E Cueba di Kiniki

DI UN ESCRITOR DI SPIERTA! NA MEXICO

PARA riba un tapijt di miyones di “kiniki” di cueba, un Mericano specialisa den exploracion di cueba no por a keda sin declara: “Dios, danki cu bo a duna mi bida pa mira e maraviya aki!” E tawata di bishita na e Cueba di Kiniki den suitost di Mexico, un red di cueba cu ta midi 529 meter largo y 17 meter hundo. Den e cueba bo por mira formacionnan espectacular di baranca. Como cu nos a tende di e cueba, nos kier a mir’e cu nos mes wowonan.

E cueba ta keda riba tereno di un rancho priva, pues nos tawata afortuna cu nos conoce e esposa di e doño. Ora nos a pasa door di un buraco pa yega na e sala di kiniki, nos a mira aproximadamente 200 miyon perla of kiniki di cueba. Nan a forma un tapijt di 12 centimeter diki y di aproximadamente 50 meter largo. Ningun hende por keda sin yena su man cu e perlanan y laga esnan mas chikito—tamaño di bonchi—basha door di su dedenan. Esnan di mas grandi ta tamaño di un apelsina chikito. Si pa curiosidad bo hala e kinikinan un banda pa yega na e vloer solido, lo bo ripara cu e ta forma di un capa di perla lizo pega na otro.

Con kiniki of perla di cueba ta forma? Awa ta lek duro y forma plas. E lekmento aki ta pone e blafon y muraya di e cueba lek un mineral cu yama calciet, y e calciet aki ta cubri un pida materia straño, manera santo, fragmento di weso of asta pida straw. Di e manera aki, segun cu pocopoco ta agrega mas calciet, un perla ta forma.

Aunke e hendenan local conoce e cueba aki pa añanan, ta poco tempo pasa numa specialistanan djafo, fasina pa e gran cantidad di perla, a bishit’e. Actualmente, hende ta haciendo esfuerso pa investiga e cueba extraordinario aki y conserv’e.

Luganan manera e Cueba di Kiniki ta recorda nos di e palabranan di Salmo 111:2: “Grandi ta e obranan di [Yehova]; tur esnan cu tin delicia den nan ta studia nan.”