Hobennan y Droga

“Tawata na nodi pa nan muri?”

Esei ta e pregunta cu nan a haci riba portada di e revista Brasileño Veja. Hunto cu e palabranan ei tawatin potret di hobennan, kendenan a parce normal y agradabel, pero cu a muri; victimanan di uzo di droga.

APESAR di e riesgonan bon conoci, hende ta sigui uza droga, y e uzo di droga ta sigui caba cu bida. [Den e serie aki “droga” ta inclui tur substancia ilegal y cu por ta adictivo.] Uzo di droga na Merca ta costa segun calculo, 100 mil miyon dollar pa aña na cuido medico, menos productividad na trabou, perdida di entrada y criminalidad. Pero podise esnan cu ta paga e prijs mas halto ta esnan hoben, esta, mucha. Segun un estudio haci na Brazil cu nan a publica den e corant Jornal da Tarde, 24,7 porshento di hobennan entre 10 pa 17 aña ya a yega di uza algun tipo di droga.

Aunke ta berdad cu uzo di droga bou di teenagernan na Merca a baha un tiki den ultimo añanan, toch un cantidad alarmante di hobennan einan ta adicto. Por ehempel, considera hobennan cu ta den nan ultimo dos añanan di scol secundario. Segun un estudio, 37 porshento a uza por lo menos marihuana durante e aña anterior. Un di cada 5 a uz’e e luna anterior. Casi 1 di cada 10 a purba e droga XTC (ecstasy) den e aña cu a pasa. Mas cu 6 porshento a purba LSD.

Informenan di rond mundo ta precupante. E Oficina Britanico di Estadisticanan Nacional ta informa cu “12 porshento di alumno di 11-15 aña a uza droga durante e ultimo aña . . . Cannabis [marihuana] tawata e droga mas uza cu tur.” Loke particularmente ta alarmante ta e echo cu “nan a ofrece mas cu un tercera parti (35 porshento) di e muchanan un of mas tipo di droga.”

Un raport patrocina pa Union Europeo tambe a revela cu “a para bira normal pa hobennan bebe te bira burachi.” Tambe e raport ta bisa cu tal “bebemento di demasiado alcohol ta ser liga cu varios mal efecto riba termino cortico, manera accidente, violencia y venenamento, y tambe problemanan social y di desaroyo.” For di Hapon ta bini un informe cu “e substancianan adictivo mas uza pa teenagernan na Hapon ta disolventenan organico [nan ta inhala holo of damp di lijm of gasolin], cu por hiba na uzo di droga mes.”

Pesei no ta straño cu e secretario general di Nacionnan Uni, Kofi Annan, a bisa: “Droga ta destrosando nos comunidadnan, generando criminalidad, plamando malesanan manera AIDS, y matando nos hobennan y nos futuro.” Hopi bes ta hendenan meti den droga ta responsabel pa crimennan manera traficacion di droga y asesinato relaciona cu droga. Ademas, debi na uzo di droga hopi hende ta bira victima di violencia, ta ser lesiona of ta haci sex pa loco poniendo nan salu na peliger. Y si bo ta pensa cu bo famia si no ta den e cosnan ei, pensa un biaha mas! Un raport di gobierno Mericano a bisa: “Droga no ta solamente un problema di pobernan, minorianan ni di habitantenan di centro di ciudad. . . . Usadonan di droga ta bini di tur gremio y di tur parti di e pais. E problema di droga ta afecta tur hende.”

Sinembargo, mayornan hopi bes no ta realisa cu esei por ta un problema den nan famia, sino te ora ta demasiado laat. Considera e caso di un hobensita di Brazil. Su ruman mohe Reginaa ta splica: “E tawata bebe bebida alcoholico. Nos famia tawata haya esei leuk. Pero e bebemento a pon’e bai experimenta cu droga hunto cu su amigonan. Como cu mi mayornan semper a haci manera cos cu e problemanan cu e tawata causa no tawata importante, su condicion a bai for di man. Varios biaha el a disparce. Y cada bes cu nan a haya un mucha mohe morto, polis tawata bel mi tata pa wak si t’e! Esaki a causa mi famia hopi angustia.”

Organisacion Mundial di Salu ta duna cinco motibo basico pakico hobennan lo por ser atrai na droga:

(1) Nan kier sinti nan hende grandi y tuma nan propio decisionnan

(2) Nan kier ta mescos cu nan pareunan

(3) Nan kier relax y sinti nan bon

(4) Nan kier haci cos peligroso y rebeldia

(5) Nan kier satisface nan curiosidad

Loke tambe ta aumenta e chens cu un hoben lo bai den e caminda di autodestruccion aki ta si droga ta facil pa haya y si nan pareunan ta pone presion riba nan. Luiz Antonio, un hoben di Brazil, a splica: “Nunca mi mayornan no a bisa nada tocante droga. Na scol e maestronan tawata menciona e problema pero sin bai den detaye.” Stimula door di su compañeronan di scol, Luiz a cuminsa uza droga cu 14 aña. Despues, ora el a purba stop, su “amigonan” cu tawata dun’e e droga literalmente a pone cuchiu na su garganta pa e sigui uza droga!

Abo ta realisa y acepta e echo cu bo propio yiunan por ta core peliger? Kico abo ta haci pa proteha nan contra uzo di droga? E siguiente articulo lo trata algun manera cu mayornan por proteha nan yiunan.

[Nota]

[Komentario na pagina 4]

“Droga ta destrosando nos comunidadnan, generando criminalidad, plamando malesanan manera AIDS, y matando nos hobennan y nos futuro.”—KOFI ANNAN, SECRETARIO GENERAL DI NACIONNAN UNI

[Reconocemento pa Potret na pagina 3]

© Veja, Editora Abril, 27 di mei 1998