Dicon Pornografia Ta Asina Plama?

MATERIAL erotico diseña pa stimula sintimentonan sexual ta algo cu ta data for di mas cu dos mil aña pasa. Pero durante gran parti di su historia, pornografia tawata dificil pa produci y pesei tawata disponibel principalmente pa hende rico y pa esnan na poder. Pero imprenta masal y e invento di sacamento di potret a cambia tur esei. Pornografia a bira barata y disponibel pa esnan menos pudiente.

Desaroyo di videocassette recorder a pone e tendencia aki escala. Distinto for di rolnan grandi di sinta di cine y potretnan bieu, videocassette tawata facil pa warda, pa copia y pa distribui. Tambe hende por a wak nan den priva na cas. Ultimo tempo, e aumento di sistemanan di cable y Internet a haci pornografia mas facil ainda pa yega na dje. E consumido cu tin miedo cu su biciña lo mir’e na videoteca ta busca video x-rated, awor por “keda cas y bestel [material pornografico] door di primi un conopi di su cable of di su direct TV”, asina e analista di medionan di comunicacion Dennis McAlpine a bisa. Acceso facil na e tipo di programacion aki, segun McAlpine, a contribui na “hopi mas aceptacion” di pornografia.

Pornografia Ta Bira Comun y Coriente

Hopi hende tin sintimentonan mixto pa cu pornografia pasobra awor el a bira algo comun. E escritora Germaine Greer a bisa: “Ya caba e tin hopi mas influencia riba nos cultura cu tur nos opera, ballet, teatro, musica y obranan di arte combina.” Actitudnan moderno pa cu pornografia ta ser refleha den pañanan ‘chic estilo di prostituta’ cu hopi artista famoso ta bisti, y den e videoclipnan cu mas y mas ta accentua imagennan sexual. Tambe e actitud ei ta bisto den e manera cu medionan cu ta haci propaganda comercial ta uza imagennan pornografico den nan propaganda. McAlpine a conclui: “Sosiedad ta aceptando gewoon asina tur loke nan ta presenta na dje. . . . Esaki ta yuda crea e idea cu tur esaki ta bon.” Andrea Dworkin a lamenta cu como resultado, “hende aparentemente no ta bira indigna. Ta parce cu nan no tin cu nes.”

E Rasonamento Tras di Pornografia

Roger Young, un agente pensiona di FBI, a expresa casi mesun pensamentonan cu e escritor Dworkin. El a señala cu hopi hende “simplemente no ta mira e consecuencianan serio di e falta di moralidad aki, ni e problemanan cu e ta causa.” Tin hende ta ser influencia door di esnan cu ta defende pornografia, y nan ta pretende cu no tin prueba cu imagennan pornografico tin un efecto negativo riba hende. E escritor F. M. Christensen a skirbi: “Al fin y al cabo, pornografia ta simplemente fantasia, un echo cu su oponentenan aparentemente tin dificultad pa compronde.” Pero si fantasia no tin ningun influencia, ta riba kico e industria di propaganda comercial ta basa? Dicon corporacionnan ta gasta miyones di florin pa produci video y propaganda na radio, television y den literatura si nan no tin ningun impacto duradero riba hende?

Echo ta cu, mescos cu tur propaganda exitoso, pornografia su proposito principal ta pa crea deseonan cu no tawata t’ei prome. Investigadonan Steven Hill y Nina Silver a skirbi: “Pornografia ta motiva pa ganashi, y nada otro. Y den e mercado fuera di control aki, nan ta considera kico cu ta como algo cu bo por bende pa ganashi, specialmente curpa di hende mohe y relacionnan sexual humano.” Germaine Greer a compara pornografia cu cuminda sumamente adictivo y sirbi rapidamente [fast food], cu no tin ningun balor nutritivo y cu ta mescla cu substancia- y kimiconan agrega pa mehora e sabor. El a bisa: “Fast sex [sex rapidamente disponibel via medionan di comunicacion] no ta berdadero sex . . . Propaganda di cuminda ta promove benta di cuminda di fantasia, y propaganda di sex ta promove benta di sex di fantasia.”

Tin docter ta bisa cu pornografia por inicia un adiccion cu ta hopi mas dificil pa vence cu adiccion na droga. Tratamento di drogadicto por lo general ta cuminsa cu e proceso di elimina e substancia adictivo for di nan curpa, loke ta wordo yama desintoxica. Pero segun un splicacion di dr. Mary Anne Layden di Universidad di Pennsylvania, adiccion na pornografia “ta produci imagennan mental cu ta keda permanentemente graba den mente di e uzado y cu ta bira parti di e procesonan kimico di e celebro.” Ta pesei hende por corda cla cla imagennan pornografico cu nan a mira hopi aña pasa. Dr. Layden a conclui: “Esaki ta e prome substancia adictivo pa cua no tin speransa di desintoxica.” Pero esei kiermen cu ta imposibel pa libra di e influencia di pornografia? Y ki daño spesifico pornografia ta causa?

[Cuadro na pagina 5]

Cifranan di Pornografia Riba Internet

◼ Rond di 75 porshento di pornografia riba Internet ta origina na Merca. Casi 15 porshento ta origina na Europa.

◼ Ta ser calcula cu un 70 miyon hende pa siman ta bishita website pornografico. Rond di 20 miyon di nan ta na Canada of Merca.

◼ Un estudio a revela cu resientemente durante un solo luna, Alemania tawatin e grupo mas grandi di hende na Europa cu a wak pornografia riba Internet, sigui pa Gran Bretania, Francia, Italia y Spaña.

◼ Na Alemania, esnan cu ta wak pornografia riba Internet ta dedica un promedio di 70 minuut tur luna na website pornografico.

◼ Entre e Europeonan cu ta wak pornografia riba Internet, personanan riba 50 aña di edad ta dedica mas tempo conecta na website cu ta presenta material sexual detaya.

◼ Segun un fuente, 70 porshento di hende cu ta bishita website pornografico ta haci esei den dia.

◼ Ta ser calcula cu un 100.000 website tin tambe material riba pornografia di mucha.

◼ Rond di 80 porshento di pornografia comercial di mucha riba Internet ta origina na Hapon.

[Plachinan na pagina 4]

Pornografia a bira mas accesibel