E Daño Cu Pornografia Ta Causa

TA FACIL pa yega na tur tipo di informacion sexual via television, pelicula, videoclip y Internet. E invasion constante aki di imagennan sexual y pornografico ta inofensivo, manera hopi hende kier pa nos kere?a

E Efecto di Pornografia Riba Personanan Adulto

Apesar di loke su defensornan ta bisa, pornografia tin un efecto hopi negativo riba hende su punto di bista di sex y di comportacion sexual. Investigadonan na e Fundacion Nacional pa Investiga y Educa Famia a conclui cu “esnan cu ta wak pornografia ta core mas riesgo di desaroya tendencianan cu ta desvia for di comportacion sexual normal.” Segun e raport, “e mito di violacion (esta, e creencia cu hende mohe ta proboca violacion y ta gust’e, y cu violadonan ta hende normal) ta reina bou di hombernan cu tin custumber di wak pornografia.”

Tin investigado ta bisa cu e uzo frecuente di pornografia por stroba un hende di disfruta y participa den intimidad matrimonial normal. Dr. Victor Cline, un specialista den tratamento di adiccion na sex, a ripara cu hopi biaha hende cu ta haci uzo di pornografia ta sigui bai mas leu. Si un persona no frena su mes, loke a cuminsa como wakmento casual di pornografia cu tempo por bai te na wakmento di material pornografico mas pisa y detaya, y abnormal. Segun dr. Cline, esaki por hiba na comportacion sexual cu ta desvia for di normal. Cientificonan cu ta studia comportacion humano ta di acuerdo cu esei. Dr. Cline a informa cu “di e manera aki hende por adkiri cualkier tipo di desviacion sexual . . . cu no por wordo elimina ni sikiera door di un tremendo sintimento di culpa.” Cu tempo, e persona kisas ta purba actua segun su fantasianan inmoral basa riba pornografia, hopi bes cu resultadonan devastador.

E problema aki por desaroya pocopoco y sin cu hende ta ripara, segun Cline. El a bisa: “Mescos cu cancer, e ta sigui crece y plama. Masha poco biaha e [desviacion sexual] ta stop di progresa, y tambe e ta masha dificil pa trata y cura. Un rasgo tipico di e adicto masculino ta cu e ta nenga di reconoce y confronta e problema—algo cu di mes bo por verwacht—y esaki casi semper ta hiba na desacuerdo entre pareha, tin biaha na diborcio, y tin biaha e ta kibra otro relacionnan intimo.”

E Daño na Hobennan

Estadisticanan ta mustra cu e consumidonan principal di pornografia ta mucha homber entre 12 pa 17 aña. De echo, pa hopi di nan pornografia ta nan fuente principal di educacion sexual. Esaki tin consecuencianan alarmante. Un raport a bisa: “Pornografia nunca ta mustra embaraso hubenil ni malesanan transmiti sexualmente manera AIDS. Eroneamente e ta laga hende kere cu e comportacionnan presenta den pornografia no tin consecuencia negativo.”

Tin investigado ta bisa cu wakmento di pornografia por afecta tambe e desaroyo natural di un mucha su celebro. Dr. Judith Reisman, presidente di e Instituto pa Educacion Tocante Medionan di Comunicacion, a conclui: “Observacionnan pa haya sa con e sistema nervioso ta ser afecta door di e reaccion automatico di e celebro ora hende ta mira y tende cosnan pornografico, ta indica cu wakmento di pornografia ta causa un reaccion cu biologicamente ta cambia e celebro. Esaki ta cansela e proceso normal di acepta algo despues di compronde loke e ta encera. Y esei ta perhudicial pa e celebro di mucha cu ta manera ‘plestik’ [facil pa influencia], pasobra e ta pone nan comprondemento di realidad na peliger y ta perhudica nan salu mental y fisico, nan bienestar y nan buskeda di felicidad.”

E Efectonan Riba Relacionnan Personal

Pornografia ta forma hende su actitud y ta influencia nan comportacion. E mensahenan cu e ta transmiti ta atractivo pasobra nan ta fantasia y pesei ta ser presenta como si fuera nan ta mas excitante cu realidad. (Wak e cuadro “Cua Mensahe Lo Bo Acepta?”) Un raport a bisa: “Personanan cu ta haci uzo di pornografia ta desaroya expectativanan irealistico cu ta causa daño na relacionnan personal.”

Pornografia por destrui confiansa y honestidad, cualidadnan esencial den un matrimonio. Como cu hende ta wak pornografia principalmente den secreto, hopi bes e ta hiba na engaño y mentira. Partnernan ta sinti nan mes traiciona. Nan no ta compronde dicon nan casa no ta desea nan mas.

Daño Spiritual

Pornografia ta causa daño spiritual serio. E por bira un berdadero estorbo pa un persona cu ta purba tin un relacion cu Dios.b Bijbel ta conecta pasion cu golosidad y idolatria. (Colosensenan 3:5) E persona golos ta desea algo asina tanto cu esei ta e cos dominante den su bida, surpasando tur otro cos. De echo, hende adicto na pornografia ta pone nan deseo sexual prome cu Dios. Di e manera ei nan ta hacie un obheto di adoracion. Yehova Dios su mandamento ta declara: “Bo no mag tin otro dios mi dilanti.”—Exodo 20:3.

Pornografia ta destrui relacionnan personal amoroso. Apostel Pedro, kende tambe tawata un homber casa, a urgi esposonan cristian pa asigna honor na nan esposa. Un esposo cu no haci esei lo ripara cu su oracionnan na Dios ta wordo stroba. (1 Pedro 3:7) Lo bo ta trata bo esposa cu honor si den secreto bo ta wak plachinan indecente di hende mohe? Con bo esposa lo sinti si e haya sa esei? Y kico Dios—cu lo trece “tur echo na huicio” y cu ta “pisa e motibonan”—lo ta pensa di esei? (Eclesiastes 12:14; Proverbionan 16:2) Un persona cu ta haci uzo di pornografia tin motibo pa spera cu Dios lo scucha su oracionnan?

Un caracteristica basico di hende cu ta uza pornografia ta cu nan ta insisti riba satisfaccion propio a toda costa. Pesei, wakmento di pornografia ta indica cu e persona no tin amor. E ta debilita un cristian su lucha pa keda decente y mantene un posicion moralmente limpi dilanti di Dios. Apostel Pablo a skirbi: “Esaki ta e boluntad di Dios . . . pa boso abstene boso di inmoralidad sexual, pa cada un di boso sa con pa tene su mes curpa den santificacion y honor, no cu pasion di deseonan carnal . . . y cu ningun hende no transgresa ni defrauda [of, “perhudica y trapa e derechonan di”, NW] su ruman.”—1 Tesalonicensenan 4:3-7.

Pornografia ta probecha specialmente di hende mohe y mucha. E ta rebaha nan y ta horta nan di nan dignidad y derechonan. Un persona cu ta haci uzo di pornografia ta participa den e sacamento di probecho ei y ta apoy’e. Investigado Steven Hill y Nina Silver a señala: ‘Sin importa con bon un homber ta kere cu e ta, e echo cu e ta haci uzo di pornografia—y pues ta aprob’e—ta hacie a lo miho sin heful, a lo peor un persona cu ta odia y desconfia hende mohe, net e persona cu e ta pretende di stima.’

Con pa Libra for di Pornografia

Kico si actualmente bo ta luchando cu un adiccion na pornografia? Bo por haci algo pa vence e adiccion ei? Bijbel ta duna speransa! Prome cu algun di e cristiannan di prome siglo a siña conoce Cristo, nan tawata fornicado, adultero y golos. “Ma boso a wordo laba”, Pablo a remarca. Con esei tawata posibel? El a contesta: “Boso a wordo santifica . . . [cu] e spirito di nos Dios.”—1 Corintionan 6:9-11.

Nunca balota e poder di Dios su spirito santo. Bijbel ta bisa: “Dios ta fiel, kende lo no permiti pa boso wordo tenta mas cu boso por soporta.” De echo, Dios lo percura e salida. (1 Corintionan 10:13) Oracion ferviente—papiando persistentemente cu Dios tocante bo problema—lo produci resultado. Su Palabra ta anima nos: “Tira bo carga riba SEÑOR, y e lo sostene bo.”—Salmo 55:22.

Claro cu bo tin cu actua na harmonia cu bo oracion. Bo tin cu tuma un decision delibera y sinsero pa rechasa pornografia. Un amigo di confiansa of un miembro di famia por ta di gran yudansa, dunando bo e apoyo y animacion necesario pa pega na bo determinacion. (Wak e cuadro “Busca Yudansa.”) Door di keda corda cu tal proceder siguramente lo agrada Dios, por yuda bo sigui cumpli cu bo decision. (Proverbionan 27:11) Ademas, e echo cu bo sa cu ora bo ta wak pornografia esei ta ofende Dios, tambe por sirbi como un motivacion adicional pa stop cu ne. (Genesis 6:5, 6) Esaki lo no ta un lucha facil, pero e ta un lucha cu bo por gana. Bo por stop cu pornografia!

E peligernan di pornografia ta real. E ta perhudicial y destructivo. E ta corumpi esnan cu ta producie y esnan cu ta haci uzo di dje. E ta un insulto pa hende homber y hende mohe, un peliger pa mucha, y un practica cu lo mester wordo rechasa.

[Nota]

[Cuadro/Plachi na pagina 10]

Busca Yudansa

Nos no mester mira e lucha pa libra for di pornografia como algo facil; e por ta un bataya dificil. Dr. Victor Cline, kende a trata un cantidad di adicto na sex, a bisa: ‘Priminti so no ta basta. Bon intencion no ta nifica nada. Un adicto na sex literalmente no por libra di esaki su so.’ Segun Cline, un rekisito necesario pa un tratamento exitoso, ta di envolve e partner den caso cu e persona ta casa. El a trece dilanti: “E tratamento ta bai mas lihe si tur dos ta envolvi. Nan tur dos ta gehurt. Nan tur dos mester di yudansa.”

Si e persona ta soltero, un amigo di confiansa of un miembro di famia hopi bes por ta un bon sosten. Pero, sin importa ken ta envolvi den e tratamento, Cline tin un regla fiho: Papia abiertamente di e problema y di cualkier recaida. El a bisa: “Secreto ta ‘mata bo.’ E ta crea berguensa y sintimento di culpa.”

[Tabel na pagina 9]

Cua Mensahe Lo Bo Acepta?

E Mensahe di Pornografia E Punto di Bista Biblico

◼ Sex cu ken cu ta, ki ora ◼ “Laga matrimonio wordo honra

[Plachi na pagina 7]

Tin investigado ta bisa cu wakmento di pornografia por afecta e desaroyo natural di un mucha su celebro

[Plachi na pagina 8]

Pornografia por destrui confiansa y honestidad den un matrimonio

[Plachi na pagina 10]

Oracion ferviente lo produci resultado