E Punto di Bista Biblico

Dios Ta Aproba Guera?

MASHA hopi bes gobernantenan, generalnan y asta pastonan a declara of apoya guera den nomber di Dios! Na aña 1095, cu apoyo y sosten di Papa Urbano II, e Prome Crusada a sali bai pa reconkista e “Stad Santo” Herusalem pa cristiandad. Pero prome cu nan a logra nan meta, un tropa di esnan cu a participa den e Crusada a ser likida door di e Turconan, kende nan celo pa Ala tawata mes fuerte cu e fe cu e esnan cu a participa den e Crusada tawatin den e Trinidad.

Na augustus 1914, un solda Aleman a skirbi for di su campamento durante Prome Guera Mundial: “Si ta existi husticia y ta Dios ta esun cu ta dirigi sucesonan den historia humano—y mi ta absolutamente sigur cu asina ta—anto e victoria mester ta di nos.” E mesun luna ei, Emperado Nicolas II a manda e ehersitonan di Rusia contra Alemania, y a proclama: “Mi ta manda saludo di mi alma pa mi tropanan balente y pa mi aliadonan ilustre. Dios ta cu nos!”

Pues cu tal animacion, miyones di solda a bai bringa den guera, plenamente combenci cu Dios tawata na nan banda. Hopi hende ta kere cu Dios ta permiti tal bringamento como e prijs pa alcansa libertad, y pa apoya esei nan ta mustra riba e gueranan menciona den e Scritura Hebreo (generalmente yama Testament Bieu). Nan interpretacion di e Palabra di Dios ta corecto?

E Gueranan di Antiguo Israel

Yehova Dios a decreta cu Israel mester a bringa guera pa saca e Cananeonan inmoral for di e Tera Priminti. (Levitico 18:1, 24-28; Deuteronomio 20:16-18) Mescos cu Dios a castiga malechornan den tempo di Noe cu un dilubio y Sodoma y Gomora cu candela, asina el a uza e nacion di Israel como su medio pa trece castigo di morto.—Genesis 6:12, 17; 19:13, 24, 25.

Segun Bijbel, otro batayanan cu Israel a bringa bou di Dios su guia tawata por lo general pa defende nan mes contra menasa di enemigo cu nan no a proboca. Ora e nacion tawata obedece Yehova, e gueranan cu nan a bringa a termina na nan fabor. (Exodo 34:24; 2 Samuel 5:17-25) Pero ora Israel a tribi bai guera contrario na conseho dibino esei generalmente tawata resulta den desaster. Considera e caso di Rei Yeroboam. El a ignora un advertencia dibino directo y a manda su enorme ehersito bai bringa un guera civil contra Huda. Ora cu finalmente e violencia a termina, 500.000 solda di Yeroboam a muri. (2 Cronicanan 13:12-18) Asta fiel Rei Hosias un biaha a bai un bataya cu no tawata di dje. E decision descabeya aki a cost’e su bida.—2 Cronicanan 35:20-24.

Kico e sucesonan aki ta mustra? Cu den antiguo Israel, ta Dios tawata dicidi si mester a bringa un guera. (Deuteronomio 32:35, 43) El a laga su pueblo bringa pa propositonan spesifico. Sinembargo, e propositonan aki a cumpli hopi tempo pasa. Ademas, Yehova a profetisa cu esnan cu ta sirbie “den e ultimo dianan” lo “bati nan spadanan traha ploeg cu nan” y “nunca mas nan lo train pa guera.” (Isaias 2:2-4) Ta bisto anto cu e gueranan menciona den Bijbel no ta hustifica e conflictonan den nos tempo, ya cu ningun di nan ta ser bringa bou di Dios su guia ni riba su ordo.

E Efecto di e Siñansa di Cristo

Ora Hesus tawata riba tera el a demostra con pa remplasa odio cu amor inegoista, bisando: “Stima otro mescos cu ami a stima boso.” (Huan 15:12) Tambe el a bisa: “Bendiciona ta esnan cu ta haci pas.” (Mateo 5:9) E palabra Griego pa “haci pas” ta nifica mas cu djis un estado trankil. En realidad e ta encera cultiva pas, trahando activamente pa promove bon boluntad.

Ora nan a bin aresta Hesus, apostel Pedro a purba defend’e cu un arma mortal. Pero e Yiu di Dios a scuale, bisando: “Pone bo spada bek na su luga; pasobra tur esnan cu saca spada lo perece pa medio di spada.” (Mateo 26:52) Con cristiannan di prome siglo a aplica e palabranan aki? Tuma nota di e siguiente citanan.

“Un repaso cuidadoso di tur e informacion disponibel [ta mustra] cu te cu e tempo di Marco Aurelio [aña 121-180 Era Comun], ningun cristian a bira solda; y ningun solda, despues di bira cristian, a keda den servicio militar.”—The Rise of Christianity.

“E comportacion di e [prome] cristiannan tawata hopi distinto for di e Romanonan. . . . Siendo cu Cristo a predica pas, nan a nenga di bira solda.”—Our World Through the Ages.

E Romanonan a mata hopi disipel di Cristo como cu nan a nenga di sirbi den e ehersito di emperado. Dicon cristiannan a mantene un posicion asina impopular? Pasobra Hesus a siña nan haci pas.

Guera Moderno

Imagina bo ki situacion teribel lo tin si e siguidonan di Cristo mester a bringa den ehersitonan enemigo di otro, purbando di mata otro. Un situacion asina lo ta contrario na principionan cristian. En realidad, esnan cu ta obedece e Dios di Bijbel lo no causa daño na ningun hende, ni sikiera na nan enemigonan.a—Mateo 5:43-45.

Ta claro anto cu gueranan literal cu ta tuma luga entre hende den nos tempo no tin bendicion di Dios. Cristiannan berdadero, siendo hende cu ta haci pas, ta boga pa e pas cu lo bai tin rond mundo bou di e Reino di Dios.

[Nota]

[Plachi na pagina 15]

General Francisco Franco di Spaña ta pose cu varios pasto catolico

[Reconocemento]

U.S. National Archives photo

[Plachi na pagina 15]

Soldanan ta ser bendiciona pa pastonan di religion Griego Ortodox prome cu nan sali pa Kosovo, 11 di juni 1999

[Reconocemento]

AP Photo/Giorgos Nissiotis