Un Bishita na e Stad di Oro Preto

DI E CORESPONSAL DI SPIERTA! NA BRASIL

PODISE bo no a tende nunca di e stad Brasileño Ouro Prêto, pero den siglo 18 su poblacion tawata tres biaha mas grandi cu di New York City, y un biaha e ganashi cu el a produci a percura e fondonan pa reconstrui Lisboa na Portugal ora cu temblor a destrui e stad aki. Na 1980, UNESCO a pone Ouro Prêto riba e Lista di Patrimonio Mundial. Awor e lista aki ta inclui 700 sitio cu ta destaca den balor cultural y natural. Dicon nan a duna Ouro Prêto e status ei? Considera e historia di e stad unico aki.

Un Slok di Awa Cu Ta Hiba na Oro

Durante e prome mita di siglo 17, un cantidad di explorado Portugues, yama bandeirantes, a explora Brasil en busca di tera nobo, catibo indjan y oro. Un expedicion a sigui bai den interior te ora nan a yega na Sero Itacolomi. Einan Duarte Lopes a bai na un riu chikito pa calma su set. Ora el a saca poco awa pa bebe cu su conchi di palo, el a ripara piedranan chikito preto den e conchi.

Lopes a bende e piedranan cu un amigo, kende a sospecha cu nan tawata balioso y a manda nan pa e gobernado di Rio de Janeiro. Ora e gobernado a examina e piedranan, el a ripara cu nan tawata oro di calidad masha halto cubri cu un capa preto fini di hero oxida. Pero di unda e oro a bini? Asina cu Lopes a describi unda Itacolomi ta keda, e buskeda a cuminsa. Na aña 1698, e bandeirante Antônio Dias de Oliveira a haya e sero for di unda e oro a bini. Masha lihe mes, buscadonan di oro a basha bini na un campamento, cu despues a haya e nomber Villa Rica, cerca di e sitio di e hayasgo. No a tarda hopi cu Villa Rica tawatin 80.000 habitante. Cu tempo el a bira e capital di Minas Gerais y nan a yam’e Ouro Prêto, cu ta nifica “Oro Preto.”

Oro Preto Ta Causa Dramamento di Sanger

Entre aña 1700 y 1820, exploradonan a mina 1.200 ton di oro; 80 porshento di e oro produci mundialmente e tempo ei. Pero unda tur e oro ei a bai? Nan tawata dirti e oro y bash’e den forma di bara na e Casa dos Contos, esta Cas di Moneda. Despues di esei, un kinta parti (20%) di e oro—e impuesto rekeri—a bai den caha di e famia real di Portugal.

E colonistanan tawata contra di e impuesto. Un di nan tawata Felipe dos Santos, kende a instiga mineronan, hombernan militar y miembronan di iglesia contra e autoridad di e monarkia Portugues. Pero e Portuguesnan a bringa bek. Na 1720, nan a colga dos Santos na palo di horca y a laga cabai lastra su curpa door di cayanan di e stad. E mineronan a bai traha bek den e minanan, y impuesto a sigui subi.

Sinembargo, esaki tawata simplemente un paro temporal di e rebelion. Mas despues den e mesun siglo a presenta Joaquim da Silva Xavier, cariñosamente yama Tiradentes, (“rancado di djente”) locual a referi na un di su ofishinan. E tawata entre un grupo di poeta, hurista y hombernan militar di Ouro Prêto cu tawata reuni regularmente den cas di Toledo, un pasto. Na principio, e combersacionnan tawata mas tocante filosofia, pero despues nan a cambia pa e politica di e tempo ei. Despues nan combersacion a bira rebelde ora cu e grupo tawata papia—den secreto—tocante e demandanan opresivo di e monarkia Portugues. Lareina di Portugal, Dona Maria I, a spierta cu lo kita cabes di rebeldenan. Pero toch Tiradentes, cu na 1788 tawata un oficial militar, a hiba delantera den e Inconfidência Mineira, es decir, e Rebelion di Minas Gerais.

Un spion a revela nomber di e conspiradonan. Un pa un nan a ser aresta y exilia pa Africa, pa muri einan. Tiradentes a keda pena den un prizon humedo na Rio de Janeiro te ora cu nan a colg’e na palo di horca y kita su cabes afo dia 21 di april 1792. Nan a exhibi Tiradentes su cabes na un staca den e plasa di e stad Ouro Prêto, y su curpa, cu nan a parti na cuater, nan a colga na staca a lo largo di varios caya. Pa un tempo esei a descurasha cualkier posibel rebelde. Pero tres decada despues, na 1822, Brasil a haya su independencia for di Portugal.

Tesoronan di Arte, Historia y Religion

Cu tempo e oro di Ouro Prêtu a agota, y su importancia a mengua. Pero e stad a keda cu algun artefacto y otro recuerdonan di su historia. Bo ta haya algun di esakinan facilmente den Museo Inconfidência, situa na Praça Tiradentes. Anteriormente e museo tawata stadhuis y prizon, y awor e ta tene na bida e recuerdonan di arte y historia, y tambe di e tragedia di e stad.

Nan exhibicion ta inclui Tiradentes su sentencia di morto cu Dona Maria I a decreta, y tambe pidanan di e palo di horca cu nan a uza pa su ehecucion. Bou di plachinan largo y plat di cement poni na rei manera cama den un sala di drumi, bo ta haya e restonan di algun di e otro conspiradonan di Tiradentes dera. Riba un otro piso bo ta haya mueblenan estilo antiek, colonial y imperial den e cuartonan.

Delicia pa Amantenan di Piedra Precioso

Un caminata na e parti ariba di Praça Tiradentes ta hiba na un otro caha di tesoro: e Palacio di Gobernado, caminda antes tawata aloha gobernadonan y presidentenan di estado. Actualmente e ta fungi como Escola de Minas, un scol pa estudionan avansa den ingenieria di mina, geologia y metalurgia. E scol su museo tin un exhibicion impresionante di 20.000 muestra di 3.000 diferente tipo di mineral, piedra precioso, cristal y naturalmente, ouro prêto.

Awendia bo no ta haya gran cantidad di oro mas. No obstante, e region ta sigui produci piedranan di berilo di colo blou (aquamarin) y berde (esmeralda) y tambe topasio imperial colo hel. Un 50 aña pasa, ta masha tiki hende tawata conoce e arte di corta piedra precioso. Pero awe tin boshi buscado di piedra precioso cu ta traha riba nan mes y tambe tiendanan di hoyeria rond di Praça Tiradentes. E managernan ta siña bo con pa identifica piedra precioso y tambe ta introduci bo na e cortadonan di piedra y esnan cu ta polish nan den e cuartonan patras. Gustosamente eseinan na nan turno ta mustra bo con nan ta corta e piedranan. E gesto aki di hospitalidad ta mustra cu e habitantenan di e stad aki ta sinti nan mes privilegia di por biba den un stad cu un historia fasinante.

Si bo tin pensa di bishita Brasil, haci sigur cu bo plannan di biahe ta inclui un caminata door di e stad fotogenico Ouro Prêto.

[Mapa na pagina 10

(Pa e texto den su formato completo, wak e publicacion)

Ouro Prêto

[Reconocemento]

Mapa: Mountain High Maps® Copyright © 1997 Digital Wisdom, Inc.

[Plachi na pagina 10, 11]

Ora kita e hero oxida, e piedranan preto ta bira pipita di oro

[Plachi na pagina 11]

Ouro Prêto, cu Sero Itacolomi den fondo

[Plachi na pagina 12]

Museo Inconfidência, Praça Tiradentes

[Plachi na pagina 12]

Aquamarin, topasio imperial colo hel y esmeralda

[Reconocemento]

Piedranan precioso: Brasil Gemas, Ouro Preto, MG