E Dia di Casamento—Un Dia Felis Pero Pisa

BIJBEL ta mustra cu ta Yehova Dios—kende conoce hende miho ku cualkier otro persona—tawata esun cu a casa e prome pareha. El a institui matrimonio como e fundeshi basico di sociedad humano. (Genesis 2:18-24) Y den Bijbel, Dios su Palabra inspira, nos ta haya varios principio cu por guia nos ora nos ta plania un casamento.

Por ehempel, Hesus a bisa cu Cristiannan mester ‘duna Cesar loke ta di Cesar.’ (Mateo 22:21) Pues, nan tin cu obedece lei di e pais. Un matrimonio cu ta cumpli cu rekisitonan legal ta proteha esnan envolvi den hopi manera, por ehempel door cu e ta defini e responsabilidadnan pa cu yiu (inclusivo nan mantencion y educacion) y derecho di herencia. Tambe tin lei pa proteha miembronan di famia pa hende no abusa ni probecha di nan.a

E Preparacionnan

Ki asuntonan practico mester tene cuenta cu ne una bes cu dicidi cu un pareha ta bai casa y ta evidente cu e matrimonio lo cumpli cu lei y principionan biblico y tambe cu lei di e pais? Entre otro cosnan, e fecha y e tipo di ceremonia di casamento cu e pareha ta desea.

Un buki cu ta trata e tema ei ta bisa: “Por sosode cu e pareha su ideanan no ta cuadra exactamente cu esnan di nan mayornan, y kisas nan ta basila entre haci precis loke nan como pareha kier of sigui e tradicion di famia.” Kico por haci? Segun e buki: “No tin un solucion facil pa esaki, cu excepcion di scucha otro cu tacto, papia di e problemanan y yega na un acuerdo door di complace otronan. Esaki ta un temporada emocional pa tur hende, y un poco planiamento y comprension lo contribui masha na haci e areglonan mas facil.”—The Complete Wedding Organiser and Record (E Buki Completo pa Organisa y Registra Casamento).

Aunke mayornan amoroso por yuda hopi pa haci sigur cu e dia ei lo ta un exito, nan mester resisti e tentacion di impone nan deseonan. Di otro banda, maske ta e bruid cu e bruidegom tin e ultimo palabra, nan mester scucha conseho di hende cu bon intencion. Ora di dicidi cua sugerencia nan mester acepta, e pareha ta haci bon di corda e conseho biblico: “Tur cos ta permiti, ma no ta tur cos ta cumbini. Tur cos ta permiti, ma no ta tur cos ta edifica. No laga ningun hende busca su mes interes, sino esun di su prohimo.”—1 Corintionan 10:23, 24.

Preparacion ta inclui varios cos, for di manda invitacion te organisa e receptie. H. Bowman ta bisa den su buki Marriage for Moderns (Matrimonio pa Hende Moderno): “Mas organisa e preparacion aki ta, mas prudencia y planiamento tin, menos cansancio y tension lo tin.” E ta spierta: “Asta bou di e sircunstancianan di mas faborabel lo tin cansancio, y pesei ta sabi pa haci tur esfuerso rasonabel pa limita esei.”

E pareha lo tin diligencia pa haci y tambe nan mester mustra hospitalidad na huespetnan. Amigo y famia por pone nan mes disponibel pa yuda? Tin cosnan cu no ta necesariamente e bruid cu e bruidegom mes mester haci y cu por ser asigna na otro hende responsabel?

E Gastonan

Ta esencial pa traha un ‘budget’ of presupuesto rasonabel. No ta rasonabel ni amoroso pa spera cu e pareha of nan mayornan ta hinca nan curpa den debe pa paga pa un casamento cu ta for di nan forsa. Asina mes hopi hende cu por afford un casamento mas na grandi toch ta scohe pa ten’e simpel. En todo caso, tin pareha a ripara cu ta bon pa tin un lista pa controla e gastonan cu nan a calcula y loke realmente nan a gasta. Tambe por ta util pa traha un lista di tur loke tin cu organisa hunto cu e ultimo fecha cu nan mester ta cla. Purba corda tur e fechanan ei for di cabes probablemente lo causa hopi stress.

Cuanto e casamento lo costa? Prijs ta varia di un pais pa otro, pero sin importa unda boso ta biba, lo ta sabi pa puntra boso mes: “Nos por afford tur e cosnan cu nos a plania? Realmente nan ta necesario?” Tina, un bruid cu a caba di casa, a bisa: “Algun cos cu a parce ‘indespensabel’ prome cu casamento, a resulta di ta innecesario.” Considera loke Hesus a conseha: “Cual di boso, ora cu e kier traha un toren, no ta sinta calcula e gastonan prome, pa mira si e tin suficiente pa cab’e?” (Lucas 14:28) Si bo no por afford tur loke bo kier, elimina algo. Asta si bo por afford mas cos, toch kisas lo bo kier tene e casamento simpel.

Na Italia, un exposicion cu nan a tene pa promove servicio y articulonan pa casamento a duna e calculacion di algun prijs pa sa cuanto un bruid Italiano lo gasta normalmente. Cosmetica y pelukeria, 800 florin; huur un auto di luho, 500 florin; un video di e dia, 1.000 florin; album di casamento (sin potret), 200 pa 900 florin; flor, 1.000 florin bai ariba; bankete, entre 80 pa 160 florin pa cabes; shimis di bruid, 2.000 florin bai ariba. Teniendo cuenta cu ta un ocasion importante, ta di comprende cu e pareha kier haci algo special. Pero loke sea nan dicidi, e mester ta balansa.

Maske tin hende ta gasta un fortuna, otronan gustosamente ta economisa, of, ta economisa pasobra nan no tin otro opcion. Un bruid a conta: “Nos tur dos tawata pionero [predicado full-time], y nos no tawatin placa, pero esei no tawata importante. Mi suegra a cumpra e tela pa mi shimis y un amiga a cos’e como su regalo di casamento. Mi casa a skirbi e invitacionnan na man, y un amigo Cristian a fia nos un auto. Nos a cumpra e cosnan basico pa e receptie, y un persona a duna nos biña. No tawata nada extrabagante, pero e tawata suficiente.” Segun un bruidegom, ora amigo- y famianan yuda cu cosnan practico, “e gastonan ta baha hopi.”

Sea cual sea e situacion financiero di parehanan Cristian, nan lo kier evita cos exagera, mundano of djis pa show. (1 Juan 2:15-17) Lo ta masha tristo si un ocasion festivo manera un casamento mester pone un hende faya cu principionan di Bijbel pa loke ta trata ser modera. Bijbel ta spierta pa no come di mas, bebe di mas, ni haci nada cu lo por stroba un persona di ser considera “sin reproche.”—Proverbionan 23:20, 21; 1 Timoteo 3:2.

Evita e tendencia di purba logra un casamento mas grandi y mas miho cu di otro hende. Considera por ehempel, e wal extrabagante cu dos bruid den un pais tawatin: uno su wal tawata 13 meter hancho y a pisa un 220 kilo; e otro su wal tawata 300 meter largo, y tawatin mester di 100 bruidsmeisje pa carg’e. Si nos imita tal espectaculo, nos lo ta actuando na harmonia cu e conseho biblico pa ser rasonabel?—Filipencenan 4:5.

Mester Sigui Tradicion?

Kada pais tin su mes tradicionnan di casamento, pues ta imposibel pa comenta riba nan tur. Ora un pareha mester dicidi si nan lo sigui un cierto tradicion, ta bon pa nan puntra nan mes: ‘Kico e ta nifica? E ta mara na un supersticion cu ta implica un deseo pa bon suerte of pa haya hopi yiu; manera por ehempel e tradicion di benta aros riba e pareha resien casa? E ta conecta cu religion falso of cu otro practicanan cu Bijbel ta condena? E ta irasonabel of e ta demostra falta di amor? Lo e por brongosa otro hende of pone nan trompica? Lo e por lanta duda en cuanto e motibonan di e pareha? E ta di mal gusto?’ Si e pareha tin duda riba un di e puntonan aki, lo ta miho pa evita e tradicion ei y, si ta necesario, laga e invitadonan sa di nan decision di antemano.

Goso y Emocion

Emocionnan riba e gran dia aki por varia di hopi alegria te lagrima. “E goso tawata asina grandi, tawata manera un soño cu a bira realidad”, segun un bruid. Pero un bruidegom ta corda: “Tawata e piyo dia y tambe esun miho di mi bida. Mi suegronan tawata yora sinfin pasobra mi tawata bai cu nan prome yiu mohe, mi casa tawata awa na wowo pasobra su mayornan tawata yora, y al final, ami tambe a basha na yoramento pasobra mi no por a soporta mas.”

No spanta pa reaccionnan asina, ta tension ta causa nan. Ni keda sorprendi si relacionnan familiar, asta entre e pareha, ta un poco tenso de bes en cuando. Segun e buki The Complete Wedding Organiser and Record: “Al fin y al cabo, ta probablemente prome biaha cu nan ta programa un evento grandi hunto, y tin hopi chens cu e entusiasmo ta afecta nan relacion den un manera of otro. Y rabia pasobra cos no ta bayendo bon manera bo a spera, lo no yuda; pero si lo ta hopi probechoso pa busca conseho y apoyo na un ocasion manera esaki.”

Un bruidegom a bisa: “Loke ami lo a aprecia masha y cu semper a duel mi cu mi no tawatin, ta un persona pa duna mi conseho y cu ken mi por a papia mi cosnan di confiansa y mi sintimentonan profundo.” E miho persona pa desempeña e papel ei lo no ta un amigo of amiga, of miembro di famia maduro of un otro persona den e congregacion Cristian cu tin experencia?

Ora mayornan ta mira nan yiu bandona nan hogar, kisas nan ta sinti goso, orguyo, nostalgia y miedo a la bes. Sinembargo, nan mester realisa inegoistamente cu a yega ora pa nan yiu “bandona su tata y su mama” y uni cu su casa y “bira un carni”, manera ta e proposito di e Creador. (Genesis 2:24) Un mama, comentando riba su propio reaccion ora su prome yiu homber a casa, ta corda: “Tawatin lagrima, pero hunto cu esnan di tristesa, tawatin lagrima di goso pasobra mi a haya echt un dushi suegra.”

Pa haci e ocasion placentero y edificante, mayornan—mescos cu e bruid y bruidegom—tin cu desplega e cualidadnan Cristian di coperacion, trankilidad, inegoismo y tolerancia.—1 Corintionan 13:4-8; Galationan 5:22-24; Filipencenan 2:2-4.

Tin bruid ta teme cu algo lo bai robes riba nan dia di casamento: e auto lo haya flat tire y nan ta yega laat pa e casamento, lo tin mal weer of cu na ultimo ora e shimis di bruid lo daña sin cu por drech’e. Probablemente nada di esaki lo no sosode. Pero toch, sea realistico. Tur cos no por bai perfecto. Mester acepta contratiempo. (Eclesiastes 9:11) Purba di no perde bo sentido di humor ora bo haya bo cu dificultad, y mantene un actitud positivo. Den caso cu algo bai robes mes, corda cu den e añanan despues, kisas lo bo hari ora bo ta conta loke a pasa. No laga desasternan chikito daña e goso di e casamento mes.

[Nota]

[Komentario na pagina 7]

“Algun cos cu a parce ‘indespensabel’ prome cu casamento, a resulta di ta innecesario.”—TINA, UN BRUID

[Cuadro/Plachinan na pagina 7]

MUESTRA DI UN LISTA DI PREPARACIONb

6 luna of mas di antemano

❑ Considera bo plannan cu bo futuro casa, suegronan y mayornan

❑ Dicidi ki tipo di casamento boso kier

❑ Traha un ‘budget’ of presupuesto

❑ Check rekisitonan legal

❑ Reserva luga pa tene receptie

❑ Tuma contacto cu e sacado di potret

4 luna

❑ Scohe paña di casamento (for di loke bo tin), cumpra of cose

❑ Bestel flor

❑ Scohe y bestel invitacionnan

2 luna

❑ Parti invitacion

❑ Cumpra renchi di casamento

❑ Obtene e documentonan necesario

1 luna

❑ Pas paña di casamento

❑ Confirma pedidonan y afspraaknan cu tin

❑ Manda un nota di gradicimento pa regalonan cu boso a haya caba

2 siman

❑ Cuminsa hiba pertenencianan personal na boso adres nobo

1 siman

❑ Haci sigur cu tur ayudante sa kico ta spera di nan

❑ Haci areglo pa debolbe tur cos cu boso a huur of fia

❑ Asigna tur cos posibel na otro hende

[Nota]

[Plachi na pagina 8]

“Loke Dios a uni, no laga ningun hende separa”