E Punto di Bista Biblico

Ora Bo Sernan Keri No Tin e Mesun Religion Cu Bo

SEGUN un calculo, tin mas cu 10.000 religion y secta na mundo. Na un pais, aproximadamente 16 porshento di e poblacion adulto a cambia di religion na dado momento. Kiermen, no ta nada straño cu tin desacuerdo encuanto creencianan religioso entre famianan y amigonan. Tin bes esaki ta trece tension den famia. Pesei e pregunta cu ta lanta ta: Con cristiannan mester trata nan sernan keri cu no tin e mesun religion cu nan?

Un Relacion Special

Por ehempel wak kico Bijbel ta bisa tocante e relacion special cu tin entre mayor y yiu. E mandamento na Exodo 20:12 pa “onra bo tata y bo mama”, no ta bisa cu esaki ta conta pa un tempo so. Echo ta cu ora Hesus a papia tocante e mandamento aki na Mateo 15:4-6, el a referi na e honor cu yiunan adulto tin cu duna na nan mayornan.

E buki biblico di Proverbionan ta spierta hende cu nan no mester mustra falta di respet pa nan mayornan. Proverbionan 23:22 ta conseha bo pa “no desprecia bo mama ora cu e bira bieu.” Proverbionan 19:26 ta spierta bon cla cu esun cu “maltrata su tata y core cu su mama ta un yiu cu ta causa berguensa y ta trece reproche.”

Pues, e Scritura ta indica claramente cu nos no mester neglisha nos mayornan. E echo cu nos mayornan no ta acepta nos religion no ta kibra nos lasonan familiar. E mesun principionan biblico aki ta aplica tanto na otro famianan pega como na nos casa tambe. Claramente, cristiannan tin e obligacion moral y biblico pa stima nan famianan.

Ta Importante pa Ser Rasonabel

Claro cu Bijbel ta duna spiertamento contra mal compania, y e influencia aki por bin di famianan pega. (1 Corintionan 15:33) Hopi sirbido fiel di Dios di antes a para firme pa loke ta corecto maske nan mayornan no tawata di acuerdo cu nan. Esaki tawata bisto den e caso di e yiunan di Core. (Numbernan 16:32, 33; 26:10, 11) Cristiannan berdadero no mester compromete nan fe pa agrada otro hende, ni sikiera nan famianan.—Echonan 5:29.

Den algun caso mayornan of otro sernan keri por opone creencianan di un cristian fuertemente. Tin di nan cu asta por bira enemigo di cristianismo berdadero. Den casonan asina cristiannan ta dal pasonan rasonabel pa proteha nan spiritualidad. Hesus tawatin rason ora el a bisa: “Un hende su enemigonan lo ta e miembronan di su mes cas. Esun cu stima tata of mama mas cu mi, no ta digno di mi; y esun cu stima yiu homber of yiu mohe mas cu mi, no ta digno di mi.”—Mateo 10:36, 37.

Sinembargo, den mayoria caso cristiannan no ta haya oposicion severo di nan sernan keri. E unico diferencia ta cu nan famianan no tin e mesun comprondemento di siñansanan biblico. E Scritura Santo ta anima siguidonan di Cristo pa trata esnan cu no ta creyente “cu suavidad” y respet profundo. (2 Timoteo 2:25; 1 Pedro 3:15) E conseho oportuno di Bijbel ta: “E sirbido di Señor no mester ta pleitado, ma cariñoso cu tur hende.” (2 Timoteo 2:24) Apostel Pablo tambe a conseha cristiannan “pa no calumnia ningun hende, pa no ta pleitado, ma suave, mustrando tur consideracion pa tur hende.”—Tito 3:2.

Keda den Contacto y Expresa Amor

Prome Pedro 2:12 ta duna cristiannan e siguiente animacion: “Laga boso conducta ta excelente meimei di e paganonan [hendenan cu no ta creyente], asina cu . . . nan por, pa medio di boso bon obranan cu nan ta observa, glorifica Dios.” Hopi bes, nos sernan keri cu no tin e mesun creencianan cu nos ta mira e cambionan cu nos a haci den nos bida door di aplica principionan biblico. No lubida cu hopi hende cu tawata indiferente of asta contra e berdadnan biblico a cambia di opinion. Algun hende kisas a tuma basta aña pa observa djacerca e bon conducta di un casa of yiu prome cu nan a bin investiga e motibo tras di tal conducta. Ora hende no acepta berdadnan di Bijbel, esei no mester ta pa motibo cu un ser keri cu ta cristian a neglisha nan.

Sin duda circunstancianan ta varia, y algun Testigo cristian ta biba leu for di nan mayornan. Kisas nan no por bishita nan mes tanto cu nan ta desea. Pero door di skirbi nan carta, yama nan na telefon of door di keda den contacto regular cu nan den un of otro manera, esei lo sigura nos sernan keri cu nos ta stima nan. Hopi hende cu no ta cristian berdadero ta stima nan mayornan y otro famianan y tin contacto regular cu nan sin importa nan creencianan religioso. Nos por spera menos di Testigonan cristian?

[Plachi na pagina 28]

Si bo keda den contacto cu bo sernan keri esei lo sigura nan cu bo stima nan