“Yehova, Bo A Haya Mi!”

Segun e relato di Nelly Lenz

“Testigo di Yehova meneernan ta?” mi a puntra dos hende homber cu a bini nos cas. Nan a contesta: “Si.” Mi a sclama: “Ami tambe!” Mi tawatin apenas 13 aña di edad y no tawata bai reunion na Salon di Reino. Mi mayornan no tawata Testigo di Yehova. Pakico, anto, mi a identifica mi mes como tal?

SI NO tawata pa un Testigo di Yehova, podise lo mi no a nace nunca. Mi mama a sali na estado di mi tempo cu e tawata biba na Montreal, Quebec, Canada. E tawatin apenas 17 aña di edad. Su famia a pone hopi presion riba dje pa e haci aborto y el a bai di acuerdo.

Mami a pidi un dia liber di trabou pa e bai haci e aborto. Aparentemente su doño di trabou, cu ta un Testigo di Yehova, a haya sa pakico mi mama a pidi liber. El a papia un rato cu Mami y splic’e con precioso e don di bida ta. (Salmo 139:13-16) Riba caminda pa e clinica, Mami a sigui pensa riba loke su doño di trabou a bis’e. Esei a pon’e cambia di idea y dicidi pa no comete e aborto. Despues cu mi a nace na 1964, mi mama a hinca mi den un orfanato.

Mi Prome Contacto cu e Berdad di Bijbel

Tempo mi tawatin rond di dos aña di edad, mi mama cu e homber cu el a caba di casa cu ne a saca mi for di e orfanato. Tempo cu nos tawata biba na Sainte-Marguerite-du-Lac-Masson, nan a cuminsa studia Bijbel cu Testigonan di Yehova y asisti na reunionnan di congregacion. Ma despues di poco tempo nos a muda pa Boisbriand, y mi mayornan a stop di studia.

Un par di aña despues, nan a reanuda nan studio. Ami tawata scucha loke nan tawata papia tocante e speransa biblico di un paradijs riba tera. (Lucas 23:43) Mi a bin haya un gran amor pa Yehova.

Sinembargo, un dia Mami a bisa mi cu nan a stop di studia cu e Testigonan y cu nos lo no bai Salon di Reino mas. Na prome instante, mi tawata contento. Como mucha di ocho aña, tin biaha mi tawata haya e reunionnan mucho largo. Pero e mesun anochi ei, mi kier a papia cu Yehova den oracion, y mi tawatin miedo cu lo e no a scucha mi.

E siguiente diadomingo atardi, mi a mira nos biciñanan cu ta Testigo di Yehova sali pa bai reunion na Salon di Reino. Mi a cuminsa yora y puntra Dios: “Pakico nan yiunan si por bai reunion y ami no?” No obstante, e palabranan di Salmo 33:18 a resulta di ta berdad: “Ata, e wowo di SEÑOR ta riba esnan cu ta tem’e, riba esnan cu ta spera riba su misericordia.”

Bek na Salon di Reino

Despues di tres siman, mi a bishita nos biciñanan y a bisa e mama, Lilianne, cu mi kier a bai reunion. Lilianne a splica mi cu esei no por pasobra mi mama no kier a tende nada mas di Testigonan di Yehova. Pero riba mi insistencia el a bai cas cu mi pa puntra Mami si mi por a bai cu nan. Pa mi sorpresa, Mami a bai di acuerdo. El a bisa cu e reunionnan lo a siña mi bon principionan. Asina mi a cuminsa bai reunion tur diadomingo.

Pa tres aña largo mi a bai e reunionnan di congregacion. Pero ora mi a cumpli 11 aña, mi mayornan a diborcia, y ami cu mi mama a bai biba otro caminda. Atrobe mi a perde tur contacto cu Testigonan di Yehova.

Un Encuentro Inespera

Un dia mi tawata sinta riba stupi dilanti di nos cas ora dos Testigo di Yehova—Eddie Besson y Don Fisher—a acerca mi y puntra mi si mi mayornan ta na cas. Ora mi a bisa nan “no”, nan a bira bai. Pero mi a sali na careda nan tras, y nos tawatin e combersacion cu mi a conta na principio.

Ta di compronde cu e dos hombernan a keda sorprendi ora nan a tende mi identifica mi mes como un Testigo di Yehova. Mi a splica nan mi situacion y mi a roga nan pa bini bek e mesun anochi ei. Ora mi a bisa Mami cu e Testigonan lo pasa, el a rabia masha y a bisa mi cu lo e no laga nan drenta paden. Piyo ainda, el a plania pa bai prome cu nan yega. Cu awa na wowo mi a roga Mami pa keda. Net e tawata preparando pa bai, e bel a zona. Y ken tawata na porta? Eddie Besson. Bo por imagina bo con contento mi a keda ora Mami a acepta un studio di Bijbel?

Porfin mi por a bai reunion di congregacion atrobe! Sinembargo, menos cu un aña despues, mi mama a bolbe stop di studia. E biaha aki, el a prohibi mi di tin contacto cu e Testigonan y a deshaci di tur e publicacionnan di Testigonan di Yehova cu e por a haya. Pero mi a logra sconde un Bijbel, un buki di cantica, dos volumen di E Toren di Vigilancia, dos Anuario di Testigonan di Yehova, y un buki titula E berdad cu ta hiba na bida eterna.a Durante mi ultimo studio, mi a puntra Eddie Besson kico mi por a haci, ya cu mi tawata stima Yehova masha hopi. El a anima mi pa studia riba mi mes y haci hopi oracion. El a sigura mi cu Yehova lo a percura pa mi. Mi tawatin apenas 14 aña di edad.

Mi Mes A Tene Mi “Reunionnan”

Djei padilanti, tur diadomingo mi tawata drenta mi camber y haci como si fuera mi tawata na un reunion. Mi tawata canta e cantica “Fiha Bo Bista Riba e Recompensa!” na cuminsamento y cabamento pasobra esei tawata e unico cantica di Reino cu mi por a corda. Te awe, mi no por canta e cantica aki sin cu mi wowo yena cu awa. Tambe mi tawata studia un articulo di e Toren di Vigilancia den e volumennan cu mi tawatin. Mi tawata sera mi “reunion” cu oracion. Pues aunke mi no tawata asocia mas cu e Testigonan, mi a sinti cu Yehova tawata cu mi.

Ora mi a haci 17 aña, ami cu Mami a muda bai Montreal. Tawata añanan dificil, pasobra nos hogar sigur no tawata un refugio di amor.

El A Haya Mi!

Un dia Mami a acepta e buki Bo por biba pa semper den Paradijs riba tera di e Testigonan di Yehova. Ora mi a yega cas, mi a mir’e riba mesa y a cuminsa blader den dje. Na momento cu mi a mira e nomber di Dios, Yehova, den dje, mi a cuminsa yora y mi a bisa den mi mes: “Yehova, bo a haya mi!”

Mi mester a tuma contacto cu mi rumannan cristian. Pero con? Mami a bisa mi cu e kier sa cu un di e biciñanan ta Testigo di Yehova. Pues riba caminda pa trabou, mi a pasa cas di nos biciña y primi bel di porta. Un homber mitar na soño a bini na porta. Ora mi a bis’e cu mi ta un Testigo di Yehova y cu mi kier batisa, el a keda masha sorprendi! El a haci areglo pa un ruman mohe cristian cu yama Josée Miron studia Bijbel cu mi. Pero atrobe Mami a cuminsa opone mi studio di Bijbel. El a bisa mi cu mi tawatin cu warda te dia mi haci 18 aña pa mi por bira un Testigo.

Un Bida di Famia Cueste Loke Cueste?

Mi doño di trabou a ripara cu mi situacion na cas tawata bayendo di malo pa piyo. Varios biaha e tawata invita mi pa pasa fin di siman serca e cu su casa. Door cu mi tawata gusta cabai, hopi bes nos tawata bai core cabai hunto. Mi a sinti cu nan tawata manera mi mayornan.

Un dia mi doño di trabou a bisa mi cu e cu su casa tawata stima mi hopi y cu nan tawata kier pa mi bin biba serca nan. El a ofrece mi algo cu semper mi a desea, esta, un famia amoroso, pero bou di e condicion cu lo mi a stop di asocia cu Testigonan di Yehova. Nan a duna mi un siman pa pensa riba nan oferta, pero mi no tawatin mester di ni sikiera un dia. Mi a contesta nan mesora. Nunca Yehova a bandona mi, y pesei ami tampoco lo no bandon’e.

Mi Sirbishi na Dios

Pa motibo di e dificultadnan cu mi tawata pasa aden na cas, mi a muda bai biba serca mi tata di criansa. El a anima mi pa sigui studia Bijbel, y riba 17 di december 1983, cu 19 aña, mi a batisa. Mi tawata hopi contento di mira Eddie Besson na mi bautismo. Awor si no tawatin duda den su mente cu mi ta un Testigo di Yehova!

Sinembargo, mi tata di criansa su comportacion pa cu mi a cambia despues cu mi a batisa. Ki ora cu el a mira mi haci oracion, e tawata papia masha duro y asta tawata tira mi cu cos! Tambe el a insisti pa mi sigui un educacion avansa den un manera cu lo a stroba mi alcansa mi meta di bira un pionero, un evangelisado di tempo completo. Despues di tempo el a saca mi for di su cas. El a duna mi un cheque di 100 dollar y bisa mi cu ora mi cobr’e, lo mi corda cu no ta Yehova ta percura pa mi.

Mi a bira un pionero dia 1 di september 1986, y te awe mi tin e cheque ei, sin nunca a cobr’e! Tin biaha tawata dificil pa traha pionero den un area di cunucu sin auto. Pero miembronan di e congregacion local tawata masha bondadoso y un bon yudansa pa mi.

Cu tempo, mi a topa un homber cristian amabel cu yama Ruben Lenz. Nos a casa na 1989. Actualmente Ruben ta sirbi como anciano di congregacion na Milton, Ontario, Canada, caminda nos ta bibando for di aña 2002. Nos matrimonio tawata un di e bendicionnan mas grandi cu Yehova a drama riba mi. Mi a sigui den e sirbishi di tempo completo te ora nos a haya nos prome yiu, Erika, na 1993. Un poco mas cu tres aña despues, nos a haya un yiu homber cu yama Mika. Despues di a pasa hopi aña mi so, Yehova Dios a bendiciona mi ricamente cu un famia cu ta stim’e mescos cu ami ta stim’e.

Aunke pa un tempo mi tawata separa for di e pueblo di Yehova segun cu mi tawata crece, nunca mi a stop di spera riba Dios y carga mi speransa di bida eterno den Paradijs. (Huan 3:36) Mi ta hopi gradicido cu Yehova a “haya” mi!

[Nota]

[Plachi na pagina 23]

Coriendo cabai di mi doño di trabou

[Plachi na pagina 23]

Nelly Lenz cu su esposo, Ruben, y yiunan, Erika cu Mika