Ora un Mayor Muri

E PROBLEMA

Dami tabatin seis aña ora su tata a muri di un aneurisma celebral. Derrick tabatin nuebe aña ora su tata a muri di maleza di curason. Y Jeannie tabatin shete aña ora su mama a muri despues di a lucha un aña largo cu cancer na ovario.a

E hobennan aki a enfrenta morto di un ser keri ora nan tabata hopi chikito. Abo a yega di pasa den e mesun tipo di situacion? Si ta asina, e articulo aki por yuda bo deal cu bo perdida.b Pero prome, laga nos ban trata algun punto tocante tristeza cu ta bon pa bo sa.

LOKE TA BON PA BO SA

No ta un manera di expresa tristeza so tin. Esey kiermen cu e manera cu abo ta expresa bo tristeza kisas no ta mescos cu otro hende. E buki Helping Teens Cope With Death ta bisa: “No ta existi un manera simpel of cierto regla cu bo mester sigui pa deal cu morto di un ser keri.” Loke ta importante ta pa bo no tene bo tristeza paden innecesariamente. Dicon no? Pasobra ...

Si bo tene bo tristeza paden, esey por haci bo malo. Jeannie, kende nos a menciona na comienso di e articulo aki, a bisa: “Mi a pensa cu mi mester ta fuerte pa mi ruman muher chikito. Pesey mi a haci duro. Te awe mi tin tendencia di no expresa mi sintimentonan doloroso. Esey no ta bon.”

Expertonan lo bay di acuerdo cu Jeannie. E buki The Grieving Teen ta bisa: “Bo no por keda sin expresa bo sintimentonan. Sino, tardi of trempan, podise net ora bo no ta spera, lo bo explota of bira malo fisicamente.” Ademas, algun hende a cuminsa bebe di mas y droga pa purba lubida nan dolor.

Tristeza por lanta otro sintimentonan desagradabel. Por ehempel, algun hende ta rabia cu e difunto pasobra el a “bandona” nan. Otronan ta culpa Dios pasobra nan ta pensa cu Dios no mester a laga e hende muri. Y tin hopi hende ta sinti nan mes culpabel pa cosnan cu nan a haci of bisa e difunto, y nan no por drecha e asunto mas.

Claramente, e tristeza cu bo ta sinti ora bo perde un ser keri por ta un proceso complica. Con bo por haya alivio y yudansa pa sigui padilanti?

LOKE BO POR HACI

Papia cu un hende. Kisas bo ta sinti cu bo kier ta bo so durante e temporada dificil aki. Pero si bo desahoga bo mes cu un miembro di famia of un amigo, esey lo yuda bo deal cu bo emocionnan y evita cu e tragedia aki ta bira insoportabel pa bo.—Principio di Bijbel: Proverbionan 18:24.

Skirbi den un dagboek. Skirbi tocante e mayor cu bo a perde. Por ehempel, kico ta e cos di mas bunita cu bo ta corda di dje? Skirbi tocante su bon cualidadnan. Cua di nan abo kier imita?

Si pensamentonan negativo ta tortura bo, por ehempel, si bo no por stop di pensa riba algo bruto cu bo a bisa bo mayor prome cu el a muri, skirbi loke bo ta sinti y dicon. Por ehempel, “Mi ta sinti mi culpabel pasobra e dia prome cu mi tata a muri mi a discuti cu ne.”

Despues, analisa si bo sintimento di culpa realmente ta na su luga. E buki The Grieving Teen ta bisa: “Bo no por culpa bo mes p’e echo cu bo no tabata sa cu nunca mas lo bo por pidi despensa. Si un hende ta pensa cu nunca e no mester bisa ni haci nada robes pa e no tin nodi pidi despensa despues, esey no ta realistico.”—Principio di Bijbel: Job 10:1.

Cuida bo curpa. Sosega bon, haci suficiente ehercicio y come bon. Si bo no tin gana di come, en bes di come cuminda grandi, purba come snack saludabel varios biaha durante dia te dia bo apetit habri bek. No purba consola bo mes cu junk food of alcohol. E cosnan ey lo empeora bo situacion.

Papia cu Dios den oracion. Bijbel ta bisa pa bo “tira bo carga riba [Jehova], y e lo sostene bo.” (Salmo 55:22) Oracion no ta algo cu bo ta haci djis pa bo sinti mas mihor. Ora bo haci oracion, bo ta echt comunica cu Dios kende “ta consola nos den tur nos tribulacionnan.”—2 Corintionan 1:3, 4.

Un manera cu Dios ta consola hende tristo ta mediante Bijbel. Bo no ta kere cu ta un bon idea pa examina loke Bijbel ta siña encuanto e berdadero condicion di hende morto y e speransa di resureccion?c—Principio di Bijbel: Salmo 94:19.