Mexico Su Festividadnan di Vía Crucis
DI E CORESPONSAL DI SPIERTA! NA MEXICO
PA CONMEMORA e morto di Hesus, tin alrededor di 300 festival religioso tur aña na Mexico. Un di esnan mas grandi ta e Vía Crucis, cu su procesionnan y reconstruccion di e ultimo dianan di Hesus su bida riba tera. Vía Crucis ta un expresion na Latin y ta nifica “Caminda di Crus.” Den e districto di Iztapalapa di Ciudad di Mexico, e director di e Cas di Cultura local a splica kico ta su origen: ‘Na 1833, tawatin un epidemia di colera na Iztapalapa. Pa plakia e daño, e miembronan di e comunidad a cuminsa hunga drama di e relato di Hesus su sufrimento cuminsando cu e Ultimo Cena te ora el a muri.’
Esaki ta e manera cu un Vía Crucis tipico tawata tuma luga: Un gran cantidad di hende ta reuni pa wak e personahenan di e drama: lidernan Hudiu, oficialnan di ehersito Romano, Hesus su apostelnan y e hende mohenan cu tawata siguie, entre otro Maria. Un homber jong ta hunga e papel di Hesus. E ta siña pasashinan di Bijbel for di cabes pa e por cita nan segun cu susesonan ta desaroya. E actornan ta uza peluca, barba y mustashi anto ta bisti mantelnan diki. “Nazarenonan” tambe ta sigui “Hesus”, pia abou of bisti cu sandalia di cuero, cu corona di sumpiña riba nan cabes pa imita e sufrimento cu Hesus a pasa aden. Tin biaha tin mas cu 2.500 Nazareno. Durante dia nan ta carga crus mientras nan ta subi Cerro de la Estrella, e luga selecta pa supuestamente crusifica Hesus.
Bendedonan den caya ta ofrece productonan manera sombre, bebida, figuranan religioso pa stempel na cara of brasa, blas, mangel pa mucha y hopi otro cos. Pa e ocasion ei nan ta asta organisa parkenan di recreo cu tin weganan manera cabaito.
Den e stad di Querétaro, hende cu a repenti di nan picanan ta purba cana cu pia mara na cadena. Na Taxco, hombernan ta carga bultonan di sumpiña cu ta pisa 40 pa 50 kilo riba nan lomba pa casi cinco ora. Otro personanan den e procesion ta suta nan mes. Hopi bes varios participante ta haya nan ta bai hospital.
E tipo di adoracion aki podise ta haci nos corda riba e palabranan di apostel Pablo ora el a papia contra ‘religion cu hende mes a traha, y humildad falso y trato severo di curpa.’ (Colosensenan 2:23) Ta cierto cu cristiannan berdadero ta recorda Cristo su morto, pero nan no ta participa den tradicion cu tin origen falso y cu ta na conflicto cu principionan biblico.