E Siboyo Tan Gusta

Di un escritor di Spierta! na Mexico

Un cushina lo no ta completo sin siboyo den dje. Casi den tur cos bo por tira e berdura di hopi uzo aki, manera den sopi, salada, un plato principal, remedi di cas. Asta e por pone bo yora un tiki.

E siboyo cu bo ta uza na cas ta pertenece na un especie di bunita mata di flor—manera siboyo di oro, siboyo di bruid y conoflok di adorno—y e mes tambe ta saca flor masha bunita. Ma loke bo ta haya practicamente den tur cushina na mundo ta e batata, cu basicamente ta un conopi di flor cubri cu blachi diki y cu ta crece bou di tera.

Siboyo ta un di e berduranan di mas bieu cu hende a yega di cultiva. Bijbel ta duna un indicacion con comun uzo di siboyo tawata. E ta mustra cu pa rond di aña 1513 prome cu nos era, e pueblo di Israel a anhela e siboyonan cu nan tawata come tempo cu nan tawata esclabo na Egipto.—Numbernan 11:5.

Pero kico a haci e smak di siboyo asina gusta den diferente cultura? Algo cu sigur a contribui na esei ta su componentenan di sulfur, locual ta dun’e un aroma hopi special y hacie un tiki picante. Y su acido sulfenico ta forma e substancia cu ta ocasiona e lagrimanan bon conoci.

Hopi Mas cu Djis un Co’i Come

Siboyo ta hopi beneficioso pa salu di hende. E ta contene substancianan nutritivo manera calcio, fosfor y vitamina C. Pero atrabes di historia, siboyo a haya su balor specialmente pa su efectonan medicinal. Te cu awe hende ta uz’e pa combati varios enfermedad, manera ferkout, inflamacion di garganta, aderverkalking, malesa di ader di curason, diabetes y asma. Tambe segun expertonan, siboyo ta yuda combati infeccion, colesterol, inflamacion, trombosis y cancer.

Siboyo ta bini na diferente color: blanco, geel, maron, berde, cora y biña. Bo por hay’e pa come fresco, cushna, den bleki, den zuur, seco, na puiro, fini geslice of bloki bloki. Pues, aunke siboyo ta pon’e bo yora un tiki, e no ta un berdura maraviyoso?