For di Nos Lectornan

Hende Mohe Maltrata Mi no tin palabra pa gradici boso pa e serie “Yudansa pa Hende Mohe Maltrata.” (8 di november 2001) Mi ta un victima di violencia na cas. Asta ora mi tawata logra haci denuncia na autoridadnan di loke tawata pasando cu mi, mi tawata combenci cu ningun hende no por comprende e dolo, angustia y tristesa profundo cu mi tin y cu mi no por a fria di ningun manera. E articulonan aki ta describi precis loke mi ta sinti.

N. L., Italia

Manera mi a los e papel rond di e revista y a wak e kaft, mi wowonan a yena cu awa. Mesora mi a dobla e revista bek, ya cu mi a sinti cu e tawata trata un parti di mi pasado cu mi kier a pretende cu nunca a sosode. Mi a pidi Yehova duna mi forsa pa cuminsa lesa e revista. Mi ta masha gradicido cu mi a haci esei! E serie aki a yuda mi realisa cu no ta mi so ta sufri. Djis lesa e palabranan “golpia bo casa ta un pica grave den bista di Dios”, tawata manera ora un hende basha azeta refrescante riba un herida. Danki pa e tipo di articulonan consolador aki cu ta trata cu situacionnan di bida real.

D.G.M., Merca

Mi a pasa den e mesun cos cu e mohenan menciona den e articulonan. Mi tawata blo bisa mi mes cu ta alcohol y e ambiente cu mi casa a lanta aden tawata e causa. Pero maske e factornan ei por splica dicon e violencia tawata tuma luga, mi a haya un consuelo ora mi a comprende cu no tin ningun hustificacion pa violencia. Di henter mi curason mi kier pa mi esposo lesa Bijbel y siña conoce e amor di Yehova.

S. I., Hapon

E serie aki tawatin un efecto special riba mi, ya cu mi ta un esposa maltrata. Mi a sinti manera ta ami ta Roxana. Tawata un gran yudansa pa mi di sa cu tin mas hende cu ta comprende con un esposa maltrata ta sinti. E articulonan aki a siña mi cu no ta mi falta cu mi esposo ta comporta su mes asina. Tambe nan a yuda mi realisa cu maske mi casa ta considera mi indigno y inutil, den bista di Dios si mi ta importante. Masha danki pa publica informacion asina practico. Nan ta hopi mas miho cu rikesa!

B. L., Filipinas

Boso a logra pone riba papel tur e dolo y frustracion cu mi no por a expresa. E serie aki a yuda mi mira cu Yehova ta comprende e angustia mental y emocional cu e problema aki ta causa. Por fabor, sigui skirbi articulonan asina, pasobra mester papia di e problema aki y otro hendenan mester comprend’e. Mi tin sigur cu hopi hende lo haya e mesun consuelo cu ami a haya for di e articulonan aki.

K. E., Australia

Mi a lanta cu un tata cu tawata rabia masha lihe, y hopi bes ami ta rabia cu mi esposo. Tin biaha—miho bisa, hopi biaha—mi ta asta dal e. Mi esposo ta mas fuerte cu mi, pesei mi tawata pensa cu mi no ta echt hacie daño. Ora mi a lesa loke e revista ta bisa—cu golpia bo casa ta un pica grave den bista di Dios—mi a keda geshock. Mi casa ta un sirbido manso di Yehova. Di curason mi kier pidie despensa. Mi ta gradici Yehova pa e disiplina aki.

T. I., Hapon

E revista aki a pone mi wowo yena cu awa. Tawata como si fuera mi tawata lesa e relato di mi bida. Pero poco tempo pasa mi esposo a cuminsa haci pregunta tocante Bijbel. El a asisti na algun reunion na Salon di Reino, y awor e ta studiando Bijbel. Mi sa precis kico Lourdes kiermen cu su comentario cu a sali na pagina 11: “Tin bes mi ta pensa cu mi ta soñando!”

E. R., Merca