For di Nos Lectornan

Dia di Casamento Mi a disfruta masha di e serie di portada “E Dia di Casamento—Hacie un Comienso Placentero.” (8 di februari 2002) Como un hoben mi ta preparando mi mente pa e paso importante di matrimonio. E articulonan aki a yuda mi comprende con mi mester haci e preparacionnan sin e stress cu generalmente hopi pareha jong ta haya nan cu ne. Tambe nan a siña mi con pa mantene e union felis. Por fabor, no stop nunca di presta atencion na nos cu ta haci esfuerso pa practica loke Yehova ta rekeri di su sirbidonan.

F. C., Italia

Semper mi ta keda asombra di e manera cu Yehova ta percura net e guia cu mi tin mas mester di dje. E Spierta! di 8 di februari no ta un excepcion. Ami cu mi comprometido tawatin algun luna ta prepara pa nos casamento y nos a cuminsa sinti cu tension ta afecta nos. E articulonan di introduccion a recorda nos cu e lunanan di planiamento aki eigenlijk mester ta lunanan maravioso y cu e unico cos cu ansiedad ta causa ta dolo di curason.

H. M., Australia

Pagina 10 di boso serie di portada ta indica cu ta aceptabel pa un esposo bandona su hogar si e ta haya cu e tin motibo balido pa separacion. Ami cu mi casa no por haya ningun texto den Bijbel cu ta apoya e ponencia aki. De echo, ta parce cu Bijbel ta mustra net contrario, esta, cu e esposa por bandona su hogar, pero cu e esposo tin cu keda. Genesis 2:24 ta declara cu un homber mester “uni cu [“pega na”, NW] su esposa.” Y 1 Corintionan 7:11 [NW] ta bisa prome: “Si realmente e [esposa] bai”, y despues e ta agrega cu “un esposo no mester bandona su esposa.”

K. L., Australia

Spierta! ta contesta: Nos mester considera Genesis 2:24 den su contexto. Dios no a duna e mandato aki como guia relaciona cu un posibel separacion. E carta cu Pablo a skirbi e Corintionan ta mustra bon cla cu Yehova ta duna hopi balor na matrimonio, y cu un pareha mester haci tur esfuerso posibel pa conserva nan matrimonio. Sinembargo, ta bisto cu no tawata Pablo su intencion pa crea dos norma: un pa e esposa y un otro pa e esposo. Versiculo 10 y 11 ta urgi tanto esposo como esposa pa, si ta posibel, no bandona otro mes. Pues ta rasonabel pa aplica e mesun principio cu ta conta pa esposa, na e esposo.

Dolfein Mi tin 14 aña di edad, y mi kier a yama boso masha danki pa e articulo “Buscando Dolfein na Nueva Zelandia.” (8 di januari 2002) E articulo aki a conmove mi hopi. E informacion tawata excelente y e ta mustra cu Yehova mester tin un poder inspirador di temor pa e por a traha e criaturanan maravioso y inteligente ei. Dolfein ta mi bestia faborito, pesei mi ta anhela pa e tempo yega cu mi por siña mas di nan den Dios su mundo nobo.

A. C., Australia

Mi tin 15 aña di edad, y mi ta stima bestia masha hopi mes. Mi tin un interes special pa Dolfein, nan tin un manera di landa masha elegante. Ora cu mi a caba di lesa e articulo aki, mi a keda masha gradicido na Yehova Dios. Mi kier cuida e naturalesa y animalnan cu el a crea.

A. N., Hapon