Observando Mundo

Control di Poblacion—Un Dilema pa Dierentuinnan

“Ningun dierentuin djawe por sobrevivi sin anticonceptivo”, segun Henning Wiesner, zoologo principal na Hellabrunn Zoo di Munich. Bestianan den dierentuin ta reproduci lihe, nan yiunan ta crece bon, y nan sa biba mas largo cu nan sorto den mondi. Pero den dierentuinnan espacio ta limita. Pesei mester di anticonceptivo. Sinembargo, segun e revista Aleman Focus, “planiamento di famia den dierentuin tin un obstaculo. Bestianan no gust’e.” Por ehempel, beernan ta hole e anticonceptivo scondi den cuminda y ta sac’e afo. Tambe anticonceptivo oral por causa problema di salu, manera cancer di pecho, serca cierto bestianan. Otro opcion ta pa capa nan y sterilisa nan, pero esaki ta resulta den otro problema. Pa cuminsa, e proceduranan ei ta permanente, y kisas den futuro si lo tin mester pa laga nan haya yiu. Na di dos luga, bestia sterilisa ta stop di produci hormonanan di sex, y e cambio ei por perhudica nan posicion social serca nan sorto. Un otro opcion ta pa mata e yiunan indeseabel, pero esei lo causa indignacion serca hopi amante di bestia y gruponan pa proteccion di animal. Pues, dierentuinnan ta den un berdadero dilema.

Sushi Electronico

Na aña 2002, Canadesnan a benta rond di 155.000 tonelada di sushi electronico afo, segun e corant National Post di Canada. Un raport di e organisacion Medioambiente di Canada a bisa cu segun calculo Canadesnan a benta afo “dos miyon television, 1,1 miyon video recorder y 348.000 CD player, y mayoria di e aparatonan aki a ser considera anticua despues di djis un par di aña di uzo.” Segun e raport, aparatonan electronico “hopi bes ta ser benta afo pasobra ya nan no ta satisface e necesidad di e uzado, y no pasobra nan ta kibra.” Gran parti di e sushi aki por ta peligroso. Por ehempel, un solo television “por tin te cu dos kilo di chumbo”, segun Post. Y awor mercurio, cu bo ta haya den cierto pantaya di television, ta contaminando dumpnan. Medioambiente di Canada ta spierta cu si sigui manera ta bai aworaki, e cantidad di sushi electronico lo bira dobel pa aña 2010.

Bashaca y Antibiotica

“Cientificonan a descubri cu algun bashaca ta planta padestul pa alimenta nan yiunan, y asta ta uza antibiotica como un forma di ‘pesticida’ pa proteha e cosecha”, segun e edicion internacional di e corant The Miami Herald. E bashacanan aki (parasolmieren), mescos cu cunukero, ta saca padestul planta otro caminda, snui nan y kita mal yerba. Un tipo di bacteria di e sorto Streptomycete cu ta biba riba cuero di e bashaca ta produci e antibiotica, cu ta proteha e bashacanan su plantacion contra un beskem contagioso. Ted Schultz, specialista di insecto di e Museo Nacional di Historia Natural na Washington, D.C., a remarca cu contrario na hende cu constantemente tin cu inventa antibiotica nobo pa vence bacterianan cu ta bira resistente contra remedi, e bashacanan aki pa siglonan ta uzando e mesun antibiotica cu exito. Schultz a declara cu comprendiendo con bin e bashacanan tin exito cu e antibiotica ‘lo por ta hopi importante pa sobrevivencia humano.’

Un Catastrofe Mundial di Salu

Mundo ta rumbo pa “un di e catastrofenan di salu di mas grandi” den su historia, debi na un aumento alarmante di casonan di diabetes, segun e spiertamento di profesor Sir George Alberti di Gran Bretania, presidente di e Federacion Internacional di Diabetes (FID). E corant Britanico Guardian a informa cu segun cifranan di FID, mas cu 300 miyon hende rond mundo su curpa no ta procesa sucu adecuadamente, locual hopi bes ta hiba na diabetes. Diabetes Tipo 2, cu un tempo tawata afecta principalmente hende di edad, awor ta afectando e salu di hobennan Britanico kendenan a bira demasiado gordo debi na comemento di junk food y falta di ehercicio. Alberti a bisa: “E frustracion di mas grandi ta cu por preveni gran parti di esaki [diabetes y su efectonan] door di haci cambio den bo estilo di bida.” Paisnan den desaroyo tambe kisas lo bai tin un aumento rapido di diabetes segun cu nan ta tuma over “e manera di come insaludabel y estilonan di bida di stad di paisnan rico”, The Guardian a remarca.

Famia Italiano Ta Cambiando

Di aña 1995 pa 2001, e cantidad di parehanan cu ta biba hunto sin ta casa na Italia a bira casi dobel, e cantidad di esnan cu ta casa a baha, anto e cantidad di hende cu ta biba nan so a aumenta. E resultadonan aki, cu a sali publica den e corant La Repubblica, ta basa riba datonan colecta pa e Instituto Nacional di Estadistica di Italia (ISTAT). Durante e mesun periodo ei, e tamaño di e famia promedio a baha te na solamente 2,6 miembro. Segun ISTAT, hopi pareha ta dicidi di biba hunto sin casa pa “un periodo di prueba” cu e intencion di podise casa despues.

Shoco Su Sentidonan Superior

Segun e revista Australian Geographic, shoco tin “e bista mas skerpi di anochi den mundo di animal.” Pa un parti esei ta gracias na shoco su wowonan enorme y e echo cu e ta uza tur dos pareu pa forma un imagen. Y hopi shoco “por detecta zonido cu ta 10 biaha mas abou cu loke un hende por tende.” Kico ta pone cu shoco su oido ta asina skerpi? Segun e articulo, “cu algun variacion, e diferente sortonan di shoco su horea tin un rasgo extraordinario en comun: un buraco di horea ta mas halto cu e otro.” Esaki ta pone cu ta mas facil pa shoco haya sa unda un victima cu ta move ta. Shoco di e sorto Tyto tin un yudansa extra den forma di e ronchi di pluma den nan cara. E ronchi di pluma aki ta ahustabel y ta capta zonido y canalisa esei pa e horea. Ademas, e medula, un parti di e celebro conecta cu oido, ta mas complica serca shoco cu serca otro parha.

Infeccionnan di Hepatitis Cu Por Ser Evita

Mayoria “infeccion di hepatitis ta debi na falta di higiena di parti di personal medico”, segun e revista Polaco Polityka. Na 1997 e Instituto Nacional di Higiena na Polonia a raporta 992 infeccion di hepatitis C, pero cinco aña despues e cantidad tawata 1.892. E articulo ta lamenta cu actualmente no tin ningun vacuna autorisa contra hepatitis C. Profesor Andrzej Gładysz, un asesor nacional di malesanan contagioso, a bisa: “No ta un exageracion pa bisa cu na Polonia nos tin 500 mil pa 600 mil hende infecta cu e virus di hepatitis C.” Y mayoria di e infeccionnan aki ta “tuma luga den oficinanan di docter of di dentista”, segun Jacek Juszczyk di e Clinica di Malesanan Contagioso na e Universidad Medico na Poznan. E revista Polityka na final ta bisa: “Ora nos ta den man di un docter, nos lo tin gana di ta sigur cu e mannan ei ta bon y limpi.”

Aumento Grandi di Barionan Margina

“Casi un mil miyon hende, 32 porshento di e habitantenan di e stadnan na mundo, ta biba den barionan pober”, segun e corant El Universal di Ciudad di Mexico. Un raport di Nacionnan Uni ta menciona Bogotá, Habana, Ciudad di Mexico, Quito y Rio de Janeiro como ehempel di stadnan cu tin un aumento grandi di barionan margina. Kico ta e causanan? Den caso di Bogotá, e raport di Nacionnan Uni ta atribui e aumento drastico di barionan margina na “e crecemento rapido di poblacion, e cantidad di hende cu ta muda di cunucu bin stad, y violencia, locual a core cu comunidadnan completo for di nan luga di biba”, segun e corant. Ademas, 23 porshento di e poblacion di Bogotá na aña 2000 tawatin un entrada cu ta bou di e nivel di pobresa compara cu 19,4 porshento na 1994.