Bunita y Dushi!

BISHITA un hardin di flor, y bo sentidonan lo tin un experencia dushi y agradabel. Bo bista ta gosa di e flornan su color y forma y tambe di nan diseñonan complica. Bo ta hole nan fragancia. Bo ta fula varios textura di nan petalonan. Pero kico di bo sentido di sabor? Bo por haya placer tambe den e sabor di flor? Den algun pais, hende tin siglonan ta disfruta di e sabor di flornan comibel. Si bo tin un di e siguiente flornan den bo hardin di flor of bo hofi di berdura, kisas bo tambe por disfruta di e experencia.a

E Rosa Romantico

Rond mundo, rosa (famia di Rosa) ta probablemente e flor mas conoci y mas gusta. Fuera di e sortonan primario, tin miles di sorto cu hende a crusa cu otro. Como cu factornan manera e tipo di tera y temperatura ta influencia sabor di flor, ta consehabel pa purba un petalo di e rosa of di cualkier otro flor prome cu bo dicidi di uz’e como cuminda. Probablemente lo bo ripara cu e base di e petalo ta un tiki marga. Si ta asina, corta e parti ei afo, of si bo ta sirbi henter e flor, come solamente e parti mas ariba.

E lista di plato cu bo por enrikece cu rosa ta casi sin fin. Purba flor di rosa den salada, kisas cu un tiki keshi suave y noot gechop. Uza petalo machica di rosa cora como un extra ingrediente den bo sous faborito pa agrega sabor y color. Y dicon no duna bo spaghetti e toke final di petalo di rosa corta na repi repi? Tambe rosa lo mehora e sabor di ijscream y di bo co’i bebe faborito.

Flor di Pampuna

Registronan cu ta data for di siglo 16 ta indica cu hende tawata uza flor di un tipo di pampuna, zucchini (Cucurbita pepo), como cuminda na continente di America. Y ta parce cu indjannan Mericano tawata come solamente e flornan macho (esnan cu ta crece riba stengel largo y delega) pa asina duna flornan embra (esnan cu tin un fruta chikitico nan tras) chens di reproduci. Prome cu cushina e flornan, kita e blachinan di pafo cu tin manera sumpiña fini riba nan. Por laga of por kita e pistilo (stamper) di e flor. Den platonan principal y sopi, e sabor suave di flor di pampuna ta combina bon cu azeta di oleifi, maishi tierno y e pampuna mes. Pa un sabor mas fuerte, hasa e flornan den un tiki azeta y agrega siboyo, conoflok, yerba y specerij di bo gusto. Tambe bo por yena e flornan cu un mescla di keshi, siboyo y yerba, anto sera e puntanan. Bati algun blanco di webo, agrega e dornan, y dop e flornan den e mescla ei. Por ultimo, dop e flornan den paneermeel, hasa nan den hopi azeta, y disfruta di nan sabor unico!

E Colorido Viooltje

Viooltjes di dos of tres color (Viola wittrockiana) tipicamente tin pleki preto riba nan petalo, locual ta duna nan un aparencia un poco straño. Segun Encyclopædia Britannica, expertonan ta kere cu viooltjes di hardin ta un sorto cultiva di esun di mondi (Viola tricolor), cu tin color biña, blanco y geel. Viooltjes di mondi tambe ta comibel, pero e buki Edible Flowers—From Garden to Palate (Flornan Comibel—For di Hardin te den Boca) ta bisa cu si com’e na “cantidadnan grandi [e] por ta venenoso.” E flor ta duna hopi sabor y ta drecha e aparencia di salada di berdura y salada di fruta. Uza henter e flor, y agreg’e un poco prome cu sirbie y despues cu bo a pone binager den e salada.Tambe bo por sirbie riba bo sopi faborito.

Un di tres flor comibel di e famia di Viola ta maarts viooltjes (Viola odorata), cu ta combina hopi bon cu desert y co’i bebe. (Wak e cuadro “Flornan Dushi pa Co’i Bebe.”) Ningun otro flor di e famia di Viola ta ser considera comibel.

E Leli Bibito

E tantisimo blachinan largo y fini cu ta sali for di e batata di daglelie (famia di Hemerocallis) ta algo tipico di e mata aki. No mester confundi su flornan cu tin un bida cortico cu otro flor di e mesun famia, Liliaceae. Ya for di hopi tempo hende ta uza daglelie den cushina, y e flor su color ta varia di geel pa cora. Si cushna e flor aki un tiki asina, por sirbie como berdura. Un otro posibilidad ta di combina su petalonan cu ingredientenan di bo gusto pa traha un pasta moli y caba has’e. Decor’e cu un flor hente.

Algun Otro Flor Comibel

E flor di yucca (famia di Yucca), cu ta crece specialmente den climanan seco of semi-seco, ta rico na vitamina y calcio.b Come solamente e petalonan; si nan ta un poco marga lo bo tin cu herbe nan un tiki pa kita e marga. Flor di lamunchi (Citrus limon), flor di apelsina (Citrus sinensis) y flor di menta (famia di Mentha) ta masha dushi pa agrega na co’i bebe, salada y desert.c

No tin duda cu flor ta un regalo pa nos sentidonan y un ingrediente importante pa nos disfruta di bida. Nan realmente ta duna nos mas motibo pa gradici nos amoroso Creador.

[Nota]

[Cuadro/Plachi na pagina 26]

FLORNAN DUSHI PA CO’I BEBE

Pone un petalo of un flor chikito den cada hoki di bo baki di traha ijs prome cu bo basha awa aden. Pon’e den vriezer manera custumber. Uza e blokinan di ijs aki den bo co’i bebe faborito.

[Reconocemento]

Adapta for di El Cultivo de Hierbas.

[Cuadro/Plachi na pagina 26]

DUSHI DI FLOR

Bati un blanco di webo, y uza un cuashi pa hunta un capa fini riba cada flor limpi y seco. Haci sigur di cubri tur e petalonan completamente. Cu un sefta, stroi sucu di puiro pocopoco riba e petalonan. Sagudi kita e exceso di sucu, y pone e flornan seca pa varios ora.

[Reconocemento]

Adapta for di Cook’s Thesaurus.

[Cuadro na pagina 26]

PRECAUCIONNAN IMPORTANTE

Tin flor ta venenoso. Haci sigur cua ta esnan comibel. Si bo ta duda, no come nan.

No come ningun flor cu a ser trata cu pesticida of cu cualkier otro kimico. (Esaki hopi bes ta e caso di flornan cu bo ta cumpra na floresteria, hardineria y algun luga cu ta cultiva y bende mata.) Come solamente flornan cultiva organicamente y cu ta planta leu for di canto di caminda.

Personanan cu tin asma of alergia pa cierto mata no mag come flor.

Mescos cu fruta y berdura, mester laba flor bon, specialmente si ta bai come nan curu.

[Plachi na pagina 25]

Rosa

[Plachi na pagina 25]

Flor di pampuna

[Plachi na pagina 25]

Viooltjes

[Plachi na pagina 25]

Daglelie

[Plachi na pagina 26]

Flor di lamunchi