E Punto di Bista Biblico

Loke Bo Mester Sa Tocante Pasco

MIYONES di hende rond mundo ta preparando pa disfruta di e temporada di Pasco 2002. Kisas bo tambe ta un di nan. Di otro banda, podise no ta bo custumber pa participa den e aspectonan religioso di e celebracion popular aki. Sea cual sea e caso, probablemente lo bo no por scapa e influencia di Pasco. El a penetra den mundo di comercio y entretenimento, asta den paisnan cu no ta cristian.

Kico bo sa di Pasco? Bijbel ta apoya celebracion di e nacemento di Cristo? Kico tin tras di e celebracion popular aki cu ta ser teni tur 25 di december?

Pasco Prohibi

Si bo tuma un rato pa investiga e topico aki, lo bo descubri cu Pasco no a origina di cristianismo berdadero. Hopi experto di Bijbel di varios religion ta reconoce esaki. Cu esei na mente, no mester straña bo cu na aña 1647 na Inglatera, e Parlamento di Cromwell a decreta cu Pasco mester ta un dia di penitencia y despues a prohibie completamente na 1652. For di aña 1644 te cu 1656 Parlamento tawata reuni a proposito tur aña dia 25 di december. Segun historiado Penne L. Restad, “pastonan cu a predica tocante e nacemento di Cristo a core e riesgo di ser encarsela. Y laiconan cu a dorna misa pa Pasco por a haya boet. Lei a obliga negoshinan keda habri dia di Pasco como si fuera tawata un dia normal di trabou.” Dicon nan a tuma medidanan drastico asina? Pasobra e reformadonan protestant di e grupo puritano tawata di opinion cu iglesia no mag crea tradicion cu no a existi den e Scritura. Activamente nan tawata predica y distribui literatura cu a denuncia celebracion di Pasco.

Na Nort America tambe tawata reina e mesun pensamento. Pasco tawata prohibi den e colonia di Massachusetts Bay entre aña 1659 y 1681.a Segun un lei cu nan a decreta e tempo ei, no tawatin mag di celebra Pasco den ningun forma. Hende cu a kibra e lei aki a haya but. No ta e puritanonan di New England, e estadonan nortost di Merca, so no kier a celebra Pasco, sino tambe algun grupo di e colonianan den e parti central. E quakernan (un otro grupo protestant di Pennsylvania) tawata mesun inflexibel cu e puritanonan pa loke ta e celebracion di Pasco. Segun un fuente, “djis despues cu Mericanonan a logra haya nan independencia, Elizabeth Drinker, kende tambe tawata un quaker, a parti habitantenan di Filadelfia den tres categoria. Tawatin quaker, cu ‘no tawata consider’e [Pasco] mas cu otro dia’, tawatin esnan cu a celebr’e pa motibonan religioso y e resto cu a ‘pasa e dia den paranda y libertinahe.’”

Henry Ward Beecher, un famoso predicado Mericano cu a lanta den un famia ortodox calvinista, no tawata sa casi nada di Pasco sino te ora cu e tawatin 30 aña. Na 1874 Beecher a skirbi: “Ami no tawata sa mes kico ta Pasco.”

E prome iglesianan bautista y congregacionalista tampoco no a haya un base biblico pa celebra e nacemento di Cristo. Un fuente a comenta cu ta dia 25 di december 1772 numa e Iglesia Bautista di Newport [Rhode Island, Merca] a celebra Pasco pa prome bes. Esaki tawata mas o menos 130 aña despues cu nan a funda e prome iglesia bautista na New England, Merca.

Origen di Pasco

New Catholic Encyclopedia ta admiti: “E fecha di e nacemento di Cristo no ta conoci. E evangelionan no ta indica ni e dia ni e luna . . . Segun e teoria di H. Usener . . . y acepta pa mayoria experto awe, nan a laga e nacemento di Cristo cai riba e fecha di e solsticio di winter (25 di december riba kalender Juliano, 6 di januari riba e kalender Egipcio), pasobra riba e dia aki, segun cu solo ta cuminsa bolbe bek na e hemisferio nort, e debotonan pagano di Mitra a celebra e dies natalis Solis Invicti (dia di nacemento di e solo invencibel). Dia 25 di des. di aña 274, Aureliano a proclama e dios solo como patrono principal di e imperio y a dedica un tempel na dje riba e Tereno di Marte. Pasco a origina den un tempo cu e adoracion di solo tawata sumamente fuerte na Roma.”

E Cyclopœdia di M’Clintock y Strong ta bisa: “E celebracion di Pasco no a ser institui pa Dios, ni e no a origina dje T[estament] N[obo]. Hende no por saca afo ki dia Cristo a nace for di e T[estament] N[obo], ni for di ningun otro fuente.”

Un “Engaño Vano”

En bista di lo anterior, ta corecto pa cristiannan berdadero participa den tradicionnan di Pasco? Dios ta keda contento ora cu nos mescla su adoracion cu creencianan y practicanan religioso di esnan cu no ta ador’e? Apostel Pablo a spierta na Colosensenan 2:8: “Mira pa ni un hende no cohe boso preso door di filosofia y engaño vano, segun tradicion di hende, segun e principionan elemental di mundo, y no segun Cristo.”

Tambe e apostel a skirbi: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad? Of ki harmonia Cristo tin cu Belial [Satanas], of kico un creyente tin comun cu un incredulo?”—2 Corintionan 6:14, 15.

En bista di e evidencia innegable cu tin disponibel, Testigonan di Yehova no ta participa den celebracionnan di Pasco. Na harmonia cu e Scritura, nan ta haci esfuerso pa practica “e religion puro y sin mancha den bista di nos Dios”, door di mantene nan mes “liber di mancha di mundo.”—Santiago 1:27.

[Nota]

[Comentario na pagina 24]

Na aña 1652 Parlamento di Inglatera a prohibi Pasco

[Comentario na pagina 25]

“Ami no tawata sa mes kico ta Pasco”—HENRY WARD BEECHER, PASTO MERICANO

[Plachi na pagina 25]

Debotonan pagano di Mitra y di e dios solo (mustra den relieve riba muraya) a celebra 25 di december

[Reconocemento]

Musée du Louvre, Paris