For di Nos Lectornan

Moises Mi a caba di lesa e serie di articulo “Moises—Hende of Mito?” (8 di april 2004) Mi tin cu admiti si cu mi no a spera di haya asina tanto informacion como reaccion riba e declaracionnan di academiconan cu ta pretende cu Moises ta un persona ficticio. Mi tin sigur cu si un persona sinsero lesa djis un parti so di e serie aki, esei lo ta suficiente pa fortalece su fe den Yehova.

Y. M., Rusia

Puntualidad Masha danki mes pa e articulo “Sea Puntual!” (8 di april 2004) Como cu mi ta sirbi den e congregacion, mi ta un cabes di famia y mi tin mi trabou tambe, tin hopi cos cu ta tuma di mi tempo. Aunke mi a saca beneficio di e sugerencianan cu a aparece den revistanan anterior, ta bon pa mira un articulo manera esaki atrobe. Loke mi a gusta specialmente ta e declaracion: “Nos Creador tawata kier pa nos ta conciente di tempo.” Esei realmente a pone mi mira e asunto den e perspectiva corecto. Por fabor, sigui skirbi articulonan practico manera esun aki.

J. S., Merca

Hopi bes mi ta gusta laga cos te na ultimo momento, y aunke mi no ta yega laat, mi ta drumi di mas. Mi a yega di pasa den hopi experencia peligroso door cu mi tin cu pura. E articulo aki a anima mi pa ta mas flexibel den e manera cu mi ta programa mi tempo.

Y. W., Japon

Mal Custumber Mi no por keda sin skirbi y expresa mi aprecio pa e articulo “E Punto di Bista Biblico: Ta Posibel pa Vence Mal Custumber?” (8 di april 2004) Mi tin hopi tempo ta luchando cu un problema di peso. Mi ta perde peso, pero despues mi ta bolbe subi di peso bek. Aunke e articulo no a trata cu e problema spesifico ei, e informacion ta aplicabel. El a yuda mi analisa mi mal custumbernan y mira con nan a contribui cu mi peso a subi. Masha danki mes pa recorda nos cu Yehova ta conciente di nos asuntonan personal cu nos ta luchando cu ne y cu e ta interesa den nan.

M. S., Merca

Discoteca Danki pa e articulo “Hobennan Sa Puntra . . . Kico di Discoteca pa Hobennan?” (8 di mei 2004) Mi ta di acuerdo cu e luganan ei no ta pa cristiannan. Ta duel mi cu mi no a conoce Yehova mas prome den mi bida tempo cu mi tawata bai e tipo di luganan ei.

L., Indonesia

Pa mi ta honesto, mi a yega di bai luganan caminda mi no mester a bai. Mi gusta balia y semper mi tawatin un pretexto. Pero e siguiente dia mi tawata sinti mi culpabel. No cu ami tawata haci malo; pero mi a sinti asina pa motibo di loke tur hende rond di mi tawata haci. E articulo aki a saca e berdad di discotecanan na cla—hopi di nan ta peligroso y inmoral.

D. K., Australia