“E Dia Mas Felis di Nos Bida”

CASAMENTO ta un ocasion di goso. Hopi pareha ta bisa: “Esei tawata e dia mas felis di nos bida.” Pero tambe e por ta un di e dianan mas pisa. E bruid y bruidegom y nan famia kisas ta sinti un stress y cansancio intenso. Esaki ta debi na tur e decision y preparacionnan cu mester haci, y tambe debi na tur e hendenan cu e bruid y bruidegom lo topa riba e dia ei.

E dia di casamento ta marca comienso di un bida nobo pa e pareha. Pero no ta nan bida so ta cambia. Como cu e matrimonio di un yiu mohe, un yiu homber, un ruman mohe of un ruman homber hopi bes ta nifica cu un ser keri ta bai forma su mes hogar, e famia hopi bes tin sintimentonan mixto.

Custumbernan relaciona cu casamento ta diferente den cada pais, y no ta posibel pa trata nan tur. E articulonan aki lo concentra riba loke a bira tradicional den paisnan Occidental y otro paisnan similar. Na e luganan ei, casa por ta un asunto masha caro. Tin hende ta gasta casi un fortuna na cosnan relaciona cu e dia di casamento, entre otro, na huur un sala of restaurant pa tene receptie y pa laga sirbi cuminda. Segun calculo, na Italia un casamento normal ta costa riba 18.000 florin. Na Hapon, mescos cu otro caminda, e montante ei por ta mas halto. Generalmente, no ta e bruid cu e bruidegom ta paga pa tur esei. Ta nan mayornan.

Casamento ta un negoshi lucrativo pa hopi compania. Nan ta promove e concepto di un casamento “perfecto”, caminda no falta nada. Nan ta duna di comprende cu al fin y al cabo, “esaki ta e dia mas felis di bo bida!” Pues anto, nan ta ofrece un cantidad di producto y servicio “esencial” pa haci bo gran dia, un dia “perfecto.” Bo por haya invitacionnan di un caracter individual, bo shimis di bruid “ideal”, shimis pa ‘bruidsmeisje’ y smoking of bachi deftig pa hende homber cu ta sirbi casamento. Anto tambe tin flor, limousine, kisas un restaurant caminda lo sirbi un bankete, un sacado di potret, un banda, y otro cosnan mas. E lista di tur loke un bruid y bruidegom lo por desea, y tambe e lista di gasto cu ta compañ’e, por pone hopi tata tembla.

Den varios comunidad hende ta duna hopi importancia na cumpli cu tradicion. Tin henter un serie di accion y gesto fiho cu mester tuma luga, y nan ta spera di e bruid y bruidegom cu nan lo cumpli cu nan. Si, tin hopi cos di corda, pero no tin hopi tempo pa organisa tur esei.

Esaki ta un prospecto emocionante of desanimante? Sea cual sea bo contesta, ora bo ta pensa riba tur loke un casamento ta encera esei ta lanta varios pregunta. Kico casa ta nifica awendia? Di berdad bo mester di tur e cosnan aki pa bo por casa “na drechi”? Con bo por vence e varios dificultadnan practico y emocional?

Apesar di tur e stress, hopi hende a plania e detayenan di nan casamento exitosamente y a disfruta di e ocasion. Tal bes nan experencia por yuda otronan prepara pa enfrenta e mesun evento. Tambe tin principionan biblico cu por yuda ora di plania casamento ya asina e dia lo resulta di ta placentero, felis y edificante pa tur hende.