E Dia Cu Twin Towers A Basha Abou

E SUSESONAN cu a tuma luga dia 11 di september 2001, na New York City, Washington, D.C., y Pennsylvania lo keda permanentemente graba den mente di miyones, si no ta miles di miyones di habitante di mundo. Unda bo tawata ora bo a mira of tende e noticia di e atake contra World Trade Center na New York y contra Pentagon na Washington?

E destruccion increiblemente rapido di asina hopi propiedad y, mucho mas importante ainda, di asina hopi bida, a duna humanidad motibo pa para keto y reflexiona.

Kico nos a siña tocante nos prioridadnan y loke nos ta scohe p’e den bida? Con e susesonan tragico ei a saca na cla algun di nos bon cualidadnan como hende, manera sacrificio propio, compasion, perseverancia y inegoismo? E articulo aki y esun cu ta siguie lo purba contesta e ultimo pregunta ei.

Sobrevivientenan Ta Conta Nan Experencia

Inmediatamente despues di e desaster na New York, e sistema di metro a stop di funciona, y miles di hende a sali for di Manhattan na pia. Hopi di nan a crusa e brugnan di Brooklyn y di Manhattan y nan por a mira bon cla e edificionan di oficina y di fabrica di e sede mundial di Testigonan di Yehova. No a tarda mucho cu algun persona cu a scapa di e desaster a cohe rumbo pa e edificionan ei.

Alisha (na man drechi), yiu mohe di un Testigo, tawata entre e promenan cu a yega. Su curpa tawata tur na stof y shinishi.a El a splica: “Mi tawata den trein riba caminda pa trabou, y mi por a mira huma ta sali for di World Trade Center. Ora mi a yega na e area di desaster, tawatin glas tur caminda riba suela, y mi por a sinti e cayente. Hende tawata core den tur direccion, mientras cu polis tawata purba evacua e area. E tawata parce un zona di guera.

Mi a core sconde den un edificio eibanda. Anto mi a tende e explosion ora e di dos avion a dal den e toren pasuit. E esena tawata indescriptibel, y tur caminda tawatin huma preto. Nan a bisa nos pa sali for di e zona di peliger. Mi a subi un ferry cu a crusa East River bai Brooklyn. Ora mi a yega e otro banda, mi a hisa cara ariba y a mira skirbi cu letter grandi ‘WATCHTOWER.’ Ta e sede di e religion di mi mama! Mesora mi a cohe caminda pa e edificio di oficina. Mi tawata sa cu lo mi no por ta den miho man. Mi a haya chens di limpia mi curpa anto bel mi mayornan.”

Wendell (na man drechi) tawata portero di e Marriott Hotel cu tawata keda meimei di e dos torennan. El a splica: “Mi tawata na warda den lobby ora e prome explosion a tuma luga. Mi a mira baranca di piedra, hero y glas ta cai tur caminda. Mi a wak na otro banda di caya, y tawatin un homber na candela drumi abou. Mi a kita mi bachi cu mi camisa y core bai cerca dje pa purba paga e vlamnan. Un otro hende cu a pasa eibanda a yuda mi. Tur e homber su paña a kima na nada for di su curpa cu excepcion di su meñanan cu su sapato. Despues bomberonan a bini y a bai cu ne pa e haya asistencia medico.

Djis despues di esei, Bryant Gumbel di e canal di noticia di television CBS a bel pa papia cu un hende cu por a conta kico tawata pasando. Mi famia na Islanan Virgenes a tende mi reportahe na television y asina nan a haya sa cu mi ta na bida.”

Donald, un homber curpa grandi di 1,95 meter, tawata na piso 31 di World Financial Center, caminda e ta traha. E edificio tawata net enfrente di Twin Towers y Marriott Hotel. El a bisa: “Mi a keda geshock y hororisa cu loke mi a mira. Hende tawata cai y bula for di e bentananan di e toren panort. Mi a bira histerico y a core sali pafo mas lihe posibel.”

Un otro experencia tawata di un mama di 60’y pico aña cu su dos yiu mohenan di 40’y pico aña. Ruth cu su ruman mohe Joni tawata kedando hunto cu nan mama, Janice, na un hotel pega cu Twin Towers. Ruth, un verpleegster diploma, ta conta kico a pasa: “Mi tawata bañando. Diripiente mi mama cu mi ruman mohe ta grita mi pa sali for di den baño. Nos tawata na piso 16, y nan por a mira barancanan di piedra tawata pasa bai abou dilanti nos bentana. Mi mama a asta mira curpa di un homber bula pasa over di un dak eibanda como si fuera el a ser saca for di algo y benta afo.

Mi a bisti lihelihe, y nos a cuminsa baha trapi. Tawatin hopi gritamento. Nos a sali riba caya. Nos a tende cos ta explota y a mira chispanan di candela. Polis a manda nos bai pura den direccion suit pa yega Battery Park, caminda e ferry di Staten Island ta situa. Na caminda nos a perde Mama, kende tin asma cronico. Con lo e por sobrevivi den tur e huma, shinishi y stof aki? Nos a pasa mei ora ta busc’ele, pero sin exito. Sinembargo, na prome instante nos no a precupa masha pasobra e ta un hende hopi capas y trankil bou di presion.

Despues polis a dirigi nos pa bai na e brug di Brooklyn y crusa bai otro banda. Imagina bo nos alivio ora nos a yega na e banda di Brooklyn y nos a mira e letternan grandi ‘WATCHTOWER’! Nos tawata sa cu nos ta sano y salvo.

Nan a ricibi nos cu brasa habri y a duna nos alohamento. Tambe nan a duna nos paña, ya cu nos tawatin solamente esnan na nos curpa. Pero unda Mama tawata? Henter anochi nos a purba hay’e na hospitalnan, pero sin exito. Rond di diesun or y mei su siguiente mainta, nos a haya un mensahe. Mama tawata abou den lobby! Ta kico a pas’e?”

Janice, e mama, ta sigui conta: “Ora nos a pura sali for di hotel, mi a keda precupa pa un amiga hende grandi cu no a logra sali pareu cu nos. Mi kier a bai bek y carg’e saca afo mi mes. Pero esei tawata mucho peligroso. Den e conmocion mi a perde mi yiu mohenan for di bista. Sinembargo, mi no a precupa masha ya cu nan ta hende trankil y Ruth ta un verpleegster diploma.

Unda cu mi a bira, tawatin hende cu mester di yudansa, specialmente mucha y baby. Mi a yuda mas tanto di nan posibel. Mi a bai na e area caminda nan tawata parti e victimanan y trata nan segun e gravedad di nan lesionnan. Mi a yuda laba man y cara di e polis- y bomberonan. Nan man cu cara tawata tur na rut y stof. Mi a keda te su manece banda di tres or di marduga. Anto mi a cohe e ultimo ferry cu a bai Staten Island. Mi a pensa cu kisas mi yiu mohenan a bai busca refugio einan. Pero mi no a haya nan.

Mainta mi a purba cohe e prome ferry pa bai bek Manhattan, pero como cu mi no tawata un trahado di rescate nan no kier a laga mi subi. E ora ei mi a mira un polis cu mi a yuda. Mi a yam’e: ‘John! Mi tin cu bai Manhattan bek.’ El a contesta: ‘Ban cu mi.’

Ora mi a yega Manhattan, mi a cohe caminda pa Marriott Hotel. Podise ainda mi tawatin chens di yuda mi amiga. Lubida! E hotel tawata un ruina. Henter e area di downtown tawata morto morto; no tawatin actividad ningun caminda. Polis cu bombero so, cu nan caranan na werki y masha tristo.

Mi a cana bai na e brug di Brooklyn. Segun cu mi tawata yega e otro banda mi por a mira e letternan grandi conoci: ‘WATCHTOWER.’ Podise mi yiu mohenan ta einan. Asina mes, y nan a baha bini den lobby pa cuminda mi. Nos a brasa otro y yora sin fin!

Sorprendentemente, mi no a haya ni un solo atake di asma, apesar di tur e huma, stof y shinishi. Mi tawata haci oracion, pasobra mi kier tawata util, no un carga.”

“No Tin Ningun Caminda pa Aterisa!”

Rachel, un mucha mohe di 24 aña, a conta un redactor di Spierta!: “Mi tawata canando den mi caya den e parti mas suit di Manhattan ora cu mi a tende un avion riba mi cabes. E tawata zona asina duro cu el a pone mi hisa cara wak. Mi no por a kere mi wowo: Un jet masha grandi bahando full speed. Mi a puntra mi mes dicon e tawata bula asina abou. No tin ningun caminda pa aterisa! Podise e piloto a perde control. Anto m’a tende un señora grita: ‘E avion a dal den e edificio!’ Un inmenso bola di candela a sali for di e toren panort. Mi a mira un buraco preto grandi den e toren.

Tawata e cos di mas horibel cu mi a yega di mira den mi bida. E no a parce real. Boca habri mi a keda para einan. Djis despues un otro avion a dal den e di dos toren, y mas lat ambos toren a basha abou. Mi a bira histerico. Esei tawata mas di loke mi por a soporta!”

“Si Ta Landa Mi Tin cu Landa, Mi Ta Landa”

Denise di 16 aña, a caba di yega su scol cu tawata situa pega cu American Stock Exchange (Bolsa di Balor Mericano), tres blok pasuit di World Trade Center. E ta conta: “Nueb’or a caba di bati. Mi tawata sa cu algo a sosode, pero mi no tawata sa ta kico. Mi tawata na piso 11 di e scol, hayando les di historia. Tur alumno tawata morto spanta. Toch e juffrouw tawata kier pa nos traha un proefwerk. Pero nos kier a sali for di einan bai cas.

Anto nos edificio a sagudi ora e di dos avion a dal den e toren pasuit. Pero ainda nos no tawata sa ta kico a sosode. Diripiente mi a tende un stem riba walkie-talkie di juffrouw bisa: ‘Dos avion a dal den Twin Towers!’ Mi a pensa den mi mes: ‘Ta kico nos ta keda haci akiden? Esaki ta acto di terorismo, y e siguiente luga lo ta Stock Exchange.’ Pues nos a sali afo.

Nos a core bai Battery Park. Mi a drei wak patras pa mira loke tawata pasando. Mi por a mira cu e toren pasuit tawata cerca di basha abou. Anto m’a pensa cu lo bai tin e efecto di domino, esta, cu tur e otro edificionan halto tambe lo basha abou. Casi mi no por a hala rosea, ya cu mi nanishi y garganta tawata verstop cu shinishi y stof. Mi a core bai den direccion di East River, pensando den mi mes: ‘Si ta landa mi tin cu landa, mi ta landa.’ Segun cu mi tawata hui, mi tawata resa pidi Yehova spar mi.

Finalmente mi a subi un ferry rumbo pa New Jersey. A tuma mas cu cinco ora prome cu mi mama a haya mi, pero a lo menos mi tawata sano y salvo!”

“Esaki Ta Mi Ultimo Dia di Bida?”

Joshua di 28 aña, di Princeton, New Jersey, tawata na piso 40 di toren panort ta duna les na un klas. E ta corda: “Diripiente nos a sinti manera ta un bom a explota. Ora nos a sinti varios sagudimento, mi a pensa: ‘No, ta un temblor.’ Mi a wak pafo, y tawata increibel: huma y barancanan di piedra tawata zuai rond di e edificio. Mi a bisa e klas: ‘Tur hende laga tur cos para. Ban for djaki!’

Nos a cuminsa baha e trapinan cu tawata yenando cu huma, y awa tawata sali for di e sprinklernan. Pero no tawatin panico. Mi tawata resa pidi pa ohala nos a scohe e trapinan corecto pa asina nos no haya nos cara cara cu e candela.

Segun cu mi tawata core baha trapi, mi a puntra mi mes: ‘Esaki ta mi ultimo dia di bida?’ Mi a keda haci oracion na Yehova, y mi a sinti un pas straño a baha riba mi. Nunca mi no a experencia e tipo di pas interno ei. Nunca lo mi lubida e momento ei.

Ora cu porfin nos a sali for di e edificio, polis tawata manda tur hende pa sigui cana. Mi a hisa cara wak e torennan y m’a mira cu tawata manera nan a slice e dos edificionan habri. Tawata manera un soño.

Anto m’a tende un zonido straño: un silencio misterioso como si fuera miles di hende tawata tene nan rosea aden. A parce manera cos cu New York a para keto. Despues a bini grito. E toren pasuit tawata basha den otro! Un ola grandi di huma, shinishi y stof a basha bini riba nos. Tawata manera e efectonan special den un pelicula. Pero esaki tawata bida real. Apenas nos por a hala rosea ora e nubia a alcansa nos.

Mi a logra yega e brug di Manhattan, y ei mi a bira wak patras y mira con e toren panort cu su inmenso antena di television ta basha abou. Segun cu mi ta crusa e brug, mi a sigui resa pa mi por yega Betel, e sede mundial di Testigonan di Yehova. Nunca den henter mi bida mi tawata asina contento di mira e luga ei. Y riba e muraya di e fabrica tawatin skirbi cu letter grandi loke miles di hende por mira diariamente: ‘Lesa e Palabra di Dios e Bijbel Santo Tur Dia’! Mi a pensa: ‘Mi ta cerca di yega. Sigui un poco mas!’

Meditando riba e susesonan ei, mi a keda combenci cu realmente mi tin cu pone mi prioridadnan na nan luga: e cosnan mas importante den bida mester ta na prome luga.”

“Mi A Mira Hende Bula for di e Toren”

Jessica di 22 aña, a mira e susesonan ora el a sali for di e metro pega cu World Trade Center. E ta conta: “Mi a hisa cara y mira shinishi, barancanan di piedra y tur tipo di pida di metal ta bini abou. Tawatin fila di hende pa uza e telefonnan publico y nan tawata bira mas y mas histerico pasobra nan mester a warda. Mi a resa pidi Dios pa mi keda trankil. Anto nos a tende un otro explosion. Staal cu glas tawata cai fo’i laira. M’a tende hende grita: ‘Ta un avion mas!’

Mi a wak ariba, y tawata horibel pa mira: hende bulando for di e pisonan ariba caminda huma y vlam tawata sali. Ainda mi por mir’e mi dilanti: un homber cu un mohe. Nan a tene na un bentana pa un rato. Despues nan mester a laga bai y nan a keda cai, cai, cai. Tawata un bista insoportabel.

Despues ora mi a yega e brug di Brooklyn, mi a kita mi sapatonan incomodo y a core crusa e riu bai na e banda di Brooklyn. Mi a cana drenta e edificio di oficina di Watchtower, y mesora nan a yuda mi calma.

E anochi ei na cas, mi a lesa den Spierta! di 22 di augustus 2001 (na Spaño), e serie di articulo ‘Con pa Supera e Trastorno di Stress Post-traumatico.’ Mi tawatin mester di e informacion ei!”

E magnitud di e desaster a impulsa hende pa yuda den tur manera cu nan tawata por. E siguiente articulo ta splica un parti di e historia.

[Nota]

[Diagram/Plachinan na pagina 8, 9]

(Pa e texto den su formato completo, wak e publicacion)

DESTRUI

1 TOREN PANORT 1 World Trade Center

2 TOREN PASUIT 2 World Trade Center

3 MARRIOTT HOTEL 3 World Trade Center

7 7 WORLD TRADE CENTER

DAÑO SEVERO

4 4 WORLD TRADE CENTER

5 5 WORLD TRADE CENTER

L ONE LIBERTY PLAZA

D DEUTSCHE BANK 130 Liberty St.

6 U.S. CUSTOMS HOUSE 6 World Trade Center

N S BRUG NORT Y SUIT PA HENDE NA PIA

DAÑO PARCIAL

2F 2 WORLD FINANCIAL CENTER

3F 3 WORLD FINANCIAL CENTER

W WINTER GARDEN

[Reconocemento]

Mapa 3D di Lower Manhattan di Urban Data Solutions, Inc.

[Plachinan]

Te ariba: E toren pasuit a basha abou prome

Ariba: Tawatin hende cu a core busca refugio na e edificionan di Watchtower

Banda drechi: Centenares di bombero y trahado di rescate a traha incansablemente na Ground Zero

[Reconocemento]

AP Photo/Jerry Torrens

Andrea Booher/FEMA News Photo

[Reconocemento pa Potret na pagina 3]

AP Photo/Marty Lederhandler

[Reconocemento pa Potret na pagina 4]

AP Photo/Suzanne Plunkett