E Punto di Bista Biblico

Pornografia Ta Simplemente un Dibirticion Inofensivo?

ORA cu arkeologonan di e era di Reina Victoria a cuminsa coba pa saca e ruinanan di e antiguo stad Pompei sistematicamente, nan a keda geshock cu loke nan a descubri. Plama libremente entre e obranan di arte y e pinturanan riba muraya tawatin hopi cuadro y escultura cu a presenta hende sunu of actividad sexual abiertamente. Hororisa pa e contenido sensacional y escandaloso, autoridadnan a warda nan den museonan secreto. Nan a crea e palabra “pornografia” (di Griego pornē y grafos, cu ta nifica “skirbimento tocante prostitutanan”) pa describi e artefactonan aki. Awe nan ta defini pornografia como presentacion di comportacion erotico den buki, potret, estatua, pelicula, etc., cu e intencion pa e stimula excitacion sexual.

E dianan aki pornografia ta presente tur caminda y ta parce cu gran parti di sosiedad moderno ta hay’e aceptabel. Antes, pornografia tawata aparece solamente den cinenan di mala fama y den areanan caminda tawatin casnan di prostitucion y otro actividad comercial basa riba sex. Pero awor e ta masha comun den hopi comunidad. Na Merca so pornografia ta genera mas cu 10 mil miyon dollar pa aña!

Tin defensor di pornografia cu ta promov’e como un manera pa duna sous na un matrimonio laf. Un escritor a bisa: “E ta stimula un bida di fantasia activo. E ta duna instruccion pa logra placer sexual.” Otronan ta pretende cu e ta stimula frankesa y combersacion habri riba asuntonan sexual. “Pornografia ta beneficia hende mohe”, segun e escritora Wendy McElroy.

Pero no ta tur hende ta di acuerdo cu esei. Hopi bes hende a conecta pornografia cu un gran variedad di consecuencia y actitud perhudicial. Tin hende ta indica cu pornografia ta liga cu violacion y tambe cu otro formanan di violencia contra hende mohe y mucha. E notorio Ted Bundy, kende a comete un serie di asesinato, a admiti cu e tawatin un “deseo fuerte pa pornografia violento.” El a bisa: ‘E persona no ta ripara e condicion aki mesora ni ta identific’e como un problema serio. Pero e interes aki ta ser canalisa den direccion di asuntonan di caracter sexual cu ta envolve violencia. Mi kier enfatisa cu e deseo aki ta desaroya gradualmente. E no ta algo cu ta tuma luga den un periodo cortico.’

En bista di e debate continuo y e abundancia di material pornografico cu tin awe, kisas bo ta puntra bo mes: ‘Bijbel ta duna guia tocante e asunto aki?’

Bijbel Ta Franco Tocante Sex

Bijbel ta trata asuntonan sexual den un manera franco y sin ripara. (Deuteronomio 24:5; 1 Corintionan 7:3, 4) Salomon a conseha: “Alegra bo den e esposa di bo hubentud. . . . Laga su pechonan satisface bo tur ora.” (Proverbionan 5:18, 19) Bijbel ta duna recomendacion y conseho cla tocante relacion sexual, incluso denter di ki limite mester disfruta di dje. Sex pafo di matrimonio ta prohibi. Tambe tur forma di practicanan sexual abnormal.—Levitico 18:22, 23; 1 Corintionan 6:9; Galationan 5:19.

Asta denter di e limitenan permiti parehanan mester tin respet y dominio propio. Apostel Pablo a skirbi: “Laga matrimonio wordo honra pa tur hende, y laga e cama matrimonial ta sin mancha.” (Hebreonan 13:4) E conseho aki ta na contraste skerpi cu e intencion y mensahe di pornografia.

Pornografia Ta Duna un Mal Impresion di Sex

En bes di presenta relacion sexual como un expresion bunita y intimo di amor entre un homber y un mohe den un matrimonio honorabel, pornografia ta rebaha y duna un mal impresion di e acto sexual. E ta presenta sex abnormal y cu hopi partner como algo excitante y deseabel. E ta enfatisa satisfaccion personal cu casi no ta tene cuenta mes cu e otro persona.

Hende mohe, homber y mucha ta ser presenta como obhetonan cu ta existi solamente pa satisfaccion sexual. Un informe ta bisa: “Ta un hende su forma di curpa ta determina si e ta bunita, locual ta hiba na expectativanan irealistico.” Un otro informe ta conclui: “Presentando hende mohe como personanan anonimo, cu semper tin deseo/semper ta warda riba un oportunidad, como co’i hunga sexual insignificante pa hende homber, kitando nan sunu y exhibiendo nan curpa pa gana placa y pa dibirticion, no por transmiti e mensahe cu hende mohe tin igualdad, dignidad y humanidad.”

Al contrario, amor “no ta comporta su mes indecente”, apostel Pablo a skirbi. “E no ta busca su propio interes.” (1 Corintionan 13:5) Bijbel ta anima hombernan pa “stima nan esposa manera nan mes curpa” y ‘duna nan honor.’ Bijbel no ta bisa pa considera hende mohe simplemente como un obheto pa haya satisfaccion sexual. (Efesionan 5:28; 1 Pedro 3:7) Un persona, sea ta homber of mohe, cu regularmente ta wak imagennan sexual abierto di otro hende, di berdad ta comportando su mes decente? Y e persona ei realmente ta mustra honor y respet? En bes di cultiva amor, pornografia ta lanta deseo egoista.

Tin un factor mas. No ta tarda hopi cu loke inicialmente ta excita un persona—mescos cu tur otro stimulacion incorecto—ta bira algo comun y coriente. Un escritor ta bisa: “Despues di tempo [e uzado di pornografia] mester di material mas detaya y abnormal . . . Kisas nan ta presiona nan partnernan pa haci actonan sexual cu ta mas y mas extrabagante . . . , locual ta mengua nan [propio] capasidad di expresa berdadero cariño.” Esei ta parce un dibirticion inofensivo? Pero tin un otro motibo importante pa evita pornografia.

Bijbel y Pasion

Aunke hopi hende awe ta haya cu no tin nada malo ni peligroso den stimula fantasianan sexual, Bijbel si no ta di acuerdo cu esei. E ta splica bon cla cu tin un relacion natural entre loke nos ta yena nos mente cu ne y con nos ta actua. E disipel cristian Santiago a bisa: “Cada un ta wordo tenta ora cu e wordo atrai y seduci door di su mes pasion. Anto ora pasion consebi, e ta duna lus na pica.” (Santiago 1:14, 15) Hesus a bisa: “Ken cu wak un mohe pa dese’e, ya caba el a comete adulterio cu ne den su curason.”—Mateo 5:28.

Manera tanto Santiago como Hesus a indica, hende ta actua riba e impulso di nan deseonan interno. E deseonan ei, ora alimenta nan y stimula nan, cu tempo por bira obsesion fuerte. Ta dificil pa resisti un obsesion y cu tempo e por obliga un persona na actua. Pues, loke nos ta hinca den nos mente por tin un influencia poderoso riba loke nos lo haci cu tempo.

Fantasianan sexual por interferi directamente cu nos adoracion na Dios. Ta pa e motibo ei Pablo a skirbi: “Pesei, considera e miembronan di boso curpa . . . como morto pa inmoralidad, impuresa, pasion, deseo malo, y golosidad, cu ta igual na idolatria.”—Colosencenan 3:5.

Aki Pablo ta conecta pasion (apetit sexual, NW) cu golosidad. Golosidad ta un deseo excesivo pa algo cu bo no tin.a Golosidad ta un forma di idolatria. Dicon? Pasobra e persona golos ta pone loke e ta desea prome cu tur otro cos, incluso prome cu Dios. Pornografia ta stimula pasion, un deseo sexual intenso, pa algo cu e persona no tin. Un escritor religioso a bisa: “Bo kier e bida sexual di un otro hende. . . . Unico cos cu bo por pensa ariba ta bo deseo pa e bida sexual ei cu bo no tin. . . . Loke nos tin un deseo intenso p’e, nos ta adora.”

Pornografia Ta Daña Balornan Moral

Bijbel ta conseha: “Tur loke ta puro, tur loke ta bunita, tur loke ta di bon fama, si tin algun birtud . . . , laga esakinan ocupa boso mente.” (Filipensenan 4:8) Un persona cu ta alimenta su bista y su mente cu pornografia ta rechasa e conseho di Pablo. Pornografia ta indecente pasobra di un manera descara e ta exhibi pa bista publico e actonan mas intimo y priva. E ta despreciabel pasobra e ta rebaha hende y kita nan dignidad humano. E ta mustra falta di amor pasobra e no ta stimula ternura ni interes. E ta simplemente promove pasion egoista.

Door di presenta actonan inmoral y sushi pa loco, pornografia ta debilita of sabotea un cristian su esfuersonan pa desaroya ‘odio pa loke ta malo.’ (Amos 5:15) Pornografia ta stimula hende pa practica pica y ta un violacion di Pablo su animacion na e Efesionan pa “no laga inmoralidad of cualkier sorto di impuresa of golosidad ni wordo menta mes meimei di boso, manera ta pas pa santonan, ni sushedad, . . . ni chansanan vulgar, cu no ta pas.”—Efesionan 5:3, 4.

Pornografia sigur no ta inofensivo. E ta probecha di otronan y ta daña balornan moral. E por destrui relacionnan personal, y ta cambia e expresion natural di intimidad sexual den un actividad caminda otronan ta para wak pa haya satisfaccion sexual. E ta venena e mente y spiritualidad di esun cu ta para wak. E ta stimula egoismo, golosidad y ta siña hende considera otronan como obheto cu ta sirbi solamente pa satisface nan pasion. E ta debilita un hende su esfuerso pa haci bon y di tin un bon consenshi. Pero mas importante, e por stroba of asta daña un hende su relacion spiritual cu Dios. (Efesionan 4:17-19) Di berdad pornografia ta un plaga cu hende mester evita.—Proverbionan 4:14, 15.

[Nota]

[Plachi na pagina 28]

Pornografia ta daña un hende su manera di mira e sexo opuesto