Hobennan Sa Puntra . . .

Kico Mi Tin Cu Haci Ora un Otro Mucha Ta Conta Mi Su Problemanan?

“E mucha mohe aki ta bai mi scol. Su mama y su tata ta den diborcio, y su puntonan a cuminsa baha. Y normalmente e ta conta mi su problemanan di famia.”—Janet, 14 aña di edad.a

“Un mucha mohe na mi scol a conta mi cu el a tene relacion sexual cu un mucha homber. Y ora el a sali na estado, el a comete aborto sin cu su mayornan sa mes.”—Mira, 15 aña di edad.

IMAGINA cu bo ta combersando cu un amigo of un colega di scol. Diripiente e ta desahoga su mes y ta conta bo un problema.b Podise e tin problema cu cosnan tipico pa teenager manera, paña, placa, aparencia, pareunan of su puntonan. Di otro banda, kisas e tin problema cu ta hopi mas serio y dificil.

E situacion na Merca ta mustra bon cla con serio problemanan cu hobennan ta confronta por ta. Segun e revista Newsweek, “Institutonan Nacional di Salu Mental (NIMH) ta calcula cu 8 porshento di adolecente y 2 porshento di mucha (algun tin asta 4 aña) tin sintomanan di depresion.” Un otro encuesta a remarca: “Mas o menos 97 mucha mohe di cada 1.000 entre 15 pa 19 aña di edad—un miyon teenager Mericano—ta sali na estado tur aña. Mayoria di nan—78 porshento—no ta sali na estado intencionalmente.” Ademas tin miyones di hoben cu ta biba den un ambiente instabil na cas. Miles di nan ta victima di abuso fisico of sexual. Mas cu mitar di e studiantenan cu ta den nan ultimo añanan di scol secundario na Merca a yega di bebe burachi. Un cantidad alarmante di hoben tin iregularidad cu comemento.

Pesei anto, no ta nada straño cu hopi hoben tin mester di un persona pa nan papia cu ne y confia nan problemanan! Y hopi bes e prome persona cu nan ta acerca ta un di nan pareunan. Kico bo mester haci si ta abo ta e pareu cu nan ta scohe? Si bo ta un cristian esaki sigur lo no ta un sorpresa pa bo. Segun e mandato di Bijbel cristiannan mester ta “un ehempel” den nan conducta y ser rasonabel. (1 Timoteo 4:12; Filipensenan 4:5, NW) Pesei, por ta masha bon cu otro hobennan—incluso esnan cu no ta Testigo di Yehova—kier confia bo nan problemanan. Pero con abo tin cu trata cu un situacion asina? Kico bo tin cu haci si bo sinti cu loke el a bisa bo ta dificil pa bo trata cu ne?

Sea un Bon Scuchado

Bijbel ta bisa cu tin “un tempo pa keda keto y un tempo pa papia.” (Eclesiastes 3:7) Ora un persona tin un problema y e kier papia cu bo, hopi bes e miho cos cu bo por haci ta djis scucha. De echo, Bijbel ta condena un persona cu ta sera su horea pa “sclamacion di e pober.” (Proverbionan 21:13) Podise a tuma bo compañero hopi tempo prome cu el a haya e curashi pa papia tocante e asunto. E echo cu bo ta dispuesto pa scucha podise ta haci cu ta bira mas facil pa e expresa su mes. Un hoben cristian cu yama Hiram a bisa: “Normalmente mi ta simplemente laga e otro persona papia. Mi ta lag’e bisa loke e tin den su curason, y mi ta purba mustra empatia p’e.” Di igual manera, Vincent a remarca: “Tin hende cu kier djis papia.”

Pues tin bes bo compañero no ta spera cu bo ta soluciona su problemanan. Podise tur loke e tin mester ta un bon scuchado. Pesei, scuch’e! Purba evita di laga e ambiente rond di bo desvia bo, of di interumpie innecesariamente. E echo cu bo t’ei y ta scuch’e so por ta un gran yudansa p’e. Esaki ta mustra cu bo ta realmente interesa den dje.

Pero esaki ta nifica cu bo no tin cu reacciona mes, esta, no bisa nada nada? Hopi ta depende di e tipo di problema. Mayoria bes, un contesta bon pensa y bondadoso ta apropiado. (Proverbionan 25:11) Por ehempel, si ta un conoci a hay’e cu un tragedia personal, lo ta miho pa mustr’e cu bo ta sinti p’e. (Romanonan 12:15) Proverbionan 12:25 ta bisa: “Ansha den curason di hende ta hacie abati, ma un bon palabra ta hacie contento.” Podise loke e persona tin mester ta un poco animacion. Expresa bo confiansa cu e persona lo por trata cu su problema cu exito. Expresionnan manera “Mi por compronde dicon bo ta sinti asina” of “Ta duel mi cu bo a haya bo den e situacion aki”, por laga bo compañero sa cu bo ta sinsero y cu bo kier yud’e.

No obstante, Proverbionan 12:18 ta spierta: “Tin hende ta papia sin pensa, manera hinca di spada.” Ta importante pa bo evita comentarionan manera, “Ma e cos ei no ta nada”, of “Ai, purba lubid’e”, of “Bo no tin nodi sinti bo asina.” Ademas, tene cuidou pa bo no purba minimisa seriedad di un problema door di haci wega cu e asunto. Facilmente bo compañero lo por yega na e conclusion cu bo no ta respeta su sintimentonan.—Proverbionan 25:20.

Pero kico si bo no sa kico pa bisa? Djis sea honesto. Bisa bo amigo cu aunke realmente bo no sa kico pa bisa, bo ta cu ne y cu bo kier yud’e. Puntr’e: “Kico mi por haci pa yuda bo?” Si, podise tin algun cosnan util cu bo por haci pa alivia su carga.—Galationan 6:2.

Duna Conseho Amigabel

Kico si bo ta haya cu bo compañero tin mester di conseho? Claro cu como un persona hoben, bo no tin masha experencia. (Proverbionan 1:4) Pesei podise bo no ta cualifica pa duna conseho riba tur problema. Sinembargo, Salmo 19:7 den e Traduccion di Mundo Nobo ta bisa: “E recordatorio di Yehova ta digno di confiansa, e ta haci hende sin experencia sabi.” Si, aunke bo ta “sin experencia” bo por tin suficiente conocemento di principionan biblico pa yuda un compañero cu tin mester di yudansa. (Proverbionan 27:9) Sin cu bo ta dun’e conseho na un manera iritante of dominante, pakico no comparti algun punto for di Bijbel cu ne? Si bo no sa sigur cua principio biblico ta aplicabel den su caso, haci un poco investigacion. Atrabes di añanan e rubrica “Hobennan Sa Puntra . . .”, den e revista aki a publica hopi conseho biblico riba un variedad di topico. Un otro fuente balioso di informacion ta e buki Loke hovenan sa puntra—Contesta práctica.c

Podise bo por logra bon resultado door di relata bo propio experencianan. Kisas bo por tin asta algun sugerencia practico. Sin impone bo propio punto di bista riba dje, bo por splic’e kico a yuda bo. (Proverbionan 27:17) Pero corda si cu cada situacion ta diferente. Loke a funciona den bo caso kisas no ta funciona pa tur hende.

Palabranan di Cautela

No dedica demasiado tempo na problemanan di hobennan cu no ta teme Yehova of cu no ta respeta normanan cristian. Hopi di nan problemanan kisas ta resultado di nan estilo di bida cu no ta na harmonia cu Bijbel. Intentonan pa yuda un persona cu ta menosprecia conseho di Bijbel, por resulta den frustracion pa bo y e persona. (Proverbionan 9:7) Tambe bo por haya bo ta tende un cantidad di bobedad of asta palabranan obsceno. (Efesionan 5:3) Pues si un combersacion ta laga bo sinti bo incomodo, tuma curashi y bisa e persona cu bo no por yud’e soluciona su problema of cu bo ta sinti bo incomodo cu e topico ei.

Tene cuidou ora un miembro di e sexo opuesto ta busca manera pa comparti su sintimentonan intimo cu bo. Bijbel ta spierta cu e curason por ta engañoso of traicionero. (Yeremias 17:9) Asociacion estrecho por lanta sintimentonan romantico y por hiba asta na inmoralidad sexual.

Ademas, no cai den e trampa di priminti cu lo bo no bisa ni un hende. Sea modesto y reconoce cu kisas e persona cu ta papia cu bo tin mester di mas yudansa cu abo no por duna.—Proverbionan 11:2, NW.

Ora Yudansa di Otronan Ta Necesario

Den hopi caso e miho cos cu abo por haci ta busca yudansa di otronan pa bo por yuda e persona. Mira, e mucha mohe cu nos a cita na principio, a bisa: “Echt mi no tawata sa con pa yuda mi colega di scol. Pesei mi a papia cu un anciano di congregacion tocante e asunto, y el a duna mi algun bon conseho pa mi por a yud’e.” Si, den e congregacion cristian di Testigonan di Yehova, tin hombernan experencia cu por yuda bo. (Efesionan 4:11, 12) E ancianonan a sugeri Mira pa anima su colega di scol pa papia cu su mayornan. E mucha mohe a sigui Mira su conseho. Mira a bisa: “Su situacion a mehora. Awor e kier sa mas di Bijbel.”

Awor kico si un compañero cristian conta bo algo confidencial? Claro cu lo bo kier haci tur loke ta rasonabel pa yud’e. (Galationan 6:10) Si bo ta teme cu e ta desviando for di e normanan moral di Yehova, no tene miedo di “papia berdad” cu ne. (Efesionan 4:25) Sea honesto, pero no husto den bo mes bista. E echo cu bo ta dispuesto pa papia francamente cu ne ta un señal cu bo ta un berdadero amigo.—Salmo 141:5; Proverbionan 27:6.

Den un situacion asina, ta masha importante pa bo anima bo amigo pa busca yudansa, serca su mayornan, un anciano of un cristian maduro cu e ta respeta. Si un periodo di tempo rasonabel a pasa y e no a papia cu ningun hende, abo lo tin cu papia cu un otro persona p’e. (Santiago 5:13-15) Pa bo haci esei lo bo tin mester di curashi, pero esaki ta mustra cu bo realmente ta interesa den dje y cu bo kier lo miho p’e.

Claro cu Yehova no ta spera cu bo tin cu soluciona problema di tur hende. Pero ora un persona confia bo su problemanan, bo no tin nodi sinti bo inutil. Aplica loke bo a siña como cristian, y duna prueba cu bo ta un berdadero “amigo.”—Proverbionan 17:17.

[Nota]

[Plachi na pagina 23]

Den algun caso kisas bo tin cu busca yudansa pa un amiga cu ta den problema