Loke Cientificonan No Sa

Cientificonan a studia practicamente tur loke nan tabata por di nos universo. Pero asina mes, tin hopi pregunta importante cu nan no por contesta.

Cientificonan por splica con nos universo y bida a cuminsa? E contesta simpel ta no. Algun hende ta bisa cu e cientificonan cu ta studia nos universo por splica su origen. Sinembargo, Marcelo Gleiser, profesor di astronomia na Dartmouth College y un agnostico, a bisa: “Nos no a logra splica e origen di e universo mes.”

Ademas, un articulo den e revista Science News a bisa lo siguiente tocante e origen di bida: “Kisas ta imposibel pa haya sa con bida realmente a cuminsa riba Tera. Mayoria di piedra y fosil cu por mustra loke realmente a tuma luga durante e prome dianan di Tera su existencia a disparce hopi tempo pasa.” For di e comentarionan ey, nos por conclui cu ciencia no a logra contesta e pregunta: Con e universo y bida a cuminsa?

Pero por ta bo ta puntra: Si bida riba Tera a ser diseña, ken a diseñ’e? Kisas bo a haci bo mes e preguntanan aki tambe: Si tin un Creador sabi y amoroso, dicon e ta permiti su criaturanan humano sufri? Dicon tin asina tanto religion contradictorio? Dicon e ta permiti su adoradornan haci asina tanto cos malo?

Ciencia no por contesta e preguntanan ey. Pero esey no kiermen cu abo no por haya contesta rasonabel. De echo, hopi hende a haya contesta satisfactorio den Bijbel.

Si bo kier haya sa dicon algun cientifico cu a tuma tempo pa studia Bijbel ta bisa cu nan ta kere den un Creador, bay na jw.org. Busca bou e serie di video Punto di Bista Riba e Origen di Bida.

Ciencia y Bijbel a convence nan

Georgiy N. Koidan, kimico

“Mi trabou ta encera pone diferente kimico hunto pa forma molecule. Ta manera hunga ahedrez: Bo mester plania varios stap adelanta. Si bo bula un stap, e molecule por plama for di otro. Aunke mi trabou ta complica, e ta simpel compara cu e miles di reaccionnan kimico cu ta tuma luga den un cel bibo pa produci molecule kimico complica. Esey ta pone mi kere cu mester tin un Creador cu sa mas tocante kimica cu nos.

Ora mi a studia Bijbel, mi a realisa cu e no ta manera niun otro buki. Bijbel a keda completa mas cu 2.000 aña pasa, pero awe ainda su conseho ta practico. Loke Bijbel ta bisa tocante con pa resolve problema den famia, na trabou y cu otro hende ta echt funciona. Mi a yega na e conclusion cu conseho asina bon mester a bin di un persona mas inteligente cu hende.”

Yan-Der Hsuuw, embriologo

“Segun cu un embryo ta desaroya, tur cel mester coopera cu otro pa transforma algun cel den nervio, musculo, weso, sanger y otro tehido pa nan por forma un hende. Ainda nos no ta compronde exactamente con e mecanismo cu ta pone cel bira un embryo ta funciona. Den mi opinion, mester tabatin un persona inteligente cu a diseña bida.

E manera cu Salmo 139:15 y 16 ta describi con un embryo ta crece den bariga di un mama, ta hopi similar na loke cientificonan a descubri den e ultimo decadanan. Con por ta cu asina tanto tempo pasa e escritor ey por a describi esey asina precies, a menos cu ta e Creador a revela esey na dje?”

Wak e video Rocío Picado Herrero: Un Maestra di Kimica Ta Splica Dicon E Ta Kere den Dios. Busca tema di e video riba jw.org.