Lo Bo Kier Purba Flor di Pampuna?

DI UN ESCRITOR DI SPIERTA! NA MEXICO

ORA cu e varios tipo di matanan di pampuna ta floria, nan ta laga un hofi di berdura parce mas un hardin di flor. E bunita flor geel—di un diseño simpel y elegante—no tin fragancia, pero definitivamente e ta pone nos boca core awa. Acaso nos kiermen cu hende ta echt come flor? Si. De echo, segun e revista Cuadernos de Nutrición, nos por bisa cu Mexico ta e pais cu tin e cantidad mas grandi di receta cu ta uza flor como ingrediente.

Pa loke ta flor di pampuna, ya pa hopi siglo nan ta com’e na Mexico. Di e tantisimo variedadnan di pampuna cu tin, e flor di zucchini (un tipo di pampuna) ta esun mas uza pa cuminda. Pero nos tin cu percura uza solamente e flornan macho si nos kier haya zucchini mes tambe. Nos ta djis wak e stengel di e flor. Si nos mira un zucchini chikito na dje esei ta nifica cu e ta un flor embra y ta miho pa nos no kit’e.

E sabor suave di e flor di pampuna ta combina bon cu un variedad di plato. Hopi bes, nos ta hasa un poco conoflok cu siboyo y kisas tambe poco promente. Ora cu tur esaki ta sasona y e conoflok a bira moli, nos ta agrega un poco di e flornan laba y corta chikito chikito y sin nan stengel. Caba nos ta tapa e mescla y lag’e cushina riba candela abou pa un par di minuut. Tambe bo por agrega hunto cu e flornan, zucchini corta na bloki, pipita di maishi tierno, un poco manteca y yerbanan aromatico. Nos ta pone e mescla aki riba un tortiya curu y dobl’e. Caba nos ta laga e tortiya hasa riba casuela, y asina nos ta haya un sabroso quesadilla di flor di pampuna.

Nos quesadilla no solamente ta smak bon sino tambe ta nutritivo, ya cu flor di pampuna ta contene cantidadnan chikito di proteina, calcio, hero, tiamina, niacina, vitamina C y vitamina A.

Tambe nos ta traha un dushi sopi cu e flor aki. Simplemente nos ta sigui e procedura menciona ariba, agrega poco buyon, anto sirbie cayente. Nos por decor’e cu un tiki keshi y pidanan di tortiya hasa.

Tin hopi plato mas cu bo por prepara cu e flor util aki. Pues, pakico bo no ta crea un plato di flor di pampuna? Lo bo gust’e sigur!