Guia Di Adulto Ta Importante

KEN MESTER GUIA E MUCHANAN?

Yiunan mester di adultonan pa guia nan y conseha nan. Como mayor, abo ta esun cu mester duna bo yiu guia y conseho. Sinembargo, otro adulto por ta un bon influencia pa bo yiunan tambe.

DICON GUIA DI HENDE GRANDI TA IMPORTANTE?

Den hopi pais, mucha no ta pasa mucho tempo cu adulto. Dicon?

• Muchanan ta pasa gran parti di nan dia na scol; eynan tin hopi mas studiante cu docente of otro adulto.

• Ora e muchanan yega for di scol, nan ta keda nan so pasobra nan mayornan ta traha.

• Un informe ta mustra cu na Merca muchanan entre 8 pa 12 aña ta pasa un averahe di mas o menos seis ora riba nan aparatonan electronico tur dia.a

E buki Hold On to Your Kids ta bisa: “Muchanan no ta wak nan mama, tata, maestro of otro adulto responsabel como nan role model. Ni nan no ta acudi na nan pa haya guia y conseho ... Mas bien, nan ta acudi na nan pareunan pa conseho.”

CON LO BO POR DUNA GUIA NA BO YIUNAN?

Pasa tempo cu bo yiunan.

PRINCIPIO DI BIJBEL: “Instrui un mucha den e caminda cu e mester cana, y hasta ora cu e bira bieu e lo no aparta su mes for di dje.”—Proverbionan 22:6.

Normalmente, yiunan kier pa nan mayornan guia nan y yuda nan. En realidad, expertonan ta bisa cu hasta teenager ta prefera pa nan mayornan duna nan conseho en bes di otro teenager. Den e buki You and Your Adolescent, profesor di psicologia Laurence Steinberg a skirbi: “Durante adolescencia y ora nan bira hoben adulto, mayornan ta keda e personanan cu tin mas tanto influencia riba e actitud y comportacion di nan yiunan.” El a sigui bisa: “Yiunan teenager kier sa kico bo ta pensa y ta scucha kico bo ta bisa, hasta ora nan no ta admiti esey of no ta di acuerdo cu bo.”

Ya cu bo yiu kier bo guia, haci loke bo por pa dun’e e guia ey. Pasa tempo cu bo yiunan y bisa nan kico bo ta pensa tocante diferente cos, kico ta importante pa bo y kico bo a siña den bida.

Scoge un persona cu lo por sirbi como un ehempel pa bo yiunan.

PRINCIPIO DI BIJBEL: “Esun cu anda cu hende sabi lo ta sabi.”—Proverbionan 13:20.

Bo conoce un adulto cu por ta un bon role model pa bo yiu? Kisas bo por pidie pa pasa tempo cu ne. Claro, esey no kiermen cu un otro persona ta bira responsabel pa bo yiu. Pero un adulto confiabel cu lo no haci bo yiu daño por yuda bo gui’e. Den Bijbel, un hoben cu yama Timoteo a beneficia hopi di e compania di apostel Pablo, hasta ora el a bira adulto. Y Pablo tambe e beneficia di Timoteo su amistad.—Filipensenan 2:20, 22.

Den nos tempo, hopi famia, esta welo cu wela, omo, tanta y otro miembronan di famia, no ta biba hunto den e mesun cas, bisindario ni pais. Si esey ta bo caso, percura pa bo yiunan haya oportunidad di siña di adultonan cu tin cualidadnan cu bo kier pa bo yiunan tin.