Moises—Ki Efecto Su Bida Tin Riba Bo

PA HOPI academico y critico, Moises no ta nada mas cu un personahe di mitologia. Nan ta rechasa e relato biblico door di aplica cierto criterionan como prueba, pero segun e criterionan ei lo mester rechasa hombernan manera Plato y Socrates tambe como mito.

Pero manera nos a mira, no tin motibo valido pa rechasa e relato biblico di Moises. Al contrario, pa hende cu tin fe, tin prueba na abundancia cu henter e Bijbel ta “e palabra di Dios.”a (1 Tesalonicensenan 2:13; Hebreonan 11:1) Pa hende asina, un analisis di e bida di Moises no ta simplemente un actividad teoretico sin balor practico, sino mas bien e ta un manera pa edifica fe.

E Berdadero Moises

Trahadonan di pelicula hopi bes ta destaca Moises su actonan di heroe y su curashi fisico, cualidadnan cu e publico cu ta bai wak pelicula gusta. Y ta cierto cu Moises definitivamente tawatin curashi. (Exodo 2:16-19) Pero mas cu tur cos e tawata un homber cu fe. Dios tawata un realidad pa Moises; asina real cu despues apostel Pablo a bisa cu Moises “a keda firme, como si fuera e tawata mira Esun cu ta invisibel.”—Hebreonan 11:24-28.

Pues Moises ta siña nos cu ta necesario pa nos cultiva un relacion cu Dios. Den nos bida diario, nos tambe por comporta nos mes como si fuera nos ta mira Dios! Si nos haci asina, nunca nos lo actua den un manera cu ta desagrad’e. Tuma nota tambe cu e fe di Moises a ser inculca den dje mientras cu e tawata simplemente un mucha chikito. Pero su fe tawata asina profundo cu el a keda fuerte apesar di “a wordo educa den tur e siñansa di e Egipcionan.” (Echonan 7:22) Esei sigur ta un animacion pa mayornan cuminsa siña nan yiunan tocante Dios for di infancia.—Proverbionan 22:6; 2 Timoteo 3:15.

Un otro cos remarcabel tawata Moises su humildad. E tawata “masha humilde, mas cu tur homber cu tawatin riba superficie di tera.” (Numbernan 12:3) Pues Moises tawata dispuesto pa admiti su erornan. El a skirbi con e mes a neglisha di laga sircuncida su yiu homber. (Exodo 4:24-26) El a conta francamente con na un ocasion el a faya di duna Dios gloria y e castigo severo cu Dios a impone riba dje. (Numbernan 20:2-12; Deuteronomio 1:37) Ademas, Moises tawata dispuesto na acepta sugerencia for di otro hende. (Exodo 18:13-24) Lo no ta bon pa esposonan, tatanan y otro hende homber den puesto di autoridad imita Moises?

Ta berdad cu algun critico ta cuestiona si Moises realmente tawata humilde, y nan ta cita e accionnan violento cu el a tuma. (Exodo 32:26-28) Segun e escritor Jonathan Kirsch: “E Moises describi den Bijbel rara bes ta humilde y nunca e ta suave, y no ta semper por considera su conducta como husto. Na cierto momentonan spantoso, . . . Moises ta resalta como un homber arogante, sangriento y cruel.” E tipo di critica ei lamentablemente ta indica un mente hopi sera. E ta pasa por halto di e echo cu Moises su accionnan no tawata motiva pa crueldad, sino pa un amor intenso pa husticia y un rechaso completo di maldad. Den e tempo aki cu ta na moda pa acepta estilonan di bida inmoral, Moises ta un recordatorio pa nos cu ta necesario pa nos tin normanan moral firme.—Salmo 97:10.

E Herencia di e Bukinan di Moises

Moises a laga atras un coleccion asombroso di obranan skirbi. Entre nan tin poesia (Job, Salmo 90), naracion historico (Genesis, Exodo, Numbernan), listanan di desendencia (Genesis, capitulo 5, 11, 19, 22, 25) y un cantidad remarcabel di legislacion cu ta ser yama e Lei di Moises (Exodo, capitulo 20-40; Levitico; Numbernan; Deuteronomio). E Lei dibinamente inspira aki ta contene concepto-, lei- y principionan di gobernacion cu tawata siglonan mas avansa cu otronan di su tempo.

Den paisnan caminda e hefe di Estado tambe ta sirbi como cabes di Iglesia, esei hopi bes ta resulta den intolerancia, opresion religioso y den abuso di poder. Den e Lei di Moises tawatin e principio di separacion di Iglesia y Estado. No tawata permiti pa rei efectua debernan di sacerdote.—2 Cronicanan 26:16-18.

Tambe e Lei di Moises a contene conceptonan di higiena y reglanan pa combati y preveni malesa cu ta cuadra cu ciencia actual, cosnan manera isola hende cu ta malo y deshaci di sushi humano. (Levitico 13:1-59; 14:38, 46; Deuteronomio 23:13) Esaki ta un cos remarcabel si nos tuma na cuenta cu den tempo di Moises gran parti di medicina Egipcio tawata un mescla peligroso di practicanan medicamente incorecto y supersticion. Den paisnan den desaroyo awe, miyones di hende lo por evita malesa y morto si nan practica e normanan di higiena basa riba e Lei di Moises.

Cristiannan no ta bou di obligacion di sigui e Lei di Moises. (Colosensenan 2:13, 14) Pero te ainda ta di gran balor pa nan studi’e. E Lei ei a urgi Israel pa duna Dios debocion exclusivo y pa keda leu di idolatria. (Exodo 20:4; Deuteronomio 5:9) El a manda yiunan honra nan mayornan. (Exodo 20:12) Tambe e Lei a taha pa no mata, comete adulterio, horta, gaña ni cudisha. (Exodo 20:13-17) Cristiannan te ainda ta duna hopi balor na e principionan ei.

Un Profeta Manera Moises

Nos ta biba den temponan trabahoso. Humanidad definitivamente tin mester di un lider manera Moises; un hende cu no solamente tin poder y autoridad sino tambe integridad, curashi, compasion y un amor sinsero pa husticia. Ora Moises a muri, e Israelitanan sigur lo a puntra nan mes: ‘Mundo lo bolbe mira un hende manera Moises?’ Moises mes a contesta e pregunta ei.

E bukinan cu Moises a skirbi ta splica con malesa y morto a origina y dicon Dios a permiti pa maldad continua. (Genesis 3:1-19; Job, capitulo 1, 2) Na Genesis 3:15, nos ta haya e prome profecia dibino registra—un promesa cu maldad cu tempo lo ser aplasta! Con? E profecia a indica cu lo nace un persona mediante ken salbacion lo bin. E promesa aki tawata e base pa e speransa cu un Mesias lo lanta y libra humanidad. Pero ken e Mesias lo ta? Moises ta yuda nos identific’e sin e minimo duda.

Na final di su bida, Moises a expresa e palabranan profetico aki: “SEÑOR bo Dios lo lanta pa bo un profeta manera ami for di meimei di bo, for di bo paisanonan; boso mester scucha na dje.” (Deuteronomio 18:15) Apostel Pedro despues a aplica e palabranan ei directamente na Hesus.—Echonan 3:20-26.

Mayoria comentarista Hudiu vigorosamente ta nenga cu tin similaridadnan entre Moises cu Hesus. Nan ta argumenta cu e palabranan di e texto aki ta aplica na tur profeta berdadero cu a bin despues di Moises. Sinembargo, segun Tanakh—The Holy Scriptures, di e Sosiedad di Publicacionnan Hudiu, Deuteronomio 34:10 ta bisa: “Nunca mas a lanta den Israel un profeta manera Moises—kende SEÑOR a scohe specialmente, [papiando cu ne] cara cara.”

Si, despues di Moises tawatin hopi profeta fiel, manera por ehempel Isaias y Yeremias. Pero ningun di nan tawatin e relacion unico cu Dios cu Moises a disfruta di dje—papia cu Dios “cara cara.” Pesei Moises su promesa di cu lo bin un profeta ‘manera dje’, mester ta aplica na un solo persona—e Mesias! Un cos interesante ta cu prome cu comienso di cristianismo—y e persecucion religioso di parti di cristiannan falso—eruditonan Hudiu tawata pensa mescos. Nos ta haya rastronan di e punto di bista aki den obranan skirbi Hudiu, manera Midrash Rabbah, cu ta describi Moises como e predecesor di e “futuro Redentor”, of Mesias.

Hende no por nenga e echo cu Hesus tawata manera Moises den hopi aspecto. (Wak e cuadro “Hesus—Un Profeta Manera Moises.”) Hesus tin poder y autoridad. (Mateo 28:19) Hesus ta “manso y humilde di curason.” (Mateo 11:29) Hesus ta odia maldad y inhusticia. (Hebreonan 1:9) Ta pesei e por duna nos e liderato tan necesario! Ta e ta esun cu pronto lo aplasta maldad y comberti e tera den e Paradijs cu Bijbel ta describi.b

[Nota]

[Cuadro na pagina 12]

Moises—Echo Contra Fantasia

Peliculanan tocante Moises a crea varios mito y inexactitud. Aki ta sigui algun:

Mito: Moises no tawata sa cu su famia ta Hudiu.

Echo: Moises su mama Hudiu evidentemente a dun’e pecho pa algun aña. Echonan 7:23-25 ta indica cu Moises a considera e catibonan Hudiu como “su rumannan.”

Mito: Moises tawata un rival pa e trono di Egipto.

Echo: Bijbel no ta bisa tal cos. Daily Bible Illustrations, di John Kitto, ta bisa cu no tin motibo pa kere cu Moises “door di e adopcion aki a bira heredero di e corona. . . . No ta parce cu tawatin scarsedad di herederonan masculino pa e corona.”

Mito: Moises a regresa Egipto pa confronta su enemigonan.

Echo: Bijbel ta bisa cu tur su enemigonan tawata morto ora cu el a regresa.—Exodo 4:19.

Mito: Dios pa prome bes a declara e Dies Mandamentonan despues cu Moises a subi Sero Sinai.

Echo: Dios a declara e Dies Mandamentonan—mediante un angel—na henter e nacion di Israel. Despues di esei, e Israelitanan morto spanta a pidi Moises pa e subi e sero y bai papia pa nan.—Exodo 19:20–20:19; 24:12-14; Echonan 7:53; Hebreonan 12:18, 19.

Mito: Farao a sobrevivi destruccion di su ehersito na Lama Cora.

Echo: “Farao y su ehersito” a muri na Lama Cora.—Exodo 14:28; Salmo 136:15.

[Cuadro na pagina 13]

Hesus—Un Profeta Manera Moises

At’aki algun di e maneranan cu Hesus a resulta di ta mescos cu Moises:

▲ Tanto Moises como Hesus a scapa di e matansa na gran escala di babynan masculino decreta pa e gobernante di nan tempo.—Exodo 1:22; 2:1-10; Mateo 2:13-18.

▲ Yehova a yama Moises for di Egipto hunto cu Yehova su “primogenito”, e nacion di Israel. Yehova a yama Hesus for di Egipto como su Yiu primogenito.—Exodo 4:22, 23; Oseas 11:1; Mateo 2:15, 19-21.

▲ Tanto Moises como Hesus a yuna pa 40 dia den desierto.—Exodo 34:28; Mateo 4:1, 2.

▲ Moises y Hesus tawata excepcionalmente manso y humilde.—Numbernan 12:3; Mateo 11:28-30.

▲ Tanto Moises como Hesus a haci milager.—Exodo 14:21-31; Salmo 78:12-54; Mateo 11:5; Marco 5:38-43; Lucas 7:11-15, 18-23.

▲ Tanto Moises como Hesus a fungi como mediado di un aliansa entre Dios y Su pueblo.—Exodo 24:3-8; 1 Timoteo 2:5, 6; Hebreonan 8:10-13; 12:24.

[Plachinan na pagina 10]

Ta Hesus so tawata un profeta cu di berdad tawata manera Moises

[Plachi na pagina 12]

Principionan di higiena cu e Lei di Moises ta siña por yuda preveni malesa