Dominio Propio

KICO TA DOMINIO PROPIO?

Dominio propio ta encera

• siña warda

• domina bo mes

• completa tareanan

• mustra consideracion na otro hende

DICON DOMINIO PROPIO TA IMPORTANTE?

Yiunan cu tin dominio propio por resisti tentacion, hasta ora e tentacion ta atrae nan masha hopi mes. Pero yiunan cu no sa con pa domina nan mes tin tendencia di

• bira agresivo

• bira deprimi

• huma, droga of bebe di mas

• no come saludabel

Segun un estudio, yiunan cu tin dominio propio tin menos chens di haya problema cu salud, problema financiero y problema cu ley ora nan bira grandi. E estudio ey, a yuda Angela Duckworth, un profesora na e Universidad di Pennsylvania, yega na e conclusion aki: “Dominio propio nunca ta di mas.”

KICO POR YUDA BO YIU HAYA DOMINIO PROPIO?

Siña bisa no y cumpli cu bo palabra.

PRINCIPIO DI BIJBEL: “Laga boso ‘si’ ta si, y boso ‘no’, no.”—Mateo 5:37.

Yiunan chikito ta test nan mayornan. Nan ta cuminsa grita of yora—hasta den publico—pa nan haya loke nan kier. Si e mayornan bay na nan amen, e yiunan lo sigui uza e strategia ey pa nan logra loke nan kier.

Pero si e mayor bisa no y cumpli cu su palabra, e yiu ta siña un berdad fundamental di bida: No ta semper nos por haya loke nos kier. Psicologo David Walsh a skirbi: “Ta interesante cu hende cu ta siña e les ey ta parce di ta mas feliz. Nos no ta haci nos yiunan un fabor ora nos ta siña nan cu mundo lo sirbi nan tur loke nan kier riba un teblachi.”a

Si bo bisa no na bo yiu awor, bo ta train e pa bisa no despues na droga, sex prome cu casa of na cualkier otro practica cu no ta bon.

Yuda bo yiu mira kico lo pasa ora e comporta su mes bon y ora e comporta su mes malo.

PRINCIPIO DI BIJBEL: “Kico cu un hende sembra, esey lo e cosecha tambe.”—Galationan 6:7.

Ta importante pa bo yiu compronde cu su accionnan tin consecuencia, pesey falta di dominio propio lo tin resultadonan indeseabel. Por ehempel, si tur ora bo yiu ta perde dominio propio ora e rabia, otro hende lo purba di evit’e. Pero si e siña domina su mes ora e rabia—of ta siña warda cu pasenshi sin interumpi ora otro hende ta papia—hende lo gust’e. Yuda bo yiu compronde cu bida lo ta hopi mihor si e tin dominio propio.

Siña bo yiu kico ta e cosnan mas importante.

PRINCIPIO DI BIJBEL: “Haci sigur kico ta e cosnan mas importante.”—Filipensenan 1:10.

Dominio propio ta yuda nos pa no haci loke ta malo, y e ta yuda nos tambe pa haci e cosnan cu kisas nos no ta gusta haci, pero cu nos mester haci. Ta importante pa bo yiu siña dicidi kico ta mas importante y pa e haci e cosnan ey prome. Por ehempel, e mester haci huiswerk prome, anto despues e por hunga.

Sea un bon ehempel.

PRINCIPIO DI BIJBEL: “Mi a duna boso un ehempel, pa boso tambe haci manera mi a haci cu boso.”—Juan 13:15.

Bo yiu ta observa con bo ta reacciona ora algo ta pone bo rabia. Laga bo yiu mira na bo ehempel cu cos lo bay bon ora un persona tin dominio propio. Por ehempel, kico abo lo haci si bo yiu ta pone bo pasenshi na prueba, lo bo rabia of lo bo keda trankil?