E Batidonan di Paña di Bamako

HENTER dia bo por tende un batimento ritmico na Bamako, capital di e pais Mali na West Africa. Sinembargo, no ta musiconan ta toca. E zonido manera tambu ta sali mas bien for di e hut chikito di e batidonan di paña. Pero dicon nan ta bati paña?

Na e pais aki nan ta traha tela di paña na un manera straño. Den e ultimo parti di e proceso nan ta bati e tela. Tur cos ta cuminsa cu un pida paña of un articulo di paña blanco. Generalmente nan ta tiñ’e cu varios colo y hinca dibuho den dje. Despues nan ta dop e den un likido diki traha di yuca raspa of lechi di varios palo cu ta saca lechi manera palo di mispel. Ora e tela seca den solo e ta bira stijf manera un tabla. Na e momento aki e ta cla pa e ultimo fase, serca e batidonan di paña.

E trabou principal di e batidonan di paña ta pa bati e tela cu ta stijf awor te ora saca tur machica. Den nan hutnan chikito ta masha normal pa bo haya dos yoncuman sinta dilanti otro; entre nan tin un pida stam di palo di shea. E hombernan ta hunta e tela cu un tiki was y ta habrie riba e palo. Despues nan ta bati e tela cu un tipo di martiu cu tambe ta traha di palo di shea. Nan ta bati e tela beurt pa beurt den un harmonia perfecto. Caminda esun salta e otro ta bati y caminda esun bati e otro ta salta.

Dicon nan no ta uza djis un hero di strica? Un motibo ta cu e cayente di e hero di strica por pone e paña perde colo mas lihe. Hunto cu esei, un hero di strica lo no produci colonan bibo manera e batidonan di paña si ta produci. Esei ta asina pasobra cada sla di martiu cu nan dal ta duna e tela un briyo cu ta haci e colo mas bibo. Despues cu nan caba di bati e tela completo, e por briya asina tanto cu bo por kere cu ta caba a caba di tiñ’e.

Pues, si bo ta cana den e cayanan di e stad aki y bo tende un zonido cu ta parce zonido di tambu, wak e hutnan rond di bo bon. Kisas no ta ningun zonido di tambu; podise ta e batidonan di paña di Bamako.