Hopi Elogio pa un Manual pa Hobennan

E CABES di e Academia pa Mucha Mohe Tigoni na Limuru, Kenia, a skirbi e oficina di sucursal di Testigonan di Yehova den e pais ei pa pidi nan algun ehemplar di e buki Loke hovenan sa puntra—Contesta práctica. El a bisa: “Manera boso sa, pa trata cu teenagernan por ta un desafio. Nos tin dos ehemplar di boso buki, y nan a resulta di ta util pa tanto e maestronan como e studiantenan. E tin suficiente informacion den dje y e ta satisface nos necesidadnan y tambe esnan di e teenagernan.”

Despues, e cabes di scol a bisa: “Directiva [di scol] lo kier uza e buki practico aki pa instrui nos studiantenan. Nan ta gusta e buki aki masha. Nos mayornan ta masha contento cu tur e esfuersonan cu nos ta haci pa yuda nan yiunan. Pa aworaki, nos ta pensa cu 25 ehemplar di e buki aki lo ta suficiente.”

E buki Loke hovenan sa puntra ta analisa pensamento y sintimento di hobennan profundamente. E ta stimula combersacionnan sano riba topiconan manera: “Con Mi Por Haci Mi Mayornan Duna Mi Mas Libertad?”, “Mi Mester Hui for di Cas?”, “Con Mi Por Haya Berdadero Amigo?”, “Cua Ofishi Mi Mester Scohe?”, “Kico di Relacion Sexual Prome Cu Casamento?”, y “Con Mi Por Sa si Ta Berdadero Amor?”

Esakinan ta djis un par di titulo di e capitulonan. E buki aki tin 39 capitulo y e ta trata hopi otro topico. Pa bo haya un ehemplar, yena e cupon akibou y mand’e na e adres riba e cupon of na un adres mas cumbiniente menciona na pagina 5 di e revista aki.

□ Sin ningun obligacion, mi ta pidi un ehemplar di e buki Loke hovenan sa puntra—Contesta práctica.

□ Por fabor, tuma contacto cu mi pa un estudio di Bijbel gratis na cas.