Hobennan Sa Puntra . . .

Ki Malo Tin den Mete cu Cosnan Sobrenatural?

TEENAGERNAN ta realmente interesa den cosnan sobrenatural? Un grupo di investigado a purba haya sa esei door di tene un encuesta entre 115 alumno di vijfde klas bai ariba. E encuesta a revela e siguiente estadistica: Mas cu mita di esnan entrevista (54 porciento) a bisa cu nan ta interesa den cosnan sobrenatural, mientras cu un cuart (26 porciento) a bisa cu nan ta “hopi interesa.”

Investigadonan pa e Universidad di Alaska na Anchorage ta skirbi: “Den ultimo añanan tawatin un cantidad di articulo den corant y revistanan tocante e supuesto aumento drastico den actividad di culto satanico.” Expertonan ta bisa cu tin tiki evidencia concreto pa apoya e idea cu satanismo ta reina entre hobennan. Pero toch no tin duda cu hopi hoben ta interesa den aspectonan di satanismo y cosnan sobrenatural, aunke e interes ei por ta superficial.

Pesei algun hoben kisas ta puntra: ‘Ki malo tin den mete cu cosnan sobrenatural?’ Pa haya un contesta, laga nos considera prome algun manera cu hobennan ta cuminsa mete cu cosnan sobrenatural.

E Atraccion pa Cosnan Sobrenatural

Un articulo den U.S.News & World Report ta bisa cu “mucha y teenagernan awe tin acceso y contacto cu un cantidad grandi di imagennan y informacion confuso—y hopi bes perturbador—cu un 20 aña pasa, lo tawata inimaginabel.” Curiosidad ta pone hopi hoben lesa buki y revista, wak video of surf Web site riba Internet cu ta presenta material di cosnan sobrenatural.

Segun BBC News Online, “algun hende ta pensa” cu programanan popular di television cu ta presenta bruheria y accionnan di vampiro “ta stimula un interes den bruheria cerca mucha.” Tambe tin algun musica ‘heavy metal’ cu ta presenta temanan violento of tocante demoño. Columnista Tom Harpur a skirbi den e corant The Sunday Star di Toronto: “Mi tin cu uza e palabranan mas categorico pa adverti boso di loke ta pasando [den musica]. . . . Nunca mi a yega di mira algo asina degrada. E canticanan ta obsesiona cu locura, hende posei, demoño, dramamento di sanger, maldicion, tur tipo di violencia, inclusivo violacion sexual, maltrato di bo mes curpa, asesinato y suicidio. Morto y destruccion, profecianan di calamidad, rechaso di tur loke ta bon y aceptacion di tur loke ta repugnante y malbado—esakinan ta e temanan.”

Scucha tal tipo di musica realmente ta hiba na comportacion destructivo? Evidentemente tawata asina den por lo menos un caso: Esun di un hoben di 14 aña na Merca cu a hinca su mama mata y caba a mata su mes. E murayanan di su camber tawata tur na poster di musiconan di rock heavy metal. Despues su tata a suplica: “Bisa mayornan vigila ki tipo di musica nan yiunan ta scucha.” E tata a bisa cu e siman prome cu su yiu homber a mata e mama, e tawata blo canta un cantica di rock “tocante sanger y mata bo mama.”

Tambe tin weganan di protagonisa personahe, y algun di nan ta permiti e participantenan hunga e papel di hacido di bruha y otro personahenan cu podernan sobrenatural. Hopi di e weganan aki ta contene violencia demoniaco.a

Sinembargo, Mediascope, un organisacion cu ta haci investigacion, ta informa: “Estudionan ta mustra cu ora hobennan ta prefera musica heavy metal esei por ta un indicacion importante di nan isolacion for di sociedad, uzo di droga y alcohol, trastorno psikiatrico, riesgo di suicidio . . . of comportacion di tuma riesgo durante adolecencia. Pero no ta musica ta e causa di e comportacionnan aki. Expertonan ta asumi cu teenagernan cu ya ta luchando cu e problemanan ei kisas ta ser atrai na musica heavy metal, pasobra e letranan ta expresa nan propio precupacionnan.”

Podise no ta tur investigado ta di acuerdo cu tin peliger den scucha musica satanico. Pero si un hende ta constantemente bezig cu video, musica of weganan cu ta enfatisa violencia y destruccion propio, esei no ta venena su mente? Sinembargo, tin un peliger asta mas serio pa Cristiannan cu ta mete cu cosnan sobrenatural.

Dios Su Punto di Bista di Cosnan Sobrenatural

Na 1 Corintionan 10:20, apostel Pablo ta spierta Cristiannan: “Mi no kier pa boso tin comunion cu demoño.” Ken e demoñonan ta, y dicon ta asina peligroso pa mete cu nan? Simpel bisa, demoño ta exangel cu a scohe pa sigui Satanas e Diabel. E nomber Satanas ta nifica “Resistido” y Diabel ta nifica “Calumniado.” Segun Bijbel, e exyiu di Dios aki cu tawata un angel a haci su mes un resistido y un calumniado door di scohe pa rebeldia contra Dios. Cu tempo, el a tenta otro angelnan pa join e den su proceder rebelioso. Asina e aliadonan aki di Satanas a bira demoño.—Genesis 3:1-15; 6:1-4; Hudas 6.

Hesus a yama Satanas “e prins di e mundo aki.” (Juan 12:31) Satanas y su demoñonan tin “gran furia” pasobra nan destruccion ta cerca. (Revelacion 12:9-12) No ta un sorpresa anto cu hende cu a mete cu demoño a ripara cu nan ta cruel y malicioso. Un señora na Surnam cu a lanta den un famia cu a practica spiritismo a mira personalmente con e demoñonan “ta gosa di tortura nan victimanan cu ta resisti.”b Pesei, ta sumamente peligroso pa mete di cualkier manera cu e criaturanan spiritual cruel aki!

P’e motibo aki, Dios a manda su pueblo di antiguedad, e Israelitanan, pa evita tur cos cu tin di aber cu practicanan sobrenatural. Deuteronomio 18:10-12 ta spierta: “Ken cu haci e cosnan aki ta un abominacion na SEÑOR.” Cristiannan tambe a haya e spiertamento cu Dios lo destrui “hacidonan di bruha.” (Revelacion 21:8) Dios ta condena asta metemento den cosnan sobrenatural. “No mishi cu loke ta impuro”, Bijbel ta manda.—2 Corintionan 6:17.

Con pa Stop cu Cosnan Sobrenatural

Bo a comete e eror di mete cu cosnan sobrenatural? Considera anto loke a tuma luga den prome siglo na e stad Efeso. Hopi hende einan “tawata practica magia.” Pero algun di nan a ser conmovi door di e obranan poderoso cu apostel Pablo a haci cu yudansa di spirito santo. Cu ki resultado? “Hopi di esnan cu tawata practica magia a trece nan bukinan hunto y a kima nan dilanti di tur; y nan a calcula nan balor y esaki tawata cincuenta mil pida plata. Asina e palabra di Señor tawata crece poderosamente y tawata prevalece.”—Echonan 19:11-20.

Kico esaki ta bisa nos? Cu si un persona kier scapa di e gara di demoño, e tin cu destrui tur cos relaciona cu adoracion satanico! Esaki ta inclui tur buki, revista, poster, buki di ‘comics’, video, amulet (articulonan cu hende ta bisti pa “proteccion”) y informacion relaciona cu demoño cu e persona a ‘download’ for di Internet. (Deuteronomio 7:25, 26) Tira afo tur cos cu hende kisas ta uza pa wak destino, manera bola di cristal of wega di Ouija. Deshaci tambe di musica of video cu ta presenta temanan satanico.

Pa un persona tira tur e cosnan ei afo e mester di curashi y e mester ta dicidido. Pero e beneficionan por ta grandi. Un señora Cristian cu yama Jeanc a cumpra un wega di computer cu na prome instante a parce inocente. Pero segun cu e tawata pasa door di e varios nivelnan di e wega, el a descubri cu algun aspecto di e wega tawatin di aber cu spiritismo. No a tarda hopi cu el a cuminsa haya nachtmerrie violento! Jean ta conta: “Mi a lanta meianochi y destrui e CDnan di e wega.” Cu ki resultado? “For di e dia ei mi no tawatin mas problema.”

Si bo mustra cu bo ta echt dicidido pa stop, lo bo logr’e. Corda con dicidido Hesus tawata ora Diabel a purba tenta Hesus pa ador’e. “Hesus a contest’e: ‘Bai for di akinan, Satanas! Pasobra ta para skirbi: “Adora SEÑOR bo Dios, y sirbi E so.”’ E ora ei Diabel a lag’e.”—Mateo 4:8-11.

No Lucha Bo So Contra e Demoñonan

Apostel Pablo ta corda nos cu tur Cristian ta “lucha . . . contra e forsanan spiritual di maldad den e luganan celestial.” (Efesionan 6:12) Pero no purba lucha bo so contra Satanas y su demoñonan. Busca yudansa cerca bo mayornan temeroso di Dios y ancianonan den e congregacion Cristian local. Kisas bo ta sinti berguensa di confesa cu bo a mete cu cosnan sobrenatural, pero si bo confesa, esei por yuda bo haya e apoyo cu bo tin asina tanto mester di dje.—Santiago 5:14, 15.

Corda tambe cu Bijbel ta bisa: “Resisti Diabel y e lo hui for di boso. Hala cerca Dios y E lo hala cerca boso.” (Santiago 4:7, 8) Si, bo tin e apoyo di Yehova Dios! Lo E yuda bo libra for di e trampa di cosnan sobrenatural.

[Nota]

[Plachi na pagina 26]

Deshaci di tur obheto relaciona cu adoracion satanico

[Plachi na pagina 26]

Tene cuidou cu Web site cu ta promove spiritismo