Di Guerero pa Hacido di Pas

E Spierta! na Spaño di 8 di december 2002 tawatin e experencia di Toshiaki Niwa, un expiloto Japones cu a ser entrena pa misionnan suicida durante Segundo Guera Mundial. Niwa a conta cu na augustus 1945, e tawata na un base serca di Kyoto wardando riba e orden pa efectua un atake suicida contra barconan di marina Mericano. E orden ei no a yega nunca pasobra un par di dia so despues, e guera a termina. Añanan despues Niwa a cuminsa studia Bijbel cu Testigonan di Yehova. El a siña cu hende cu ta agrada Dios no ta participa den guera. Nan realmente ta respeta nan prohimo, sin importa na unda nan ta biba of di ki nacion nan ta. (1 Pedro 2:17) Niwa, un exguerero, awor ta un hacido di pas cu ta comparti cu otro hende e mensahe unificador di e Palabra di Dios.

E relato di Niwa, a conmove Russell Werts di Merca, pasobra e tambe a bringa den e mesun guera, pero na e otro banda. Werts a skirbi den un carta pa Niwa: “Bo a conta cu na augustus 1945 bo tawata serca di Kyoto wardando riba e benidero invasion. Na e mesun tempo ei, ami tawata den e etapanan final di training pa e invasion ei. Si e guera no a termina na e tempo ei, probablemente nos tur dos lo a muri na un banda di e bataya ei. Mescos cu abo cu bo famia, ami cu mi casa a bira Testigo di Yehova despues. Ta masha dushi pa sa cu nos, cu un tempo tawata enemigo di otro, dicidido pa mata otro, awor no solamente ta amigo sino ruman!”

Mescos cu Toshiaki Niwa y Russell Werts, tin hopi hende cu un tempo tawata enemigo mortal di otro ma cu awor ta biba den pas y unidad debi cu nan a studia y aplica Dios su Palabra, Bijbel. Entre Testigonan di Yehova tin Hudiu cu Arabir, Armenio cu Turco, Aleman cu Ruso, Hutu cu Tutsi, kendenan ta demostra cu nan ta berdadero cristiannan. De echo, Hesus a bisa: “Na esaki tur hende lo sa cu boso ta mi disipel, si boso tin amor un pa otro.”—Huan 13:35.

[Plachinan na pagina 14]

Toshiaki Niwa y Russell Werts durante Segundo Guera Mundial