Masai un Pueblo Unico y Colorido

DI E CORESPONSAL DI SPIERTA! NA KENIA

E STEM halto di un hoben Masai cantando a resona door dje vaye, den e aire pisa di mainta, carga cu serena. Mas e solo di mainta a subi, mas halto e mucha homber a canta, mescos cu parha cu ta canta duro ora e prome rayonan di solo ta sali.

Mi a para scucha, y segun cu solo a subi bo por a distingui e wardado Masai chikito aki para meimei di e bestianan di su tata. Bisti cu un paña cora cu a tapa parti di su curpa, e tawata para riba un pia manera un ooievaar, wanta riba un pida palo, y cantando pa su tou trankil. Laga mi conta bo un poco mas tocante e pueblo Masai, un pueblo unico.

Bon Bini na e Teritorio Masai

Masai ta un pueblo colorido cu ta biba di crio di bestia den e enorme teritorio di Gran Vaye di Rift na Kenia y Tanzania, Oost Africa. Nan ta sobreviviente di un tempo cu a pasa bai. E pueblo Masai ta biba casi mescos cu nan antepasadonan a biba siglonan prome. Nan no ta precupa cu tempo. Loke ta guia nan bida ta subida y bahada di solo, y e cambio constante di temporadanan di aña.

Un di e habilidadnan di e pueblo Masai ta di por sobrevivi den e ambiente dificil y paisahe bruto di Vaye di Rift. Cu nan pasonan grandi y trankil nan ta cana distancianan largo pa busca bon luga pa nan bestianan come y bebe. Nan ta cuida nan bestianan den bicindario di trupanan di antilop, zebra, zjiraf y otro bestianan di yanura cu ta biba hunto cu otro.

Un Pueblo Criado di Bestia

E pueblo Masai ta pensa cu tur bestia di cria na mundo ta di nan. E creencia aki ta bini for di un leyenda cu ta bisa cu na cuminsamento Dios tawatin tres yiu, y cu el a duna cada un di nan un regalo. E prome yiu a haya un flecha pa e yag cu ne, e di dos a haya un chapi pa e planta cu ne, y e di tres yiu a ricibi un pida palo pa e cuida bestia cu ne. Nan ta bisa cu e ultimo yiu aki a bira tata di e nacion Masai. Maske tin mas tribu cu ta cria bestia, Masainan ta pensa cu basicamente tur e bestianan aki ta pertenece na nan.

Den un comunidad Masai, posicion di un homber ta depende di e grandura di su tou di bestia y e cantidad di yiu cu e tin. De echo, si un homber tin menos cu 50 bestia, nan ta consider’e pober. Un homber Masai su soño ta pa e por yega na tin un tou grandi, kisas te mil bestia, cu yudansa di e cantidad di yiu y casa cu e tin.

E miembronan di un famia Masai ta forma un laso emocional cu nan bestianan. Cada bestia tin su mes stem y su mes temperamento cu e famia conoce bon. Hopi bes nan ta marca nan cu hero cayente y marca liña largo cu ta cohe bocht y patronchinan complica riba e bestianan pa resalta nan bunitesa. Nan ta canta cantica cu ta describi e bunitesa fisico di cierto bestianan di e tou, y ta expresa nan cariño pa nan. Masha nan gusta toro cu cacho largo cu ta bira, y nan ta cuida y lidia cu bishe chikito cu hopi cariño, como si fuera ta un baby resien naci.

Tradicionalmente ta hende mohe Masai ta traha cas. Nan ta uza yerba pa vlecht taki na otro, anto pleister y yena nan cu mest di baca. E casnan ta rondo of oval, y nan ta traha nan den un circulo cu ta forma un cura central pa proteha e bestianan aden durante anochi. Nan ta pone taki cu sumpiña skerpi rond di henter nan propiedad, pa proteha tanto nan mes como nan bestianan for di hiena, leopardo y leon cu ta cana rond.

Masainan su sobrevivencia mes ta depende di e salu y fortalesa di nan bestianan. Nan ta bebe nan lechi y uza nan mest pa tapa y pleister cas. Masha poco un Masai ta mata un baca pa come. Mayoria bes nan ta aparta un par di carne y cabrito pa come. Pero ora nan mata un di e bestianan, nan ta uza delaster un parti di dje. Nan ta traha conchi cu e cachonan, adorno cu e patanan y e wesonan, y nan ta curti e cuero pa traha sapato, paña, cabuya y cos pa tapa cama.

Colorido y Unico

Masainan ta nechi hende. Nan ta halto y delega, y nan ta hende fini. Nan pañanan ta masha colorido. Nan ta lora un paña tiña cora y blou bibo rond di nan curpa lenig. Normalmente e hende mohenan ta dorna nan mes cu coyar hancho rondo yen di cralchi, y cu band di cabes di hopi colo. Tin bes nan ta bisti banchi diki di coper stijf rond di nan brasa of enkelnan. Tanto e hombernan como e mohenan ta rek nan lel di horea door di bisti renchi di horea pisa, cu adorno di cralchi. Hopi bes nan ta pinta nan curpa masha bunita cu oker, un mineral colo cora cu nan ta garna haci puiro y mescla cu vet di baca.

Un anochi, cu claridad di candela, mi a sinta mira un grupo di Masai reuni pa balia. Nan a para den un ronchi y move den ritmo. Segun cu e paso di e baile a bira mas intenso, e coyarnan pisa di e mucha mohenan tawata bati ritmicamente riba nan scouder. Despues, un pa un, guereronan Masai a drenta e ronchi pa dal saltonan espectacular. Nan ta bula masha halto. Nan por keda baila te laat den anochi, te ora nan ta morto cansa.

Bida di Famia Masai

Henter dia mi a sinta sconde pa solo den sombra di un palo di acasia, hunto cu un grupo di mohe Masai, y mira con nan ta cose cralchi cu hopi detaye riba cuero curti. Nan tawata papia y hari cu otro sin paga masha tino na e ‘wevervogelnan’ cu tawata canta riba nan cabes y traha nan neishi di yerba seco. Durante e dia e hende mohenan a tene nan mes ocupa cu busca awa, busca palo pa candela, drecha nan cas y cuida nan yiunan chikito.

Ora solo cuminsa baha, pocopoco e cuidadonan di bestia ta cuminsa bai den direccion di cas cu nan trupa di bestia. Pata di e bestianan ta lanta un nubia di stof cora cu ta lombra den e ultimo rayonan oraño di solo. Ora e mohenan mira e nubia di stof for djaleu, mesora nan ta laga nan trabou para pa nan prepara pa yegada di e trupa di bestia.

Una bes cu e bestianan ta safe den cura, e hombernan ta cana meimei di nan bestianan, caricia cacho di e toronan, y admira nan bunitesa. Un mucha homber chikito ta hala lechi di un baca anto ta laga e lechi cayente basha den su boca, y mesora e ta haya un zundra cerca su mama. E mucha mohenan hoben ta drenta sali meimei di e laberinto di pata y cacho, y ta hala lechi habilmente. Nan boternan di calbas largo ta yena te casi basha over.

Anochi nos tur ta bini hunto rond di e candela cu ta plakia e friu. Tin un holo di huma y carni hasa, y tambe bo por sinti e holo fuerte di e trupa di baca cu tin djis cerca ei. Un anciano ta sinta conta cuenta di historia Masai y actonan heroico di guereronan Masai di pasado. Ora un leon grita leu aya, e anciano ta keda keto djis un rato, anto ta sigui conta su relato en detaye sin precupa. Su oyentenan ta gusta masha. Finalmente, un pa un nan tur ta disparce den e scuridad di nan cas di lodo pa bai drumi. Cu excepcion di e rosea suave di e bacanan drumi, e anochi ta keto, domina pa e scuridad y isolacion di e mondi.

Infancia di Masai

Ora solo sali, ya e pueblito ta yen di actividad. Tin mucha chikito cu djis un cadena y faha di cralchi rond di nan custia, hungando den e aire fresco di mainta. E zonido di nan harimento ta haci e Masainan contento. Nan stima nan yiunan hopi, y nan futuro y nan sobrevivencia ta depende di nan yiunan.

Criamento di e muchanan ta un asunto di henter e pueblo. Cualkier hende mayor den e comunidad por disiplina y castiga un mucha cu desobedece. Nan ta siña nan yiunan respeta nan grandinan, y e muchanan ta siña lihe con pa comporta nan mes den famia como Masai. Den nan prome añanan nan no tin cu precupa cu nada. Pero segun cu nan crece, e mucha mohenan ta siña cumpli cu debernan di cas, y e mucha hombernan ta siña cuida y proteha e bestianan. E mayornan ta siña nan yiunan loke nan sa tocante remedi tradicional, y ta instrui nan tocante ritualnan Masai y tradicionnan cu tin di aber cu delaster un aspecto di bida di un Masai.

Birando Adulto

Segun cu nan crece, e hobennan ta siña e custumber- y ceremonianan cu ta indica cu nan a laga bida di mucha atras, y bira adulto. Algun di e ritonan cu nan ta siña tin di aber cu enfermedad, mala suerte, casamento y morto. Masainan ta kere cu si nan no cumpli cu e ceremonianan aki, un maldicion lo bini riba nan.

Tin bes mayornan Masai ta haci areglo pa nan yiu mohe casa for di ora cu e ta hopi chikito. Nan ta priminti e mucha den matrimonio na un homber cu tin suficiente baca pa e por paga e bruidsprijs cu e tata ta pidi. Hopi di nan ta casa cu un homber hopi mas bieu cu nan, y bai forma parti di e grupo di otro esposanan den e famia.

Segun cu e mucha hombernan di e comunidad Masai ta bira grandi, nan ta asocia estrechamente cu otro mucha hombernan di nan mes generacion. E relacion estrecho cu nan tin cu nan pareunan por dura henter nan bida. Hunto, mucha sin experencia ta crece bira guerero. Como guerero nan lo acepta e responsabilidadnan di proteha nan cas y tereno, y e fuentenan di awa di e comunidad, y proteha nan tounan contra bestia salbahe y ladron. Nan ta conoci pa nan balentia y curashi, y casi nunca bo no ta topa un Masai sin su arma skerpi.

Ora un guerero tin rond di 30 aña di edad, e ta drenta e ultimo fase riba caminda pa madures. Cu hopi emocion y un ceremonia grandi, e ta bira un adulto oficialmente. Awor e tin mag di casa. Awor cu e tin e posicion respeta aki, lo e concentra riba casa y aumenta e cantidad di baca cu e tin. Ademas nan ta spera pa e duna hende conseho y fungi como intermediario ora tin pleito.

Kico Lo Para di Masai?

Awendia e custumbernan y cultura unico di Masai ta disparciendo rapidamente. Tin areanan caminda Masainan no por cana libremente cu nan bacanan mas pa busca luga nobo pa e bestianan come. Terenonan masha grandi caminda tradicionalmente nan tawata biba ta birando reserva di bida animal, of proyecto di vivienda y agricultura pa poblacionnan creciente. Secura y dificultad economico ta obligando hopi Masai di bende nan bestianan stima pa por sobrevivi. Ora nan muda bai biba den stad grandi, nan ta topa e mesun problemanan cu ta plaga sobra di e mundo moderno rond di nan.

Actualmente, e predicacion di Testigonan di Yehova ta alcansando e comunidadnan Masai den Oost Africa. Nan a imprimi mas cu 6.000 ehemplar di e foyeto Disfruta di bida riba tera pa semper! na e idioma Masai. Asina Masainan ta siña mira e diferencia cu tin entre supersticion sin base y e berdad di Bijbel. Di berdad ta conmovedor pa mira cu nos Creador Yehova Dios a duna e pueblo unico y colorido aki e oportunidad pa bin forma parti di “tur nacion y tur tribu y pueblo y lenga” cu lo sobrevivi e destruccion di e sistema di cosnan aki yen di problema.—Revelacion 7:9.

[Plachi na pagina 25]

Un cas Masai tradicional

[Plachinan na pagina 26]

Masai ta reuni pa balia

[Plachinan na pagina 26]

Dos Testigo Masai