‘Nos Ta Obedece Dios Mas cu Hende’

Tempo cu Adam tawatin 17 aña di edad, e tawata un di e tres ganadonan di un competencia patrocina door di e Museo pa Conmemora Holocaust na Merca. Na tur, casi 500 persona a entrega sea un obra di arte of un obra skirbi pa ilustra curashi bou di opresion Nazi. Adam ta un Testigo di Yehova, y el a dicidi di crea un collage, un composicion artistico colorido traha di varios material, cu a mustra con miembronan di su religion a sufri bou dje regimen Nazi. Adam a bisa cu e obra di arte no a refleha derota ni amargura, sino goso pa e echo cu Testigonan di Yehova a sali victorioso for di e atake di e opresor cruel ei. Den e obra bo ta mira un mucha. Dicon? Segun Adam: “Pa mustra cu asta mucha a para firme contra e persecucion Nazi.”

Ta bon conoci cu durante e era Nazi, Testigonan di Yehova a nenga di bisa “Heil Hitler” of di apoya Hitler su partido politico. Nan posicion firme a keda ilustra den e skina na man drechi ariba den Adam su collage. Einan tin palabranan cita for di un carta cu tur congregacion di Testigonan di Yehova a manda pa gobierno Aleman dia 7 di october 1934. En parti e carta a bisa: “Tin un conflicto direct entre boso lei y Dios su lei, y siguiendo e ehempel di e fiel apostelnan, ‘nos mester obedece Dios mas cu hende’, y esaki ta loke nos lo haci tambe. (Echonan 5:29) . . . Como cu boso gobierno y su funcionarionan ta sigui purba forsa nos pa desobedece e lei di mas halto di universo, nos ta haya nos obliga di notifica boso cu, Dios mediante, nos lo obedece Yehova Dios y confia plenamente den dje cu E lo libra nos for di tur opresion y opresor.”

Adam ta orguyoso di su herencia spiritual. El a bisa: “Testigonan di Yehova a kere firmemente cu nan no mester causa daño na nan prohimo y cu nan mester adora Dios so, asta si esaki a nifica nan morto.” E posicion dicidido di Testigonan di Yehova ta ser refleha den e titulo di Adam su collage: “Nos Lo Obedece Dios Mas cu Hende!”