“Tur Hende Mester Lesa e Buki Aki”

DI UN ESCRITOR DI SPIERTA! NA POLONIA

Na principio di zomer 2003, e buki Siña for di e Gran Maestro a keda presenta na hopi idioma na congresonan rond mundo. Na Polonia, mescos cu na otro pais, e reaccion riba e buki aki yen di plachi bunita tawata remarcabel. Aunke e ta diseña specialmente pa mucha chikito, cartanan skirbi door di teenager y adulto ta indica cu hende di tur edad ta disfruta di dje. Aki ta sigui algun fragmento di loke nan a skirbi.

“Mi nomber ta Agata, y mi tin ocho aña. Ora mi a haya e buki aki mi a sinti mesora cuanto Yehova ta interesa den mi. E capitulo cu mi gusta mas tanto ta number 7, ‘Obediencia Ta Scapa Bo.’ No ta tur biaha mi sa obedece mi mayornan, pero awor mi sa cu mi tin cu cambia pasobra Yehova ta stima mucha obediente.”

Marlena, un hobensita di 13 aña, a skirbi yen di admiracion: “Mi sa cu e publicacion aki ta pa mucha mas chikito, pero mi ta kere cu tur hende gust’e. Ora mi les’e, e ta fortalece mi fe den Yehova y den Hesus. Asta cosnan complica ta ser splica den un manera simpel. Mi no por pon’e abou. Anto e plachinan ta masha bunita! E preguntanan cu ta compaña nan lo lanta e curiosidad di curasonnan hoben! E buki ta tremendo, pesei mi ta lesand’e cu sumo atencion. Masha danki mes.”

Justyna, un mucha mohe di 15 aña, a bisa con interesante el a haya e buki: “E capitulonan cu mi a lesa a fasina mi asina tanto cu mi kier gradici boso sinseramente pa e regalo bunita y instructivo aki. Mi ta haya cu tur hende mester lesa e buki aki, asta hende grandi. Mi ta haya cu e ehempelnan cu e ta duna ta simpel y suficiente comprendibel, asta pa un mucha di un aña. Anto e plachinan ta papia pa nan mes. Di tur manera, ta imposibel pa expresa cu palabra loke mi ta sinti ora mi ta lesa e buki.”

Eunika tambe a expresa su gratitud pa e publicacion aki. Aunke e tin 19 aña, e ta lesa e buki nobo cu smak y a bisa cu e ta hay’e “practico pa teenagernan.” Tambe el a skirbi: “E tin conseho balioso pa bida di tur dia: na cas, na scol y den congregacion. Danki pa e regalo aki.”

Maria, e mama felis di Oliwia cu tin un aña, a observa con su yiu mohe ta reacciona riba e plachinan colorido, y el a bisa: “Mi kier gradici boso di henter mi curason pa e yudansa unico aki pa siña mucha. Nos yiu Oliwia no por kita su wowo for di e buki. E ta sinta den nos scochi y kier pa nos cont’e loke tin den e capitulo aki of aya. El a gusta specialmente e plachi na pagina 83, cu ta mustra dos mucha mohe di diferente color ta brasa otro. Otro plachinan ta parce asina echt cu e ta mishi cu nan, brasa nan y smile cu nan.”

Tambe Maria a enfatisa e balor educativo di e buki: “E ta trata asuntonan serio relaciona cu sex (pagina 58-60) y abuso sexual di mucha (pagina 170-1). E ta un excelente yudansa pa mayornan cu kier uza sabiduria pa lanta nan yiunan den e mundo malbado djawe caminda tin tantisimo peliger scondi.”

E publicadonan di Siña for di e Gran Maestro ta spera cu e buki lo yuda abo y bo yiunan tambe beneficia di e siñansanan cu Hesucristo, e Gran Maestro, a presenta na humanidad casi 2.000 aña pasa.

[Plachi na pagina 27]

Agata

[Plachi na pagina 27]

Justyna

[Plachi na pagina 27]

Marlena

[Plachi na pagina 27]

Maria y Oliwia

[Plachi na pagina 27]

Eunika