Bijbel Realmente Ta “Inspira pa Dios”?

ABO ta kere cu Dios ta e autor di Bijbel? Of bo ta kere cu e ta un buki cu simplemente tin pensamento di hende?

Hasta hende cu ta yama nan mes cristian ta sigui debati riba e pregunta aki. Por ehempel, un encuesta cu nan a haci na Merca na aña 2014 ta indica cu mayoria di hende cu ta yama nan mes cristian a bay di acuerdo cu “di un of otro manera Bijbel tin di haber cu Dios.” Pero di otro banda, mas o menos 1 di cada 5 hende cu nan a entrevista ta considera Bijbel como un buki di “cuenta di antiguedad, leyenda, historia y di norma y balor cu hende a skirbi.” Henter e debate aki ta pone hende puntra nan mes ta kico Bijbel kiermen ora e ta bisa cu e ta “inspira pa Dios.”—2 Timoteo 3:16, BS.

KICO E PALABRANAN “INSPIRA PA DIOS” TA NIFICA?

Bijbel ta consisti di 66 buki chikito y rond di 40 hende a skirbie durante un periodo di mas o menos 1.600 aña. Pero si ta hende a skirbi Bijbel, ta con bin e ta “inspira pa Dios”? Cu poco palabra, e expresion “inspira pa Dios” ta nifica cu ta Dios ta e Fuente di e informacion cu tin den e Scritura. Bijbel mes ta bisa: “Hende a papia di parti di Dios segun cu spirito santo tabata guia nan.” (2 Pedro 1:21) Cu otro palabra, Dios a uza su forsa activo, esta su spirito santo pa transmiti su mensahe na e escritornan di e bukinan di Bijbel. Nos por compara esaki cu un negoshante cu ta bisa su secretario kico pa skirbi den su carta. E ora ey, e carta ta di esun cu a bisa kico pa skirbi y no di esun cu a skirbie.

Algun escritor di Bijbel a tende Dios su mensahe mediante un angel. Otronan a haya vision di Dios. Y den algun caso Dios a duna su mensahe mediante soño. Aunke tin biaha Dios a laga e escritornan uza nan propio palabranan pa skirbi su mensahe, na otro ocasionnan el a bisa nan precies kico pa skirbi. Pero di tur manera, e escritornan a transmiti Dios su pensamentonan y no esnan di nan mes.

Pero ki prueba tin cu ta Dios a inspira e escritornan di Bijbel? Laga nos ban wak tres prueba cu ta duna nos confianza cu Bijbel ta un buki di Dios.