Observando Mundo

“Mangel” pa Parha

‘Un mata di Brasil ta uza un strategia cu te cu awor tawata desconoci, pa aumenta su porsentahe di polinisacion’, segun e corant Aleman GEO. En bes di un bebida di nectar likido, e mata Combretum lanceolatum ta ofrece su bishitantenan “mangel.” Di anochi pa mainta e flornan di e mata aki ta produci pipitanan di gelatina zoet cu ta bira clompinan duro di un diameter di mas o menos 6 milimeter. Sucu di mata ta haci e gelatina zoet, y segun investigadonan e ta smak “un tiki manera ‘jelly babies’,” un tipo di mangel comercial cu sabor di fruta y den forma di beer. E informe ta splica cu “ora solo sali y e flor habri su petalonan, e mangelnan lombrante y transparente ta cla poni como si fuera riba un teblachi.” E delicia aki cu e flornan ta produci ta atrae por lo menos “28 sorto di parha for di ocho famia.” Segun cu e parhanan ta sigui busca cuminda y ta bai di mata pa mata, nan ta keda tur na e polen, y asina nan ta yuda e mata plama mas lihe.

Bula Mas Saludabel

Pa bo tin un buelo mas placentero, e corant di Ciudad di Mexico, El Universal, ta sugeri lo siguiente: (1) Como cu aire den cabina di avion sa ta masha seco, bebe hopi likido. (2) Aire seco por irita bo wowonan, pesei bisti bril na luga di lens di contacto. (3) Haci ehercicionan simpel den bo stul pa relaha bo musculonan y stimula circulacion den bo pianan. (4) Rato rato lanta cana den gang. (5) Bisti sapato cu ta facil pa kita, y uza algo pa pone bo pianan ariba, talbes bo handbag. (6) Bisti paña comodo cu no ta machica, di tela cu fibra natural cu ta laga bo cuero hala rosea. (7) No bebe alcohol, of bebe un cantidad modera, pasobra mas halto e avion ta bula mas esei ta aumenta e efecto di alcohol. (8) Ahusta e airco pa e no supla riba bo nek ni den bo lomba. (9) Purba drumi, preferiblemente uzando algo pa tapa bo wowonan cu ne. (10) Cou algo ora e avion ta lanta y ora e ta baha pa alivia e presion den bo horea. Bo por duna baby un chupon.

Muchanan Malcria na Alemania

Hende a ripara cu serca mayornan tin ‘un tendencia nobo di haci loke muchanan kier’, segun Udo Beckmann, presidente di un sindicato di maestronan na Alemania. Segun e corant Südwest Presse, Beckmann a bisa cu mas y mas mucha ta ser malcria sin fin, y como resultado, nan no ta dispuesto pa haci nan best na scol. “El a declara cu ta masha normal pa mayornan sinti cu huiswerk ta pone ‘demasiado presion’ riba nan yiunan y cu ta ‘irasonabel’ pa exigi cu muchanan mester siña pa proefwerk.” Tambe e informe ta bisa cu ora mayornan constantemente ta haci loke nan yiunan kier, djis pa evita conflicto, e mayornan ta priva e yiunan di “e chens di hiba un bida responsabel.” Segun Beckmann, muchanan malcria ta crece bira “adultonan egoista” cu kier tur cos pero cu no ta dispuesto pa traha pa nada.

Lesamento di Bijbel na Francia

Aunke 42 porshento di Frances cu nan a entrevista tawatin un Bijbel, ta 2 porshento so a bisa cu nan ta les’e casi tur dia, segun un encuesta publica den e corant catolico La Croix. Setentidos porshento ta bisa cu “nunca nan ta lesa Bijbel.” Di esnan entrevista, 54 porshento a considera Bijbel “un buki anticua” cu “no ta na harmonia cu mundo moderno.” E informe ta splica cu “na prome luga Francesnan ta considera Bijbel for di un punto di bista cultural”, y ta analis’e pa nan haya un splicacion di “e origen di hudaismo y cristianismo.” La Croix ta declara cu “tur aña, nan ta bende rond di 250.000 Bijbel y 30.000 Testament Nobo na Francia.”