Un Test di Fe
DI UN ESCRITOR DI SPIERTA! NA GRAN BRETANIA
RICHMOND ta un pueblo pintoresco den North Yorkshire, Inglatera. Su kasteel, construi un poco despues di e conkista di Willem e Conkistado na aña 1066, ta duna un bista impresionante riba e vaye di Riu Swale, cu ta hiba na e Parke Nacional Yorkshire Dales.
E documentario na television The Richmond Sixteen (E Diesseisnan di Richmond) a revela un aspecto importante di e kasteel su historia moderno— destino di 16 persona encarsela einan durante Prome Guera Mundial pasobra nan a nenga di drenta servicio militar a base di nan consenshi. Kico a pasa cu nan?
Servicio Militar Obligatorio
Despues cu Gran Bretania a declara guera na 1914, patriotismo a motiva rond di 2,5 miyon homber pa drenta servicio militar boluntariamente. Sinembargo, segun e historiado di guera Alan Lloyd, despues autoridadnan ‘a cuminsa pone presion riba hende homber pa drenta servicio militar, en bes di roga nan pa hacie’, debi na e creciente cantidad di solda cu tawata muri den e guera, y door cu nan a realisa cu e guera no tawata bai caba lihe manera politiconan a priminti. Pesei na maart 1916, pa prome bes den historia Britanico, tawata obliga hombernan soltero sirbi den forsanan militar.
Autoridadnan a establece 2.000 tribunal pa atende casonan di apelacion, pero masha poco di esnan cu a nenga di drenta servicio militar a base di consenshi a haya despensacion completo. Nan a ordena mayoria di e personanan ei pa join e cuerponan cu nan a establece pa apoya e guera y cu a consisti di hende cu no ta den combate. E hombernan cu a nenga di haci esei, a wordo considera toch como den servicio militar y a hiba nan dilanti di corte militar. Autoridadnan a trata nan severamente y a encarsela nan, hopi bes den condicionnan preta y horibel.
E Diesseisnan di Richmond
Entre e Diesseisnan di Richmond tawatin cinco Studiante Internacional di Bijbel, manera Testigonan di Yehova tawata conoci e tempo ei. Herbert Senior, kende a bira un Studiante di Bijbel na 1905 na edad di 15 aña, a skirbi un 50 aña despues: “Nan a pone nos den celnan cu tawata mas manera cashot. Probablemente e celnan ei tawatin hopi aña sin wordo uza, ya cu e flur tawata cubri cu 5 pa 8 centimeter di sushi.” Resientemente nan a cuminsa laga publico mira graffiti y otro skirbimento riba muraya cu e presonan a pinta y skirbi riba e murayanan blancha di nan cel. Pero nan ta tur blikia y na algun parti bo no por ni lesa nan mas. Bo por mira nomber, mensahe, y pintura di sernan keri, hunto cu declaracionnan di fe.
Un preso simplemente a skirbi: “Miho mi muri pa un principio cu mi muri pasobra mi no tin ningun.” Hopi mensahe ta menciona entre otro Hesucristo y su siñansanan, tambe nan a pinta cuidadosamente e emblema di crus y corona, cu e tempo ei e Asociacion di Studiantenan Internacional di Bijbel (IBSA) tawata uza. Herbert Senior a menciona cu riba muraya di su cel el a pinta e “Mapa di Epocanan” for di e buki pa studia Bijbel E Plan Dibino di Epocanan, pero nan no a haya esaki. Podise el a bai perdi mescos cu e otro cosnan skirbi na otro parti of riba e murayanan di e celblok principal. Un di e presonan a skirbi: ‘Clarence Hall, Leeds, I.B.S.A. 29 di mei 1916. Manda Francia.’
Manda Francia—Y Bek!
E cantidad di victima den e guera na Francia y Belgica tawata aumenta na un velosidad alarmante. Ministro di guera Horatio Herbert Kitchener y general Britanico Douglas Haig tawatin mester di mas tropa desesperadamente, incluso hombernan casa, kende pa mei 1916 tambe a cuminsa ser recluta obligatoriamente. Pa presiona e hombernan ei pa join den e guera, autoridadnan a dicidi di castiga esnan cu nenga a base di nan consenshi, pa asina spanta otronan. Pesei a punta di pistola nan a pone e Diesseisnan di Richmond ilegalmente riba un trein, cu nan man gebui, y den secreto a hiba nan Francia via di un ruta indirect. Segun e revista Heritage, na e beach di Boulogne, Francia, “nan a mara e hombernan na palo cu prikkeldraad, casi como si fuera nan tawata ser crusifica”, y a pone nan para wak con un peloton di fusilamento a ehecuta un desertor Britanico. Anto a bisa nan cu si nan no obedece ordo, nan lo a haya e mesun destino.
Meimei di juni 1916, autoridadnan a pone e presonan marcha dilanti 3.000 solda pa nan tende nan sentencia di morto, pero pa e tempo aki Kitchener a muri, y e prome ministro Britanico a interveni. Un hende a manda un postkaart cu un mensahe secreto pa autoridadnan na London, y nan a revoca e orden militar. General Haig a haya ordo pa cambia tur sentencia di morto na dies aña di trabou forsa.
Ora cu e presonan a regresa Gran Bretania, nan a hiba algun di e diesseisnan na un mina di granit pa haci “trabou di importancia nacional” bou di condicionnan horibel, segun un informe oficial. E otronan, manera Herbert Senior, nan a manda bek prizon, pero no prizon militar sino prizon civil.
E Herencia
Awor Kasteel Richmond ta bou di cuido di e organisacion Patrimonio Ingles. Nan tin un exhibicion extenso einan, pero debi na e estado delicado di e murayanan di e celnan, e ta inclui un sistema via screen di computer cu ta permiti bishitantenan examina djacerca tanto e celnan como loke tin skirbi riba nan, sin daña nan. Gruponan di mucha di scol ta ser curasha pa compronde dicon personanan cu a nenga di drenta servicio militar pa motibo di nan consenshi, tawata dispuesto pa sufri castigo, encarselacion y posibel ehecucion pa loke nan tawata kere sinseramente.
E Diesseisnan di Richmond cu exito “a trece e cuestion di nenga servicio militar a base di consenshi na atencion publico y a cuminsa gana aceptacion y respet pa esei.” Esaki a pone cu durante Segundo Guera Mundial autoridadnan a desplega un actitud mas comprensivo pa cu esnan cu a registra nan mes como personanan cu ta nenga servicio militar a base di consenshi.
Na aña 2002, nan a dedica un parti di e bunita hardin di e kasteel na memoria di e Diesseisnan di Richmond como tributo na nan conviccionnan moral.
[Plachinan na pagina 12, 13]
Di robes pa drechi: E toren di siglo 12 di Kasteel Richmond, cu e blok cu a contene e celnan di prizon
Herbert Senior, un di e Diesseisnan di Richmond
Un di e celnan caminda e Diesseisnan di Richmond tawata deteni
Rand di e paginanan aki: Parti di loke a wordo skirbi riba muraya di e prizon atrabes di añanan