 2:44.
Say Panarian na Dios et maong a balita ed amin ya totoo tan ed planeta tayo. (Salmo 96:10-13) Imanoen iray gawaen na Dios panamegley na Panarian to.
Ayosen toy kaliberliber
Oniay ibabaga na Biblia: “Manliket so kalawakan tan say amagaan a dalin, tan manggayaga so patar a desierto tan manrosas a singa safron.”—Isaias 35:1.
No antoy epekto na satan ed arapen tayo: Ayosen nen Jehova so planeta tayo, anggan saray pasen ya dineral ya maong na totoo.
Kontrolen to iray graben kalamidad
Oniay ibabaga na Biblia: “Patutundaen toy maksil a dagem; ondedeen iray daluyon na dayat.”—Salmo 107:29.
No antoy epekto na satan ed arapen tayo: Sarasarag nen Jehova ya kontrolen iray elemento. Agla manirap iray totoo lapud grabe iran kalamidad.
Ibangat to ray totoo no panon dan asikasoen ya maong so dalin
Oniay ibabaga na Biblia: “Ikdan ta kay pakatalos tan ibangat kod sika so dalan a nepeg mon laen.”—Salmo 32:8.
No antoy epekto na satan ed arapen tayo: Inter nen Jehova ed saray totoo so responsabilidad ya asikasoen so dalin. (Genesis 1:28; 2:15) Ibangat to tayoy sankaabigan ya paraan no panon tayon naasikason maong iray pinalsa to tan manbilay ed paraan ya agnaderal so kaliberliber.
a Jehova so ngaran na Dios. (Salmo 83:18) Nengnengen so artikulo ya “Siopa si Jehova?”