Nos Tur Tin Mester di Amigo

“Un amiga ta un persona cu bo por papia abiertamente cu ne tocante tur cos, un persona cu bo por bel ki ora cu ta.”—Yaël, Francia

“Un amiga ta compronde ora bo ta gehurt y ta sinti e mesun dolor cu bo ta sinti.” —Gaëlle, Francia

“T IN un amigo cu ta mas pega cu un ruman.” (Proverbionan 18:24) For di un 3.000 aña pasa cu e palabranan ei a keda skirbi den Bijbel, te cu awe, naturalesa humano no a cambia. Keto bai amistad ta mesun importante pa hende su estado mental cu cuminda y awa ta pa hende su curpa. Sinembargo, hopi hende tin dificultad pa satisface e necesidad basico aki di amistad. Soledad ta un cos comun. “Nos no tin cu busca leu pa mira algun di e causanan”, segun Carin Rubenstein y Phillip Shaver den nan buki In Search of Intimacy (En Busca di Intimidad). Nan ta menciona factornan manera “mobilidad extenso”—e echo cu hende ta cambia di cas cu frecuencia—“stadnan impersonal patapata di criminalidad”, y e echo cu “contacto direct cu otro hende den comunidad a ser remplasa pa wakmento di television y video na cas.”

Tambe bida moderno ta caba cu nos tempo y energia. Letty Pogrebin a skirbi den su buki Among Friends (Entre Amigo): “Den un siman, un habitante di un stad djawe ta bin den contacto cu mas hende cu un habitante di un pueblo di siglo 17 a topa den un aña of asta den henter su bida.” Siendo cu kisas nos conoce centenares di hende, lo por ta dificil pa presta suficiente atencion na personanan individual pa nos por cultiva y mantene amistadnan intimo.

Asta na luganan cu no mucho tempo pasa tawatin un ritmo di bida mas trankil, condicionnan social ta cambiando rapidamente. Ulla, kende ta biba na Oost Europa, ta bisa: “Nos tawatin custumber di ta hopi, hopi pega cu nos amigonan. Pero awor hopi di nan ta completamente absorba den nan trabou of den actividadnan personal. Tur ora bai tur hende ta druk, y nos ta sinti con pocopoco nos amistadnan bieu ta kibra.” Den e ambiente pura pura di nos tempo moderno, kisas nos no ta duna masha importancia na mantene nos amistadnan.

Pero nos ta keda cu e intenso necesidad di tin amigo. Vooral hobennan ta sinti e necesidad aki. Manera Yaël, cita ariba, ta splica, “ora bo ta jong, bo tin cu sinti cu bo ta ser acepta y cu bo ta pertenece na un grupo, sinti cu bo ta pega cu un hende.” Sea nos ta hoben of bieu, nos tur tin mester di amistadnan felis y intimo. Y apesar di e dificultadnan, tin hopi cos cu nos por haci pa haya berdadero amigo y keda cu nan. E siguiente articulo lo trata esaki.