Pornografia—Opinionnan Contradictorio

“E ta lanta apetit cu lo no mester existi; e ta stimula pasionnan cu nunca lo mester wordo satisface.”—Tony Parsons, columnista.

JOHN nunca tawatin intencion di bira adicto na ‘sex riba Internet.’a Mescos cu hopi otro hende cu accidentalmente ta bin den contacto cu pornografia y chat room di sex, John a topa cu un site cu ta ofrece e tipo di chat room ei un biaha cu e tawata uza Internet. No a tarda hopi, cu e tawata completamente absorba den cybersex, es decir, sex riba Internet. John ta conta: “Mi tawata warda mi casa bai trabou, anto mi ta bula lanta for di cama y pasa oranan largo dilanti di computer.” Durante sesionnan maratonico, e no tawata ni stop pa bebe of come algo. John a bisa: “Mi no tawata sinti hamber mes.” El a cuminsa gaña su casa tocante su actividad secreto. Y e actividad ei a cuminsa afecta su consentracion na trabou, y el a bira mas y mas desconfia. Su matrimonio a cuminsa bai atras, y ta ora cu el a haci areglo pa topa cu un di su partnernan di cybersex en persona, su casa a ripara ta kico tawata pasando. Awe John ta hayando tratamento pa su adiccion.

Activistanan antipornografia ta cita e tipo di experencianan ei como prueba di e efectonan degrada di pornografia. Nan ta bisa cu e ta destrui relacionnan personal y ta rebaha hende mohe, abusa di mucha y ta fomenta un punto di bista troci y perhudicial di sex. Di otro banda, esnan cu ta na fabor di pornografia ta defend’e como libertad di expresion y ta considera e activistanan como hende demasiado decente. Un proponente a skirbi: “Hende no mester tin berguensa di nan orientacion of deseonan sexual. Por uza pornografia como un medio pa start y stimula combersacionnan franco tocante sex.” Tin hende ta asta indica cu e aumento di pornografia ta e caracteristica di un sosiedad sano y sin tabu. E escritor Brian McNair a bisa: “Un sosiedad suficiente madura pa trata cu e presentacion detaya di sex cu ta ser practica entre adultonan di comun acuerdo, probablemente ta un sosiedad cu lo sintie comodo cu varios tipo di orientacion sexual [manera homosexualidad y lesbianismo] y cu igualdad di hende mohe.”

E echo cu sosiedad tin opinionnan mixto relaciona cu pornografia ta hacie aceptabel? Dicon e ta asina plama? Di berdad pornografia ta un actividad peligroso? E siguiente articulonan lo analisa e preguntanan aki.

[Nota]