Bo Cabei Ta Precupa Bo?

KISAS abo ta un di e hopi personanan cu tur dia ta tuma tempo dilanti un spiel pa examina nan cabei cuidadosamente. Tanto hende homber como hende mohe ta interesa den nan cabei, y tin bes e por ta un fuente di precupacion.

Siña Conoce Bo Cabei

Bo sa cuanto drachi di cabei bo tin riba bo cabes? Un promedio di mas o menos 100.000. Un drachi di cabei no ta sigui crece pa semper, sino pa solamente dos te seis aña. E ora ei e ta cai, y despues di un periodo un drachi nobo ta cuminsa sali for di e mesun porio. E ciclo di bida di un drachi di cabei ta wordo yama un ciclo di cabei. (Mira e cuadro na pagina 27.) Pa motibo di e ciclo aki, asta si bo no tin problema cu cabei, ta normal pa aproximadamente 70 pa 100 drachi di cabei cai tur dia.

Dicon ta existi un variedad di colo di cabei? The World Book Encyclopedia ta splica: “E colo di cabei ta wordo determina pa un gran parti door di e cantidad y distribucion di pigment bruin of preto cu yama melanin.” Melanin ta un pigment biologico cu bo ta haya den cabei, cuero y wowo. Mas hopi e cantidad di pigment ta, mas scur e cabei ta. Segun cu e cantidad di melanin ta baha, e colo di cabei ta varia di preto pa bruin, cora, of blond. Si e cabei no tin ningun tiki melanin, e ta mustra blanco briyante.

Fuera di casca, loke ta precupa hopi hende ta cu nan cabei ta cai of e ta bira blanco.

Bo Tin Cabei Blanco?

Hopi bes hende ta mira cabei blanco como un señal di enbiehesimento. Pesei, cabei blanco hopi bes ta wordo mira como un caracteristica di hende di edad avansa. Ta berdad cu e cabeinan blanco ta bira mas hopi segun cu e hende ta bira grandi. Sinembargo, ademas di enbiehesimento, otro factornan conoci cu ta pone hende haya cabei blanco ta, tenemento di diet mucho streng of cada bes. Sin importa ki sexo e persona tin of ki colo di cabei natural e tin, e ta haya cabei blanco. Sinembargo, esaki lo por ta mas riparabel serca hende cu tin cabei mas scur.

Door cu algun hende jong tin cabei blanco, nan ta mustra mas bieu y esei por precupa nan un poco. Di otro banda, tin hende cu no tin cabei blanco, pero nan ta precupa cu e desbalansa cu ta existi entre nan aparencia y nan edad.

No ta ora un cabei bira blanco el a muri. En realidad, e parti visibel di tur cabei ta morto caba. Cada drachi di cabei ta bai hundo den e cuero. Na Ingles e parti aki ta wordo yama e bulb door cu e tin forma di un bombio. Esaki ta e unico parti cu ta bibo. E bulb ta funciona como e fabrica di e drachi di cabei. Partimento rapido di cel den e bulb ta forma drachi di cabei, y esaki ta absorba melanin. Melanin ta wordo produci door di cel di pigment. Pesei ora cu cel di pigment stop di produci melanin, e cabei ta bira blanco.

Ningun hende no sa ainda dicon cel di pigment diripiente ta stop di produci melanin. Pesei mes hende no a logra inventa un bon tratamento pa preveni cu cabei ta bira blanco. Tambe ta conoci cu cel di pigment cu a stop di funciona por bolbe cuminsa traha atrobe. Ta interesante cu Bijbel ta contene hopi expresion relaciona cu cabei. Y un di e ilustracionnan cu Hesus a duna ta referi na cabei blanco. El a bisa: “Ni un drachi di cabei bo no por haci blanco ni preto.” (Mateo 5:36) E palabranan aki ta indica cu pa hopi tempo caba hende a reconoce cu nan no por preveni ni cura e proceso aki.

Algun hende ta purba tratamentonan nobo, manera uzo di inyeccion di melanin. Otro personanan ta opta pa tiña nan cabei, y esaki sigur no ta un cos nobo. Antes, tanto e Griegonan como e Romanonan tawata uza tiña pa cabei. E Egipcionan di antiguedad a uza sanger di toro pa tiña nan cabei. Tin informacion cu ta indica cu Herodes e Grandi, kende tawata contemporaneo di Hesucristo, a laga tiña su cabei blanco pa hende no haya sa su edad.

Sinembargo, pa un hende sigui tiña su cabei e ta exigi tempo y esfuerso, y algun hende por haya problema cu cuero of reaccion alergico. Asta si bo dicidi di tiña bo cabei cu ta birando blanco, por ta e dia lo yega cu lo bo kier stop, e ora ei sin duda bo ta haya bo cu e cabeinan cu ta crece y cu ta mustra e berdadero colo di e cabei. E banda positivo di cabei blanco ta, cu e por mustra elegante y duna bo un dignidad cu bo no tawatin prome. Bijbel ta comenta: “Cabei blanco ta un corona digno, cu bo ta gana ora bo biba segun Dios su palabra.”—Proverbionan 16:31, Beibel na papiamentu koriente.

Otro Problemanan di Cabei

Otro problemanan di cabei ta drachi di cabei cu ta bira fini y cabes cu ta bira pelon. E problemanan aki tambe a existi pa hopi tempo. Den Egipto di antiguedad tawatin producto pa preveni cu un persona su cabes ta bira pelon. E producto aki tawata contene ingredientenan manera vet di leon, hipopotamo, crocodil, pushi, colebra y gans. Awendia tin masha hopi tratamento pa cabei y cuero di cabes riba mercado cu nan ta bisa cu ta bon, y tur aña hende ta gasta un cantidad enorme di placa na esakinan.

Un hende su cabes ta bira pelon ora su cabei ta crece abnormal. Cabei saludabel por cuminsa crece abnormal door di por ehempel, comemento robes, keintura halto pa mucho tempo, of cierto tipo di malesa di cuero. Loke tambe por afecta crecemento di cabei ta embaraso y dunamento di lus. Durante e periodo ei hopi cabei ta cai sin cu tin cabei nobo cu ta cla pa sali. Sinembargo, ora e causa no t’ei mas, caimento di cabei pa e motibo ei ta stop y e cabei ta crece normal atrobe.

Un otro tipo di perdida di cabei yama alopecia.a Hopi bes ora un hende tin e problema aki diferente parti di su cabes ta bira pelon. Un investigacion medico actual ta indica cu posiblemente problema cu e sistema di inmunidad ta causa alopecia.

E forma mas comun di perdida di cabei ta presenta serca hombernan cu ta bira cabes pelon. E cabeinan na e parti dilanti di e cabes of na e corona ta bira tiki, y gradualmente e ta bira mas piyo. E cabei ta cuminsa crece di un manera abnormal den e areanan afecta y finalmente lo e stop di crece. E Encyclopædia Britannica ta splica: “Na e area afecta di e cabes, e cabei bieu cu tawata largo, fuerte y cu pigment ta wordo remplasa door di drachi di cabei fini cu yama vellus.” Esaki a nifica cu segun cu e cabei ta sigui crece, e ta bira mas tiki, ta biba menos y finalmente ningun cabei nobo lo no crece mas. Esaki ta e resultado di un combinacion di caracteristica hereditario y hormon masculino.

E proceso den cua esnan di sexo masculino ta bira cabes pelon por cuminsa durante e prome añanan di teenager, pero e ta sosode mas tanto serca hende homber cu tin trinta y pico of cuarenta y pico aña. Maske hopi hende homber ta experencia e tipo di perdida di cabei aki, e cantidad di caso ta varia di rasa pa rasa y di hende pa hende. Lamentablemente, te asina leu nan no a haya un cura pa e enfermedad aki. Tin hende kisas ta scohe pa bisti un peluca of haci transplante di cabei. Serca hopi hende, cuida e cabeinan cu a keda por yuda mengua e perdida di cabei.

Si e drachi di cabei di un hende ta bira fini esei no ta nifica automaticamente cu e ta perdiendo cabei. Mas bien, door cu e drachinan di cabei ta birando mas fini, esaki ta pone cu e cabei ta perde su volumen. Con diki un drachi di cabei ta? Segun un estudio, e por varia di 50 micron den caso di algun persona te 100 micron den caso di otro personanan.b Segun cu e hende ta bira grandi, su drachinan di cabei ta bira mas fini. Djis algun micron di diferencia kisas no ta parce importante. Pero corda cu tin 100.000 drachi di cabei. Pues si cada drachi di cabei bira djis un tiki fini esei ta resulta den un diferencia grandi den e volumen total.

Cuida Bo Cabei

Cabei ta crece mas cu 10 milimeter pa luna, y e ta un di e partinan di curpa cu ta desaroya mas rapido. Si conta e crecemento di tur e cabeinan hunto, e ta yega mas cu 20 meter pa dia!

Maske no tin ningun tratamento medico ainda pa elimina e causa di cabei blanco y cabes pelon, nos lo por haci varios cos pa cuida e cabeinan cu nos tin. Ta masha importante pa come cuminda saludabel y stimula nos circulacion di sanger den nos cuero di cabes. Si un hende ta tene diet di mas of ta come di un manera desbalansa esei por pon’e haya cabei blanco, bira cabes pelon y perde volumen di cabei mas lihe. Profesionalnan ta recomenda pa nos laba nos cabei regularmente cu shampo y tambe duna nos cuero di cabes masashi, pero sin huñ’e. Esaki ta stimula circulacion di sanger den e cuero di cabes. Ora bo caba di shampo bo cabei, haw’e bon.

No skeiro bo cabei di un forma bruto. Si bo tin cabei largo, ta miho pa bo no cuminsa skeir’e for di cuero te na punta. Mas bien, prome tene e puntanan di bo cabei anto saca e conopinan prome. Despues skeiro di meimei bai abou. Anto finalmente laga bo cabei bai y skeir’e di cuero te na punta.

Kisas bo ta cuminsa precupa ora bo descubri cabei blanco of hopi cabei cu a cai. Pero corda cu hopi bes otro hende no ta dje precupa ei tocante bo cabei manera abo mes. Ta abo mester sa si bo kier tiñ’e of no, si bo kier uza peluca of ta busca otro tratamento. No ta importa ki colo di cabei bo tin ni cuanto cabei bo tin, loke ta importante ta pa bo manten’e limpi y nechi.

[Nota]

[Cuadro/Diagram na pagina 27]

CICLO DI CABEI

E crecemento di cabei ta consisti di varios fase: crecemento, e fase cortico di transicion y e fase di descanso. The World Book Encyclopedia ta splica: “Un cabei ta stop di crece durante cada fase di descanso. . . . E cabei bieu ta keda den un saco di cabei te ora e siguiente fase di crecemento cuminsa. Durante e fase di crecemento, un cabei nobo ta crece den e saco di cabei y ta pusha e bieu saca afo.” Na cualkier momento, mientras 85 pa 90 porshento di cabei ta den e fase activo, 10 pa 15 porshento ta den e fase di descanso y 1 porshento den e fase di transicion.

[Diagram]

(Pa e texto den su formato completo, wak e publicacion)

Principio di crecemento

Crecemento activo

saco di cabei

adernan

saco di vet

drachi di cabei

Degeneracion

Descanso

Crecemento di nobo