For di Nos Lectornan

Pas Mundial E serie “Pas Mundial Ta Djis un Soño?” (8 di mei 2002) ta hopi bon skirbi. Mara tur politico por les’e. Boso publicacionnan ta duna di compronde bon cla kico un persona mester sa y con e mester biba.

J. S., Republica Checo

Oido Masha danki pa e articulo “Proteha Bo Oido!” (8 di juni 2002) Mi ta den mi prome aña di training pa bira un specialista di aparato di oido. Esei kiermen cu tur dia mi ta mira e efectonan di bochincha. Ta importante pa haci specialmente hobennan conciente di e bochincha cu tur dia nan ta expone nan mes na dje.

C. K., Alemania

Observando Mundo Danki pa e articulo titula “Compronde Malesa Mental” den e seccion di “Observando Mundo.” (8 di juni 2002) Mi a sufri di depresion manico pa 18 aña. Apesar di e malesa aki, mi tawatin un bida productivo. Mi a lanta tres yiu homber y tawata un bon casa pa mi esposo. Tambe mi a yuda algun hende haya conocemento di Bijbel. Mi tin un famia amoroso y amigonan amoroso den congregacion. Danki pa e revista Spierta! E ta eleva nos tur na e mesun nivel di educacion.

H. B., Sur Africa

Hobennan Sa Puntra Danki pa publica e articulo “Hobennan Sa Puntra . . . Con Mi Ta Haci si Mi Topa un Mucha di Mi Scol?” (8 di maart 2002) Hopi aña pasa mi tawata un teenager masha timido mes y gago. Sirbishi di veld tawata dificil pa mi, specialmente ora mi topa muchanan di mi scol. Mi tin sigur cu e articulo aki lo ta un gran yudansa pa otro hobennan.

W. T., Merca

Mi a haya e articulo “Hobennan Sa Puntra . . . Con Mi Por Haya un Bon Compañero di Cuarto?” (8 di juni 2002) masha instructivo. Mi no ta jong, pero poco tempo pasa mi a diborcia for di mi casa. Mi a keda geshock ora mi a ripara con caro costo di bida ta, y cu mi no por a biba riba mi mes. E unico recurso cu a keda mi tawata di busca un compañera di cuarto. M’a pensa cu debi na mi edad, esei lo bai ta un problema. Pero un ruman mohe jong, cu tawata nobo den nos congregacion, tambe tawata busca un compañera di cuarto. Nos a bai biba hunto. E areglo tawata realmente un bendicion. Despues di poco tempo, nos a haya nos den un preta financiero, y un otro ruman mohe a bin biba hunto cu nos. Mi tin cu bisa cu ta solamente den Yehova su organisacion un wela di 60 aña y dos mucha mohe jong di diferente background por biba hunto den asina tanto pas y amor! Nos a bira un famia chikito, y den hopi manera esei a yena un bashi cu tawatin den nos bida.

L. G., Merca

Conseho Confiabel Danki cu boso ta percura asina un abundancia di material instructivo pa lesa. Boso articulonan ta cubri un inmenso variedad di topico, y distinto for di hopi otro publicacion, boso ta mantene un actitud imparcial y respetuoso pa cu creencianan di otro hende. Pa mi, Spierta! a bira un amigo intimo y inseparabel, un fuente di conseho confiabel cu ta yuda mi confronta e problemanan di bida cu un speransa.

N. P., Brazil